Rusiya lideri Vladimir Putin 29-cu Sankt-Peterburq Beynəlxalq İqtisadi Forumunun (SPIEF) əsas sessiyasında Zelenskinin məktubuna münasibət bildirib. Rusiya prezidenti məktubda "kobud və hörmətsiz elementlərin" olduğunu və bu mərhələdə Zelenski ilə görüşün mənasız olacağını bildirib.
“Məktubda həqiqətən də kobudluq elementləri var. Bu nədir? Bu, şəxsi görüş və danışıqlar üçün əlverişli şərait yaratmaq metodudur, yoxsa əslində hər hansı bir şəxsi görüşü qeyri-mümkün edən bir mühit yaratmaq cəhdidir? Düşünürəm ki, bu, sonuncudur” – deyə Putin bildirib.
Putin Ukrayna ilə bağlı bu günə qədər açıqlanmayan maraqlı bir detalı da paylaşıb. O, bildirib ki, bu yaxınlarda Kiyevə səfər edən rusiyalı bir iş adamı Zelenski ilə görüşüb və qayıdandan sonra görüşün təfərrüatlarını ona çatdırıb. Putin adını açıqlamadığı iş adamının Zelenskinin şəxsi görüş təklifini çatdırdığını və auditoriyaya heç vaxt belə bir görüşdən imtina etmədiyini xatırladıb.
Lakin Putin daha sonra Ukrayna ordusunun Stratobelsk şəhərinə hücumundan sonra iş adamına zəng edərək "Bu nədir?" deyə soruşduğunu xatırladıb. Putinin sözlərinə görə, iş adamı ona hücumdan xəbərsiz olduğunu deyib. Rusiya lideri bildirib ki, Stratobelsk hücumundan sonra və Zelenskinin danışıqlara çağıran açıq məktubundakı "kobud tona" görə Ukrayna lideri ilə görüşməyin mənası yoxdur. Putin çıxışını cəbhə xəttindəki rus əsgərlərinə müraciət edərək onları "İşləməyə davam edin, qardaşlarım" çağırışı ilə yekunlaşdırıb.
Rusiya lideri Zelenskinin məktubunu araşdırdığını, ancaq ona sadəcə ötəri nəzər saldığını bildirib. Putin bu kimi məsələlərin ictimai müstəvidə müzakirəyə çıxarılmasını tənqid edib və bunun doğru olmadığını bildirib. O, iddia edib ki, Zelenskinin mövqeyi heç kimin onunla üz-üzə görüşmək istəməyəcəyi bir mühit yaradıb.
Putin Zelenskinin məktubda onun yaşına da eyham vurduğunu qeyd edib: “Əlbəttə ki, hər kəs öz yaşını nəzərə almalıdır. Lakin mənim yaşımda hələ də vəzifədə olan bir çox siyasətçi var, bəziləri isə məndən daha yaşlıdır. Əhəmiyyətli olan yaş deyil, işləmək və vəzifələrini yerinə yetirmək qabiliyyətidir”.
Putin hərbi əməliyyatın gec-tez başa çatacağını, ancaq Rusiyanın xüsusi hərbi əməliyyat çərçivəsində qarşısına qoyduğu məqsədlərə çatdıqdan sonra başa çatacağını bildirib.
Tahir TAĞIYEV
