Azərbaycan Milli Elmlər Akademiyasının (AMEA) ayrı-ayrı elmi-tədqiqat institutlarında baş verən neqativliklərin kökünün 2000-ci illərin əvvəllərinə gedib çıxdığı bildirilir. AMEA-nın Nəsimi adına Dilçilik İnstitutunda 2012-ci ildə baş verən qanunsuzluqlar, maliyyə yeyintisi haqda da elmi dairələrdə geniş danışılır, lakin hələ bu məsələyə hüquqi qiymət verilmədiyi deyilir.
Sosial şəbəkələrdə və elmi dairələrdə yayılan məlumatlara görə, AMEA prezidenti, akademik Ramiz Mehdiyev Dilçilik İnstitutunun keçmiş rəhbərliyi dövründə mənimsənildiyi iddia edilən 2 milyon manatın taleyinin araşdırılması ilə bağlı göstəriş verib. Bundan başqa deyilir ki, AMEA-nın ayrı-ayrı elmi-tədqiqat institutlarında müxtəlif dövrlərdə elmi işlər, layihələr üçün ayrılan qrantların da əksər hissəsi mənimsənilib və AMEA prezidenti mənimsənilən qrantlarla da bağlı araşdırmalar aparılmasını tapşırıb. Bəzi institutlardan aldığımız məlumatlara görə, müxtəlif alimlər bu qanunsuzluqlarla əlaqədar R.Mehdiyevə müraciət edib və Azərbaycan elminin üz qarası olan bu problemlərin araşdırılmasını, qiymətləndirilməsini istəyib.
“Ramiz Mehdiyev bu məsələlərin araşdırılmasına, indiyə qədər ört-basdır edilən hadisələrin üzə çıxmasına çalışmalıdır”
AMEA-nın Dilçilik İnstitutunun şöbə müdiri, filologiya elmləri doktoru, dilçi alim İdris Abbasov “Bakı-Xəbər”ə bildirdi ki, R.Mehdiyevin bu məsələləri araşdırtdığı deyilir, amma konkret bir addım yoxdur: “Biz də eşitmişik. Deyilınə görə, akademik Ramiz Mehdiyev AMEA Dilçilik İnstitutuna ayrılmış 2 milyonun izinə düşüb. Yalansa, doğru olsun! Belə getsə, yüz minlərlə qrantların taleyinə də aydınlıq gətiriləcək...
Görəsən, 2 milyonun 200 manatına möhtac istedadlı övladlarımızı ölkədən didərgin salan daxili satqınların cəzalandırılacağına ümid etmək olarmı?!”
İ.Abbasovun sözlərinə görə, o özü də R.Mehdiyevə rəsmi müraciət edib. “Mən Ramiz Mehdiyevə iki aya yaxın olar ki, məktub da ünvanlamışam. Müraciətim həm bu 2 milyonla, həm də başqa məsələlər var ki, onlarla əlaqədardır. Söhbət təkcə mənimsənilən 2 milyondan getmir, orada daha dəhşətli hadisələr, maliyyə maxinasiyaları baş verib. Mən AMEA prezidentinə müəyyən vacib sənədlər göndərmişəm. Hətta Tofiq Hacıyevin 2014-cü ildə lentə aldırdığı iclasın videosunu təqdim etmişəm. Burada çox dəhşətli faktlar baş verib, ona görə də ümid edirəm ki, Ramiz Mehdiyev bu məsələlərin araşdırılmasına, indiyə qədər ört-basdır edilən hadisələrin üzə çıxmasına çalışacaq. Ordan-burdan eşidirik ki, araşdırılmalar aparılmasına göstəriş verilib, lakin hələ rəsmi bir şey yoxdur”.
AMEA institutlarının bir çoxundan alimlərin AMEA prezidentinə müraciət edərək həm alimlərə ayrılan bağ sahəsi, həm kitab nəşrinə və digər məsələlərə ayrılan vəsaitlərin müəmmalı taleyi ilə bağlı geniş araşdırmasını tələb etməsi barədə deyilənlərə də münasibət bildirən İ.Abbasov bildirdi ki, nə qədər saxta, plagiat kitab “istehsal” olunub, bunlara görə milyonlar silinib, Dilçilik İnstitutunun hər otağına bir maqnitafon alınıb: “Dilçilik İnstitutu o maqintafonu nə edirdi? Bunlar hamısı pul silmək üçün edilib. Möhsün Nağısoylu özündən əvvəl baş verən bu neqativ halların üstünü basdırırdı. Amma Tofiq Hacıyev onların üstünü müəyyən qədər açmışdı. Tofiq müəllim iclas keçirmişdi, hətta o vaxt bəziləri əməllərini etiraf etdilər. O vaxt hər ay aldıqları maaşın həcmində özlərinə pul yazmışdılar. Bunlar Tofiq Hacıyevdən və Möhsün Nağısoyludan əvvəlki dövrdə baş verib, amma bu faktların üstü hələ də açılmayıb. Başa düşə bilmirəm, orqanizmdə bir xəstəlik varsa onu niyə örtürlər, onu kəsib atıb müalicə etmək lazımdır ki, yayılmasın. Amma bunlar bu cinayətin üstünü örtürlər ki, açılmasın və bu pis presedent davam etsin. Bu pis nümunədir. O birilər də baxıb deyir ki, 2 milyion yeyənə, 100 min qrantı mənimsəyənə nə etdilər ki, bizə də nə edələr. Heç kəs cəzalandırılmayıb. Burada çox eybəcər işlər görüblər. 2 milyon az pul deyil. 2012-ci ilin may ayının 29-da Dilçilik İnstitutuna 2 milyon pul ayrılıb və onu da 2013-də, 2014-də yeyiblər, hələ deyəsən 2015-ci ilə də bir az qalıbmış. O qədər neqativ hallar baş verib ki, bunlar hamısı araşdırılmalıdır”- deyə bildirən İ.Abbasov hesab edir ki, AMEA rəhbərliyi bu məsələnin üstündən sükutla keçməməlidir.
İradə SARIYEVA
