Akif Nəsirli:“Qanunvericilikdə hər iki fəxri ad üçün ayrıca məbləğ müəyyən edilib və bu, həmin adların hüquqi statusundakı fərqlə əlaqələndirilir”
Azərbaycan dövləti müxtəlif kateqoriyalardan olan vətəndaşlara aylıq Prezident təqaüdləri ödəyir. “Vətən Müharibəsi Qəhrəman” və “Azərbaycanın Milli Qəhrəmanı adı verilmiş şəxslərə nə qədər təqaüd verilir?
"Vətən Müharibəsi Qəhrəmanı" adı almış şəxslərə ayda 2200 manat, "Azərbaycanın Milli Qəhrəmanı" adı almış şəxslərə isə ayda 2000 manat məbləğində Azərbaycan Respublikası Prezidentinin təqaüdü ödənilir. Hər iki fəxri ad üzrə təqaüdlər, ad verilən şəxs vəfat etdiyi halda, qanunvericiliklə müəyyən edilmiş qaydada ailə üzvlərinə (dul arvadına/ərinə, valideynlərinə və ya yetkinlik yaşına çatmamış uşaqlarına) ödənilməyə davam edir.
Bu fərq niyə var? Bu fərq nə üçündür? Niyə hər iki kateqoriyadan olan şəxslərinin ikisi də bərabər həcmdə təqaüd almasınlar?
Liberal İqtisadçılar Birliyinin sədri Akif Nəsirli baki-xeber.com-a bildirdi ki, “Milli Qəhrəman” və “Vətən Müharibəsi Qəhrəmanı” adları eyni məna daşımır. Ekspert hesab edir ki, “Milli Qəhrəman” Azərbaycanın ən yüksək fəxri adıdır və ölkənin müstəqilliyi, təhlükəsizliyi və xalq qarşısında göstərilən xüsusi xidmətlərə görə verilir, “Vətən Müharibəsi Qəhrəmanı” isə əsasən 2020-ci il Vətən Müharibəsində göstərilən xüsusi igidlik və qəhrəmanlığa görə təsis edilmiş ayrıca fəxri addır. “Ola bilsin ki, 44 günlük Vətən müharibəsinin Azərbaycan tarixində xüsusi əhəmiyyət daşıdığını görə belə bir simvolik fərq yaradılıb. Çünki əsirlərlə Azərbaycan müharibələrdə torpaq itirib, amma bu muharibədə ölkənin itrilmiş torpaqlarının qaytarılmadinda bir dönüş yaradıb - işğal edilmiş 20 faiz torpaqlarımız 30 ildən sonra azad edilib. Bu ölkəmizin həyatında tarixi hadisədir. Ola bilsin, bu məqami nəzərə alaraq 44 günlük Vətən Müharibəsinə həsr edilmiş mükafat ölkənin ali mükafatından üstün tutulub.
Təqaüdlərin fərqli olması dövlətin bu adları müxtəlif status və meyarlarla qiymətləndirməsindən irəli gəlir. Qanunvericilikdə hər iki fəxri ad üçün ayrıca məbləğ müəyyən edilib və bu, həmin adların hüquqi statusundakı fərqlə əlaqələndirilir.
Bununla belə, bəzi insanlar hesab edir ki, hər iki ad ölkə qarşısında ən yüksək səviyyəli xidmət və fədakarlığı təmsil etdiyinə görə təqaüdlər bərabər olmalıdır. Digərləri isə fərqli fəxri adların fərqli sosial təminatlarla müşayiət olunmasını normal hesab edir. Bu məsələ daha çox dövlətin sosial siyasəti və qanunvericiliklə bağlı seçimidir”-deyə A.Nəsirli qeyd etdi.
İradə SARIYEVA
