Azərbaycan Gürcüstanın İstanbul Konvensiyasının ratifikasiyası ilə bağlı təcrübəsini öyrənir. Belə ki, Gürcüstan parlamentinin Gender bərabərliyi üzrə daimi şurasının üzvləri Azərbaycan nümayəndə heyəti ilə görüşüb.
Görüşdə Azərbaycanın İnsan Hüquqları üzrə Müvəkkil (Ombudsman) Aparatının nümayəndələri Aytən Tarverdiyeva, Elvin Hacıyev və digər şəxslər iştirak edib.
Avropa Şurasının Azərbaycan və Gürcüstandakı ofislərinin nümayəndələrinin də qatıldığı görüşdə İstanbul Konvensiyasının ratifikasiyası və qadınlara qarşı zorakılığın aradan qaldırılması məsələləri müzakirə olunub. Gürcüstanın konvensiyanı ratifikasiya edənədək keçdiyi yol və ölkədə gender bərabərliyinin təminatı üçün həyata keçirilən dəyişikliklər ətrafında da fikir mübadiləsi aparılıb.
Şuranın sədri Nino Tsilosani deyib ki, Azərbaycan nümayəndə heyəti Gürcüstanda qadınlara qarşı zorakılıqla mübarizə istiqamətində və gender bərabərliyi sahəsində dövlətin atdığı addımlar barədə ətraflı məlumatlandırılıb: “Biz bu sahədə qabaqcıl təcrübənin tətbiqi üçün Azərbaycanla çox yaxşı və dost münasibətləri nəzərə alaraq əlimizdən gələni etməyə hazırıq. Qonaqlara, həmçinin, İstanbul Konvensiyasının ratifikasiyasının gətirə biləcəyi dəyişikliklərin əhəmiyyəti barədə də məlumat təqdim etdik”.
Qeyd edək ki, Gürcüstan qadınlara qarşı zorakılığın qarşısının alınmasını nəzərdə tutan İstanbul Konvensiyasına 2014-cü ildə qoşulub və 2017-ci ildə onu ratifikasiya edib. Azərbaycan isə beynəlxalq sənədi hələ qəbul etməyib.
Azərbaycanın Gürcüstanın İstanbul Konvensiyasının ratifikasiyası ilə bağlı təcrübəsini öyrənməsi o deməkdirmi ki, Azərbaycan ailə dəyərlərimizə zidd olduğu dəfələrlə qeyd olunan bir konvensiyanı radifkasiya edə bilər?
Ekspertlər deyir ki, İstanbul Konvensiyası Azərbaycanın ailə dəyərlərinə, milli ailə institutuna ziddir və ölkəmizin bu konvensiyanı ratifikasiya edəcəyi əslində gözlənilən deyil. Ekspertlərin sözlərinə görə, uzun illərdir ki, beynəlxalq təşkilatlar Azərbaycana bu konvensiyanı qəbul etdirmək istəyir, lakin Azərbaycan haqlı olaraq onu ratifikasiya etməkdən imtina edir. Özünü “feminist” adlandırıb ölkəmizi qaralamağa çalışanların “əlini gücləndirməyə” xidmət edən İstanbul Konvensiyasının qəbul edilməsinin arzuedilməz olduğunu deyən ekspertlər hesab edir ki, Azərbaycan onu ratifikasiya etməyəcək. Ekspertlər qeyd edir ki, İstanbul Konvensiyası hətta Avropanın bir çox dövlətləri tərəfindən ratifikasiya edilməyib, Ermənistan belə onun ratifikasiyasına embarqo qoyub.
“...Hamılıqla İstanbul Konvensiyasına "YOX!" deyək”
Məsələyə münasibət bildirən müstəqil jurnalist, Əsgər Ailələrinə Dəstək İctimai Birliyinin sədri Mətanət Əsgərqızı “Bakı-Xəbər”ə şərhində “artıq illərdir ki, bu Konvesiya haqqında müxtəlif fikirlər səslənir. Araşdırmalar göstərir ki, bu, Qərbin çox çirkin bir layihəsidir. Qadınlara qarşı şiddətə və məişət zorakılığına qarşı mübarizə adı altında iş aparılsa da, bunun alt qatında çox çirkin niyyətlər gizlənib. 45 ölkənin siyahısına baxın, oralarda ailə dəyərləri nə dərəcə qorunur?
Konvensiya ilə bağlı ilk atılan addımlara diqqət etsək görürük ki, küçə yürüşləri, müxtəlif televiziya verilişlərində sərgilədikləri fikirlər heç də ailə dəyərlərinə xidmət etmir. Bəzi hallarda qadınlara qarşı şiddəti insan hüquqlarının pozulması və ayrıseçkilik forması kimi xarakterizə etsələr də, kökündə məhz ailə təməlinin qorunması durmur. Gələk Azərbaycanda İstanbul Konvensiyası ilə bağlı atılan addımlara. Azərbaycan bir müsəlman ölkəsidir və burada ailə, nəsil və kök məsələsi çox önəmlidir. Lakin İstanbul Konvensiyası çətiri alıtında çox hiyləgər bir plan gizlənir. Bir müsəlman ölkəsinin ailə dəyərlərinin itirilməsi dövlətin təməlinin laxlaması deməkdir. Bu ölkənin vətəndaşının vətənə olan sevgisini əlindən ala bilmədilər. Yumruq olub birləşdilər. Analar, qadınlar, bacılar cəbhəyə yola saldıqları kişilərdən torpağı geri almalarını istədilər. "Qadınlara qarşı şiddətə və məişət zorakılığına son" sözlərinin yanında bir "azadlıq" sözü də işlənir. Azərbaycan qadını azad deyilmi? Azaddı, amma indi bu azadlığı o küçəyə çıxan qadınlar daha başqa cür başa düşürlər. Biri özünü feminist adlandırır, digəri başqa bir söz icad edib. Araşdıranda görürsən bunların heç ailədən xəbəri yoxdu. Ata, qardaş, ər anlayışı bunlar üçün heçdi”.
M.Əsgərqızının sözlərinə görə, İstanbul Konvensiyası tərəfdarları qadın qətllərini gündəmə gətirsələr də, məsələnin kökündə cəmiyyətə mesaj ötürülür -“biz də varıq, biz burdayıq!”.
Ekspertin dediyinə görə, qəribəsi budur ki, bunların sıralarında jurnalistlər, Vətəndaş Cəmiyyəti nümayəndələri də var: “Gərəkli anda bunların təbliğatı ilə məşğuldular. Son zamanlar İstanbul Konvensiyasının Azərbaycanda ratifikasiyası ilə bağlı söhbətlər dolaşmaqdadır. Ermənistan kimi xəstə bir dövlət bu Konvesiyanı qəbul etməyib. Amma bizdə ziyanlı bir məsələnin artıq durmadan təbliğatı aparılır. Bəzən hər işıltını günəş saymaq lazım deyil. Milli Məclisdə bu məsələ müzakirəyə çıxarılarsa, deputatların içərisində kifayət qədər rus, qərb yönümlülər var. Onların sərgiləcəyi münasibətə görə də narahatam. Gözəl bilirəm, bir ölkəni çökdürə bilməyəndə xarici qüvələr belə layihələrə milyardlar xərcləyir. Məqsəd isə heç də qadınlara qarşı şiddət və məişət zorakılığı ilə mübarizə deyil. Televiziyalar da bu iyrənc layihəyə qoşulublar. Görürsüz, durmadan efirlərdə uğursuz ailələr təbliğ olunur. Kişinin arvadı qoşulub qaçıb, "qayıtsın, qəbul edərəm" deyir. Qadın milyonların içində ərinin xəyanətindən danışır. Bəs övladlar, onlar cəmiyyətdə xar olmurlarmı belə valideynləri var? Beləliklə, kiçik dövlət olan ailədə qopmalar baş verir. O ailələr axı dövlətin sütunlarıdır. Görürsüz, Qərbin planlaşdırdığı layihənin altında necə qorxunc faktlar durur. Bir qrup şəxsin Gürcüstana səfər etdiyini eşitdim. Məsələ məhz İstanbul Konvensiyasının tətbiqidir.
Belə ziyanlı məsələlərə nədənsə tez qol qoyuruq. Həmin şəxslər bilməlidir ki, qadınlara qarşı şiddətə və məişət zorakılığına işsizlik, savadsızlıq, imkansızlıq nə zaman aradan qalxacaqsa onda son qoyulacaq. Zamanı itirməyək. Məhz insanların firavanlığına yönəlik məsələlərə imza ataq. Qərbin belə layihələrinə, İstanbul Konvensiyasına isə hamılıqla "YOX!" deyək. Ailəmiz kiçik dövlətimizdir. Ailəmizi qoruyaq ki, böyük dövlətimiz olan Azərbaycanımızı qoruyaq!”
İradə SARIYEVA
