Məhəmməd Əsədullazadə: “İkili standartlar səbəbindən ölkəmizin üzləşdiyi mina probleminə belə biganə münasibət göstərilir”
Azərbaycan dövləti 2020-ci ildən bəri minatəmizləməyə 556.6 milyon dollar vəsait xərcləyib. Bunun fonunda beynəlxalq təşkilatların göstərdiyi yardım cəmi 24 milyon dollar təşkil edib. Yəni 6 il ərzində vur-tut 24 milyon dollar. Halbuki, Ukraynada müharibə hələ bitməyib, amma təkcə mina təmizlənməsinə 8 milyard dollar yardım edilib.
Başqa bir tərəfdən Azərbaycan əraziləri digər dövlətlərin əraziləri ilə müqayisədə daha çox çirklənməyə məruz qalıb. Nəzərə almaq lazımdır ki, ötən 6 ilə yaxın dövr ərzində Ermənistan minalanmış ərazilərin həqiqi xəritəsini verməyib. Ermənistanın verdiyi xəritələrin çoxu saxta olub.
Çox maraqlıdır, beynəlxalq təşkilatlar Azərbaycanda mina təmizlənməsinə niyə bu qədər biganədirlər?
Sözügedən məsələyə aydınlıq gətirən politoloq Məhəmməd Əsədullazadə baki-xeber.com-a açıqlamasında bunun səbəbini Azərbaycana münasibətdə sərgilənən ikili standartlarla əlaqələndirdi: “Azərbaycan uzun illər Ermənistanın işğalından əziyyət çəkib. Ermənistan Azərbaycanın işğal olunmuş ərazilərində, o cümlədən əsas strateji ərazilərdə geniş şəkildə minalama işləri aparıb. Göründüyü kimi, Azərbaycan artıq altı ilə yaxındır ki, öz imkanları hesabına işğaldan azad edilmiş ərazilərdə mina və partlamamış hərbi sursatların təmizlənməsi istiqamətində genişmiqyaslı işlər həyata keçirir. Bu proses kifayət qədər böyük maliyyə vəsaiti tələb edir. Lakin Azərbaycana mina təmizlənməsi istiqamətində beynəlxalq maliyyə dəstəyinin kifayət qədər olmaması müəyyən suallar doğurur. Halbuki dünyanın digər mina təhlükəsi ilə üzləşən ölkələrində bu sahəyə milyardlarla dollar vəsait ayrılır. Bu baxımdan, beynəlxalq yanaşmalarda ikili standartların mövcudluğu barədə fikirlər səslənir. Yəni ikili standartlar səbəbindən ölkəmizin üzləşdiyi mina probleminə belə biganə münasibət göstərilir. Əsas səbəb bununla bağlıdır. Azərbaycanın hazırda öz maliyyə imkanları hesabına bu problemin öhdəsindən gəlməsi təqdirəlayiqdir. Lakin nəzərə almaq lazımdır ki, mina probleminin tam həlli uzun illər tələb edə bilər və bu prosesin yalnız bir ölkənin maliyyə imkanları hesabına aparılması kifayət qədər çətin və ağır yükdür.
Digər tərəfdən, Ermənistanın mina xəritələrini Azərbaycana tam və dəqiq şəkildə təqdim etməsi mühüm məsələlərdən biridir. Çünki mina xəritələrinin təqdim edilməməsi və ya qeyri-dəqiq məlumatların verilməsi mina təmizləmə prosesini daha da çətinləşdirir və insanların həyatını təhlükə altında saxlayır. Bu gün də Azərbaycan mina probleminin ağır nəticələri ilə üzləşir. Müharibədən sonra mina partlayışları nəticəsində insanların həlak olması və xəsarət alması problemin hələ də ciddi olaraq qaldığını göstərir. Hesab edirəm ki, beynəlxalq təşkilatlar və ayrı-ayrı dövlətlər bu məsələyə daha həssas yanaşmalı, Azərbaycanın mina təmizləmə fəaliyyətinə maliyyə və texniki dəstəyi əhəmiyyətli dərəcədə artırmalıdırlar. Eyni zamanda, Ermənistanın təqdim etdiyi mina xəritələrinin dəqiqliyi beynəlxalq mexanizmlər çərçivəsində yoxlanılmalı və mina təhlükəsinin aradan qaldırılması istiqamətində daha effektiv beynəlxalq əməkdaşlıq təmin edilməlidir”.
Vidadi ORDAHALLI
