Məlum olduğu kimi, 5 aydır ki, Bakı Slavyan Universiteti (BSU) rektorsuz fəaliyyətini davam etdirir. BSU-ya həm rektor, həm də iki prorektor təyinatı gözləniləsə də, hələ bu baş verməyib, hər iki istiqamətdə təyinatlar gecikir. Bundan başqa, BSU-da bir neçə yüksək vəzifənin də yeni təyinat gözlədiyi bildirilir.
Mətbuatda yazılanlara istinadən qeyd edək ki, BSU-nun keçmiş rektoru, professor Nurlana Əliyevanın adı müxtəlif qalmaqallı məsələlərdə hallandırılıb. N.Əliyeva artıq 5 aydır ki, rektor vəzifəsindən kənarlaşdırılıb, lakin hələ də onun yerinə təyinat olmayıb.
Hazırda Bakı Slavyan Universitetinin rektorunun səlahiyyətlərini Anar Nağıyev icra edir.
Qeyd edək ki, Prezident İlham Əliyevin iyunun 22-də imzaladığı Sərəncamla Nurlana Əliyeva Bakı Slavyan Universitetinin rektoru vəzifəsindən azad edilib. Təhsil Nazirliyinin Elm, ali və orta ixtisas şöbəsinin müdir müavini Anar Nağıyev Bakı Slavyan Universitetinə rektor əvəzi təyin olunub.
Həmin dövrdə mətbuatda yayılan məlumatlara görə, A. Nağıyev 3 ay müddətində BSU-da rektor vəzifəsini icra etməli idi. Lakin rektor təyinatı olmadığından, o bu vəzifəni hələ də icra edir.
BSU-nun rektor və prorektorlar təyinatının gecikməsini müxtəlif yerlərə yozanlar da var. Bəzi iddialara görə, BSU-nun Azərbaycan Dillər Universitetinə birləşdirilməsi məsələsi var. Guya BSU və ADU birləşdiriləcək. Hər halda, deyilənlər rəsmi təsdiqini tapmayan məsələlərdir. Amma faktiki olaraq BSU hazırda rektorsuzdur, ali məktəbə rektor əvəzi rəhbərlik edir.
BSU rektoru vəzifəsinə təyinat hansı səbəbdən gecikə bilər?
Məsələyə BSU-dan münasibət öyrənə bilmədik.
Gənc Alim, Doktorant və Magistrlər Cəmiyyətinin rəhbəri, fizika-riyaziyyat üzrə fəlsəfə doktoru İlqar Orucov bizimlə söhbətində bildirdi ki, rektorları Təhsil Nazirliyi təyin etmir, bu təyinat birbaşa dövlət başçısının səlahiyyətində olan məsələdir.
“Rektor təyinatı ölkə başçısının sərəncamı ilə reallaşır. Bu, Təhsil Nazirliyinin səlahiyyətində olan məsələ deyil, birbaşa cənab Prezidentin səlahiyyətində olan təyinatdır. Əlbəttə, universitetlərə rektor təyinatının gecikməsi halları ilə biz zaman-zaman rastlaşmışıq. Məsələn, Lənkəran Dövlət Universitetinə rektor təyinatında təxminən 5 ilə yaxın müddətdə gecikmə olmuşdu. Təbii ki, o universitetdə rektor vəzifəsini icra edən şəxs vardı, amma hər halda təyinat cənab Prezidentin təyinatı deyildi. BSU-ya gəlincə, bu universitetdə rektor və iki prorektor da yoxdur, amma əlbəttə ki, onları əvəz edən şəxslər var. Onlar nazirlik tərəfindən təyin ediliblər. Amma hər halda, təbii ki, rektorun olması universitetdə aparılan işləri sürətləndirə bilər. Rektorluq məsuliyyətli bir vəzifədir və o birbaşa ölkə başçısının sərəncamı ilə təyin olunan bir şəxsdir. Rektorun məsuliyyəti daha çoxdur. BSU-ya rektor təyinatında hansı məqamlara görə gecikmə olduğunu demək çətindir”.
BSU-ya rektor təyinatının keçmiş rektorun dövründə burada baş verən neqativ hallarla bağlı olmaq ehtimalına gəlincə, İ.Orucov bunu istisna etdi və bildirdi ki, təyinatın gecikməsinin bununla bağlı olması inandırıcı görsənmir. “Rektor vəzifəsindən azad olunursa, bu o deməkdir ki, onun fəaliyyətində problemlər olub. Tutaq ki, onun fəaliyyəti ölkə başçısını, nazirliyi qane etməyib, neqativ hallara görə işdən azad olunub. Amma məsələ ondan ibarətdir ki, BSU-ya rektor təyinatı zamanında olsa daha yaxşı olar. Yəni təyin olunan adam konkret olaraq ora fokuslanar, bilər ki, orada işləyir, çalışır və məsuliyyəti var, universitetin hədəflərinə çatmaq üçün daha səylə çalışar. Əlbəttə, BSU-da rektoru əvəz edən Anar müəllim çox təcrübəli şəxsdir, gənc və perspektivlidir. Düşünmürəm ki, o, işlərin öhdəsindən gələ bilmir. Amma onun rektor təyin edilməsi daha faydalı olardı”.
İ.Orucov deyir ki, kənarda kadr axtarmağa ehtiyac yoxdur, BSU-nun rektor əvəzi Anar Nağıyev bu vəzifəyə tam layiqli kadrdır.
BSU-nun ADU ilə birlıəşdirilməsi barədə deyilənlərə gəlincə, İ.Orucov bundan məlumatsız olduğunu bildirdi: “Bakı Slavyan Universitetinin Azərbaycan Dillər Universitetinə birləşdiriləcəyinə dair məlumatım yoxdur. Amma belə baxanda, onlar müəyyən qədər yaxın profilli universitetlərdir. Əslində birləşmə ola da bilər. Lakin nəzərə alaq ki, BSU-da slavyan dilləri öyrədilir. Buna baxmayaraq birləşə bilərlər...”
İradə SARIYEVA
