“Hazırda 6 saata yaxın dərs deyən 4 439 müəllim var. Bu da ümumi müəllimlərin 4 faizini təşkil edir. Onlar 150 manat maaş alırlar. Yeni qərarla həmin müəllimlərin əməkhaqlarına edilən 10 faiz artımla minimum 165 manat, 35 faizlə isə minimum 203 manat olacaq”.
Bunu elm və təhsil naziri Emin Əmrullayev keçirdiyi brifinqdə deyib.
Nazir qeyd edib ki, 6 saatdan 12 saata qədər dərs deyən müəllimlərin sayı 18 530, 12 saatdan 18 saata qədər dərs deyənlərin sayı 31 116, 18 saatdan 24 saatadək dərs deyənlərin sayı 40 209, 24 saatdan çox dərsi olna müəllimlərin sayı isə 34 382 nəfərdir.
“Ölkədə bu gün üçün 129 min nəfər pedaqoji heyət var. Bundan əlavə 11 mindən çox idarəetmə heyətində olanlar da dərs deyir"- deyə E.Əmrullayev əlavə edib.
Müəllimlərin arasında dərs saatlarının qeyri-bərabər olması nə ilə bağlıdır? Bu qeyri-bərabərlik hansı prinsiplə baş verib? Bunu aradan qaldırmaq lazımdırmı, mümkündürmü ki, dərs saatları arasında bu qədər fərq olmasın?
“Dərs saatlarının bölünməsi məsələsində problemlər də var”
Mövzunu “Bakı-Xəbər”ə şərh edən tanınmış təhsil eksperti Məzahir Məmmədli vurğuladı ki, dərs saatının bölünməsi prosesi hamının düşündüyü kimi deyil. “Bu, dərs saatının olmaması ilə bağlı deyil. Bəzi məktəblərdə dərs saatı var. Amma MİQ imtahanlarında yetərli bal toplamayıb arzuladığı yeri qazana, vakansiyanı təmin edə bilməyən müəllimlər adətən gedib ucqar bir dağ kəndində vakansiyanı təmin edir və 6 saat dərsini bir günün içinə salır və dərsi tədris edib ev-eşiyinə qayıdır. Belə hallar da var. Deməzdim ki, 6 saat dərsi olan müəllimlərin hamısı belədir, amma bu amil də var. İstərdim, oxucular bunu da nəzərə alsınlar ki, bu məsələ dərs saatının çatışmazlığı ilə bağlı deyil”.
M.Məmmədli həmçinin qeyd etdi ki, MİQ imtahanlarında zəif nəticə göstərib müvafiq məktəblərdə 6 saat dərslə kifayətlənmə halları ilə yanaşı başqa məsələlər də mövcuddur. “Bir məsələ də var ki, dərs saatlarının bölünməsi məsələsində problemlər də var. Bu problemlər nə ilə bağlıdır? Əksər məktəblərdə üzgörənlik, qərəzlilik var. Məktəb direktorları əvvəlcə özlərinə yaxın, simsar adamlar arasında dərsləri bölürlər, qalan dərslər isə qalan müəllimlərin arasında bölünür. Ən pis hal da odur ki, artıq köhnə kollektivdə bir-birinə uyğunlaşan müəllimlərin arasında yeni vakansiyaya çıxarılmış yerə gələn müəllimlərə qarşı xüsusilə böyük kampaniya gedir. Təəssüflər olsun ki, bu böyük kampaniya, hamısını olmasa da, məktəblərin əksəriyyətini əhatə edir. Yeni gələnlərə nədənsə bir qısqanclıq, fərqli yanaşmalar var. İstisnalar var. Ucqar dağ kəndlərində yeni müəllimin gəlişinə sevinirlər, amma şəhər məktəblərində bu məsələ bir qədər çoxluq təşkil edir”- deyə M.Məmmədli vurğuladı.
İradə SARIYEVA
