Quru meyvələri satanların yeni reklam üsulu - şərbətə salıb satırlar…

Ağa Salamov: “Bakı bazarlarında, marketlərdə də görürük ki, şirəli, yapışqan xurmalar satılır, onlar isə...”

img

Sürətli həyat tempi, ekologiyanın pisləşməsi, informasiya və texniki xarakterli gərginliyin artması orqanizmə mənfi təsir göstərir. Ona görə də sağlamlığı qorumaq qaydalarını bilmək və ona əməl etmək vacibdir. Sağlam həyat tərzi gümrah yaşamağı və xəstəliklərdən uzaq olmağı nəzərdə tutur.

Düzgün qidalanma sağlam həyat tərzinin ilkin şərtlərindən biridir. Sağlam şəkildə qidalananların bir qismi quru meyvələrə üstünlük verir. Ancaq  bu sahədə işbazların əməlləri öncə olur. Belə ki, quru meyvələr, xüsusilə xurmalar şərbətə batırılaraq satılır. İnsanlar isə məlumatlı olmadıqları üçün təbii şəkər adı ilə bu xurmaları istehlak edirlər. Onu da nəzərə almaq lazımdır ki, quru meyvələri istehlak edənlər arasında şəkər xəstəliyindən əziyyət çəkənlər üstünlük təşkil edir. İşbazların məlum artıq qazanc istəyi şəkər xəstəliyindən əziyyət çəkənlərin sağlıq durumunu daha da pisləşdirir.

  • “Xurmalar ən çox Afrika ölkələrindən gətirilir, bu xurmaların şirəyə batırılıb satılmasında məqsəd məhsula parlaq görüntü verməkdir”

Qida məsələləri üzrə ekspert, baş mütəxəssis Ağa Salamov bildirdi ki, xurmalar ən çox Afrika ölkələrindən gətirilir. Onun sözlərinə görə, bu xurmaların şirəyə batırılıb satılmasında məqsəd məhsula parlaq görüntü verməkdir: “Bakı bazarlarında, marketlərdə də görürük ki, şirəli, yapışqan xurmalar satılır. Bu xurmalar qarğıdalı şirəsindən hazırlanmış məhlula batırılır. Bu zaman xurmanın görkəmi dəyişməklə yanaşı, çəkisi də artır. Ən yaxşı xurma mat xurmalardır. Hətta üstündə ağartılıq da görünür. Ələ yapışmayan xurmalar daha keyfiyyətlidir.

Ümumiyyətlə, qurudulmuş meyvə alarkən onun keyfiyyəti müəyyənləşdirilməli və  meyvələri qoxusuna görə yoxlamaq lazımdır. Düzgün texnologiya ilə hazırlanmış quru meyvə təbii və xarakterik iyə malik olmalıdır. Əgər məhsul üçün spesifik olmayan qoxu varsa, bu, məhsulun keyfiyyətsiz və sağlamlıq üçün zərərli olduğunu göstərir”.

Günel CƏLİLOVA

Peşə etikası

Son xəbərlər