Bəhruz Quliyev: “İndi əsas məsələ razılaşdırılan qərarların sürətlə praktiki icraya keçirilməsidir”
Məlum olduğu kimi, Bişkekdə Prezident İlham Əliyevin Ermənistan Baş naziri Nikol Paşinyan ilə görüşü olub. Liderlər Vaşinqton sülh sammitinin mühüm nəticələrindən biri olaraq Azərbaycanın əsas hissəsini Ermənistan ərazisindən keçməklə Naxçıvanla birləşdirəcək yeni nəqliyyat dəhlizini - "Tramp Marşrutu"nu (TRIPP) müzakirə ediblər.
Onlar bu layihənin reallaşması üçün növbəti addımların atılmasını və yolboyu tikiləcək bağlantıların vacibliyini vurğulayıblar.
Görünən odur ki, Bişkek görüşü Zəngəzur dəhlizi proseslərində və bununla bağlı işlərin sürətləndirilməsində dönüş yarada bilər.
Sözügedən məsələ ilə bağlı fikirlərini baki-xeber.com-la bölüşən “SƏS” qəzetinin baş redaktoru, politoloq Bəhruz Quliyev hesab edir ki, Bişkekdə Prezident İlham Əliyevlə Nikol Paşinyan arasında keçirilən görüşü təkcə növbəti diplomatik təmas kimi qiymətləndirmək düzgün olmazdı: “Burada söhbət artıq sülh prosesinin konkret iqtisadi və nəqliyyat layihələri ilə tamamlanmasından gedir. Xüsusilə TRIPP – “Tramp Marşrutu” ilə bağlı növbəti praktiki addımların müzakirəsi onu göstərir ki, Azərbaycanın əsas hissəsini Naxçıvanla birləşdirəcək bu strateji bağlantı artıq siyasi müzakirə predmetindən real icra mərhələsinə keçir. Ən mühüm məqam isə odur ki, liderlər marşrut boyunca bağlantı layihələrinin əhəmiyyətini xüsusi vurğulayıblar. Bu, Zəngəzur dəhlizinin yalnız Azərbaycanın Naxçıvanla əlaqəsini təmin edən yol olmadığını, bütövlükdə regionun nəqliyyat xəritəsini dəyişdirəcək strateji layihə olduğunu göstərir. Hesab edirəm ki, Bişkek görüşü bu baxımdan bir dönüş nöqtəsi ola bilər. Çünki sülh artıq yalnız siyasi sənədlərlə deyil, yollarla, dəmir yolları ilə, ticarətlə və iqtisadi əlaqələrlə möhkəmləndirilir. Azərbaycan öz mövqeyini ortaya qoyub: regionda kommunikasiyalar açılmalı, ölkələr arasında bağlantılar güclənməli və Cənubi Qafqaz yeni əməkdaşlıq məkanına çevrilməlidir. İndi əsas məsələ razılaşdırılan qərarların sürətlə praktiki icraya keçirilməsidir. Bişkekdən verilən mesaj əslində çox aydındır: Zəngəzur istiqamətində yol artıq yalnız xəritədə deyil, siyasi gündəlikdə də açılıb və bu yolun reallaşması regionun gələcəyini dəyişə bilər”.
Vidadi ORDAHALLI
