Emin Həsənli: “Orduların komplektləşdirilməsi baxımından bir neçə ixtisas var ki, önəm daşıyır”
Məlum olduğu kimi, Milli Məclis zabitlərin dinc dövrdəki həqiqi hərbi xidmət müddətinin 6 ay azaldılması haqqında dəyişikliyi son oxunuşda qəbul edib.
Bu "Hərbi xidmətkeçmə haqqında" Əsasnamənin təsdiq edilməsi barədə" və "Hərbi vəzifə və hərbi xidmət haqqında" qanunlara dəyişikliklər parlamentin ötən iclasında müzakirə edilib. Dəyişikliyə əsasən, ehtiyatdan müddətli həqiqi hərbi xidmətə çağırılan və ya bağlaşma əsasında həqiqi hərbi xidmətə könüllü daxil olan zabitlərin dinc dövrdə həqiqi hərbi xidmət müddəti 6 ay azaldılaraq 1 il (hazırda həmin müddət 1 il 6 aydır) müəyyən ediləcək.
Maraqlıdır, ehtiyatda həqiqi hərbi xidmətə çağrılan zabitlərin xidmət müddəti dinc dövrdə niyə 6 ay azaldılır? Ümumiyyətlə, dinc dövrdə ehtiyat zabitlərin həqiqi hərbi xidmətə çağırılması hansı zərurərdən əmələ gələ bilər?
“Tərxis Olunmuş Hərbçilərin Gəncləri Maarifləndirmə” İB-nın sədri, hərbi ekspert Emin Həsənli baki-xeber.com-a bildirdi ki, bir çox ölkələrdə ehtiyatda olan zabitlərə ehtiyac olur: “Orduların komplektləşdirilməsi baxımından bir neçə ixtisas var ki, önəm daşıyır. Məsələn, həkim, komputer ixtisası və digər sahələrə ehtiyac var. Həmçinin, ordu üçün yeni ixtisaslarda yaranır. Həkim, mühəndis, maliyyəçi, hüquqşunas bu tip ixtisaslara sahib olan şəxslər hərbi sahədə də öz işini davam etdirə bilər. Bu səbəbdən də hesab edirəm ki, bu çox doğru və vaxtında verilmiş qərardır. Məlumdur ki, qanun zamana və məkana görə qüvvədə olur. Dünya yeni dönəmə qədəm qoyduğu üçün ordumuzda da yeni ixtisaslara tələbat var”.
Günel CƏLİLOVA
