Bəzi tur şirkətləri ilə müştərilərin arasında narazılıqlar - Lalə turu, Lavanda turu...
Son vaxtlar qeyri-neft sektorunun ən çox inkişaf edən sahələrindən biri də turizmdir. Beynəlxalq səviyyəli tədbirlərin ölkəmizdə keçirilməsi onun daha geniş arenada tanınmasına şərait yaratdı. Bununla da Azərbaycan digər ölkələrin vətəndaşları üçün maraqlı ölkəyə çevrildi. Beləcə, ölkəyə turist axını baş verdi.
Nəticə etibarı ilə həm yerli, həm də xarici turistlərə xidmət göstərən həddən artıq turizm şirkəti fəaliyyətə başladı. Amma təəssüf ki, bu turizm şirkətlərinin kəmiyyət göstəriciləri ilə keyfiyyət göstəricilərinin düz mütənasib olduğunu deyə bilmərik. Bu sahədə ciddi problemlərin olduğu hər kəsə bəllidir. Ölkədaxili turların sayı getdikcə artsa da narazıların sayı da artır. Narazılığa əsas səbəb istirahətə gedən şəxslərə əvvəlcədən vəd edilənlərin icra edilməməsidir. Şikayətçilərin dediyinə görə, planda yazılan yerlərin çoxuna gedilmir, xidmətlərə görə əlavə ödənis tələb edilir, axşam saat 10-da Bakıda olmaq haqqında məlumat verilsə də gecə 1-də ancaq çatılır. Qeyd etdiyimiz bu şikayətlər, əsasən, “Lalə turu”, Lavanda çiçək açanda “Lavanda turu”, mandarin yetişəndə “Mandarin turu”, Nar festivalında “Nar turu” cəlbedici adları olan tur şirkətlərindəndir.
- “Turizm bir xidmət sektorudur və bu sektorda müştəri məmnuniyyəti ön plandadır”
Turizm sahəsi üzrə ekspert Elçin Rüstəm qeyd etdi ki, turizm bir xidmət sektorudur və bu sektorda müştəri məmnuniyyəti ön plandadır. Turizm şirkətləri ilk olaraq xidmətin keyfiyyətinə diqqət etməlidirlər: “Keyfiyyətli xidmətə etibarlılıq, nəzakət, kommunikasiya, təhlükəsizlik, müştərini başa düşmək, fiziki sübutlar, əlçatanlıq, qarşılıq vermək və s. kimi amillər daxildir. Bu amilləri nəzərə alaraq öz fəaliyyətini təşkil edən səyahət şirkətləri müştərilərini daim məmnun edəcək. Təbiidir ki, yuxarıda sadalanan amilləri yerinə yetirmək üçün keyfiyyətli işçilərə ehtiyac var. O da məlumdur ki, turizm sahəsi mövsümi xarakter daşıyır. Bu da qəbul edilmiş işçilərin mövsümi olaraq işə alınmasına səbəb olur. Lakin həmin işçilər mövsümündən asılı olmayaraq təlimləndirilməlidirlər. Təlimlər isə əsasən müştəri ilə necə ünsiyyət qurulmalıdır, müştəri məmnuniyyəti, narazı müştəri, ortaya çıxan problemlərin ən qısa vaxtda müştərini narazı salmayacaq şəkildə həll edilməsi kimi vacib məsələləri əhatə etməlidir. Xidmət keyfiyyətinin səviyyəsi səyahət şirkətinin bazar payı, xitab etdiyi bazar seqmenti və öz strukturundan asılıdır. Bəzi səyahət şirkətləri sadəcə, xarici turistlərə bilet satmaqla məşğuldur. Digərləri yalnız turların təşkili istiqamətində fəaliyyət göstərir. Burada əsas məqam odur ki, biz artıq dünya turizm bazarına daxil olmuşuq. Səyahət şirkətləri davamlı inkişafa nail olmaq istəyirlərsə, fəaliyyət spektrlərini genişləndirməli və bazar paylarını artırmalıdırlar. Bu da yalnız və yalnız sadalanan amilləri nəzərə alaraq keyfiyyətli xidmət təqdim etməklə mümkündür”.
Həmsöhbətimiz onu da əlavə etdi ki, turlarla bağlı ən çox problem yaradan məsələ restoranlardan narazılıqdır. Ümumiyyətlə, restoranların çoxu turları qəbul etmək istəmir. Restoranlar şəxsi avtomobillərlə gələn müştərilərə üstünlük verirlər. Çünki onlar daha çox sifariş verirlər.
Günel CƏLİLOVA
