Son zamanlar kosmetoloqlara müraciət edənlərin və bu cür xidmət təklif edən həkimlərin sayı çoxalıb.
Plastik əməliyyatdan çəkinən, ancaq görünüşündə nəyisə özünə kompleks edən, qüsur kimi görənlər bunu düzəltmək üçün müxtəlif adda kosmetoloji xidmətlərdən istifadə edirlər.
Bu yolla dodaqları böyütmək, burnu kiçiltmək, qaşları qaldırmaq, qalınlaşdırmaq, üzdəki səpkiləri aradan qaldırmaq, dəriyə qulluq, ət xallarının götürülməsi, hətta əyri ayaqların düzəldilməsi belə mümkündür.
Ancaq heç də hər kəs bu prosedurlardan razı qalmır. Nəzərə alsaq ki, sadəcə 2-3 aylıq kurs bitirməklə kosmetoloq kimi çalışanlar var, üstəlik məhəllə arası kiçik gözəllik salonlarında belə epilyasiya aparatını idarə edə bilənlər özlərini kosmetoloq adlandırır, baş verəcək fəsadları öncədən müəyyən etmək mümkündür.
Qeyd edək ki, gözəlləşmək arzusunda olan qadınların “qaşını düzəldərkən gözünü çıxaran” kosmetoloqlar özlərinə müştəriləri daha çox “İnstagram” sosial şəbəkəsi vasitəsilə cəlb edir.
Öz əl işlərini “öncə-sonra” şəklində paylaşan, tanışlarına şəkillərə rəy yazıb onu tərifləməyi xahiş edən, hətta saxta profillərdən özünə rəy yazan kosmetoloqlar müxtəlif kampaniyalar, endirimlər nəticəsində bir çox qadını həvəsləndirir.
Məlumat üçün bildirək ki, dünya təcrübəsində kosmetoloq-həkim kimi təhsil aldıqdan sonra fəaliyyət göstərməyə icazə verilir. Ancaq bizdə fərqlidir. Kimliyindən asılı olmayaraq, istənilən şəxs bu işlə məşğul ola bilər.
Hətta bu günlərdə Səhiyyə Nazirliyi Analitik Ekspertiza Mərkəzinin Tibbi nəzarət şöbəsinin müdir müavini Ramik Quliyev media nümayəndələrinə açıqlamasında bildirib ki, kosmetoloji iş üzrə özəl tibb xidməti fəaliyyətinin göstərilməsi üçün lisenziya tələb olunur: "Kosmetoloji işlərlə məşğul olanlar (həkim-dermatoloq) ali tibbi təhsilli mütəxəssislər və ya orta tibbi təhsili olan orta tibb işçiləri olmalıdırlar. Ali və ya orta ixtisas təhsilinə malik mütəxəssislər praktik tibb fəaliyyəti ilə məşğul olduqlarından beş ildə bir dəfə sertifikasiyaya cəlb edilməlidirlər".
Ancaq yuxarıda qeyd etdiyimiz kimi, bu gün ölkəmizdə fəaliyyət göstərən kosmetoloqların sayı həddən artıq çoxdur. İstənilən peşə sahibi, bu sahə üzrə heç bir ali və ya orta təhsili olmayan şəxs sərbəst şəkildə qeyd edilən peşə ilə məşğul olur. Nəticədə narazı xanımların, gözəlləşmək əvəzinə daha da pis günə düşənlərin sayı artır.
Maraqlıdır, bu qədər kosmetoloqun fəaliyyət göstərdiyi və eyni zamanda bu qədər də şikayətin edildiyi bir zamanda niyə hələ də bu məsələyə nəzarət edilmir?
Adil Qeybulla: "Sistematik olaraq kosmetoloq kimi fəaliyyət göstərənlərin dairəsi müəyyənləşməlidir, daha sonra onlar...."
Mövzu ilə bağlı "Bakı-Xəbər" ə danışan tibb üzrə ekspert, professor Adil Qeybulla bildirdi ki, Səhiyyə Nazirliyi kosmetoloq kimi fəaliyyət göstərən şəxslərə sertifikat verməlidir: “Sistematik olaraq kosmetoloq kimi fəaliyyət göstərənlərin dairəsi müəyyənləşməlidir. Daha sonra onlar yoxlamalardan keçib, sertifikatlarla təmin edilməlidir. Səhiyyə Nazirliyi sertifikat verərkən yoxlamalıdır ki, həmin adamın tibbdən baza təhsili var, ya yox. Bundan başqa, həmin sahə üzrə müvafiq kurs keçməsi ilə bağlı da sənədi yoxlanılmalıdır. Onun keçdiyi kursun keyfiyyəti araşdırılmalıdır. Bunların əsasında da həmin şəxsə kosmetoloq kimi işləməsi, prosedurları gerçəkləşdirməsi üçün lisenziya verməlidir”.
Aynurə Həsənova: "Ən acınacaqlı durum odur ki, bu zaman kosmetoloqlar ilkin yardım göstərməyi belə bacarmırlar"
Dermatokosmetoloq-trixoloq, həkim Aynurə Həsənova “Bakı-Xəbər”ə açıqlamasında qeyd etdi ki, gənc xanımlar kosmetoloji prosedurlar üçün hər insana müraciət etməsinlər: “Həkim olmayan insana burun etibar etmək olmaz. Hər reklam olunan videoya, şəklə, ucuz qiymətə aldanmasınlar. Elə bu xanım da qiymət ucuz idi deyə, həvəslənib və sonu da məlumdur. Xanımlar reklamlarda ucuz qiymətə hər hansı bir prosedurun edilməsinə aldanmasınlar. Əks halda, burun, dəri və dodaqlarını itirə bilərlər”.
Həkim-kosmetoloq pasiyentlərin kosmetoloji prosedurlardan yararlandığı halda istifadə edilən preparatların keyfiyyətinə diqqət yetirməsinin vacib olduğunu söyləyir. Onun sözlərinə görə, istifadə edilən preparatların tanınmış şirkətlərin məhsulu olması şərtdir. Əks halda, üz dərisində fəsad qaçılmazdır.
A.Həsənovanın sözlərinə görə, kosmetoloqlar əksər prosedurları qanla edirlər ki, bu da orqanizm üçün olduqca həssas bir prosesdir: “Məsələn, plazma üçün damardan qan alınır, sonra o, hansısa formada təmizlənir və üzə vurulur. Həkimlərin bu məsələdə vahid mövqeyi var: qanla işləyən kosmetoloq hepatit əleyhinə məhluldan da istifadə etməlidir. Halbuki, təcrübəsiz kosmetoloqların belə bir maddədən ümumən xəbərləri yoxdur. Spirtləmə, qaynatma təhlükəli viruslara təsir göstərmir. Tam dezinfeksiya üçün xüsusi aparatlardan istifadə olunmalıdır”.
Həmsöhbətimiz onu da əlavə etdi ki, saxta məhsullar allergik reaksiya verə bilər: "Saxta botoksların allergik reaksiya verməsinə tez-tez rast gəlinir. Ən acınacaqlı durum isə odur ki, bu zaman kosmetoloqlar ilkin yardım göstərməyi belə bacarmırlar. Kosmetoloji prosedurlar zamanı istifadə edilən keyidici preparatlara həssaslıq da əvvəlcədən yoxlanılmalıdır. Saxta preparatlardan təkrar istifadələr isə hətta ölümə səbəb ola bilər. Saxta kosmetoloji prosedurlar insanın orqanizmində immun sistemini zəiflədir. Eyni zamanda daxili orqanları zədələyir. Təkrar belə preparatların üz dərisinə vurulması bir müddət keçdikdən sonra insanın şok vəziyyətinə düşərək ölməsinə səbəb ola bilər. Ona görə də mən tövsiyə edirəm ki, xanımlar sağlamlıqlarını təhlükə altına qoyaraq cavanlaşmağın onların həyatı bahasına başa gələcəyini göz önünə gətirsinlər”.
A.Həsənova da hesab edir ki, bu sahəyə dövlət nəzarəti artırılmalı, təhsili, təcrübəsi olmayan şəxslərin kosmetoloq kimi çalışmasına icazə verilməməlidir.
Günel CƏLİLOVA
