Paytaxtın köhnə binalarının (sovet hakimiyyəti dövründə inşa olunan) lift dərdi bitmir. Son illər rayon icra hakimiyyətləri tərəfindən binaların fasadları yenilənsə də, məhəllələrarası yollar yenidən qurulub, parklar salınsa da, liftlərin təmiri bu yenidənqurma prosesindən kənarda qalıb. Əksər binalarda liftlər fəaliyyətsizdir. Liftlərin sakinlərin anbar kimi istifadəsindən “xilas” edilməsinə baxmayaraq, bəziləri işləmir, bir qismi müəyyən mərtəbələrə qədər xidmət göstərir, bir sözlə, texniki vəziyyətləri qənaətbəxş deyil.
Baxmayaraq ki, Prezident İlham Əliyev “Çoxmənzilli binaların lift təsərrüfatının maddi-texniki bazasının möhkəmləndirilməsi ilə bağlı tədbirlər haqqında” sərəncam imzalayıb. Sərəncama əsasən, Bakı şəhərində istismar müddəti başa çatmış liftlər yenisi ilə əvəzlənməlidir. Bu məqsədlə Bakı Şəhər İcra Hakimiyyətinin tabeliyində olan “Lifttəmir” İstehsalat Birliyi tərəfindən Almaniyanın “Wittur Holding GMBH” şirkəti ilə müqavilə imzalanıb, yüzlərlə müasir lift alınaraq ölkəmizə gətirilib. Həmin liftlər 2019-cu ildən başlayaraq paytaxtın müxtəlif rayonlarında istismar müddəti başa çatmış köhnə liftlərin yerinə quraşdırılır. Ancaq bu hal bütün binalarda müşahidə edilmir. Belə ki, çoxmənzilli binalarda liftlərin yenilənməsi zamanı ayrıseçkiliyə yol verilib. Bakı Şəhər İcra Hakimiyyətinin xidmət dairəsində olan dövlət yaşayış fonduna aid binalardakı köhnə liftlər yenisi ilə əvəzlənir. Lakin sovetlər dönəmində tikilən, kooperativ binalar kimi tanınan çoxmənzilli yaşayış evlərinin liftlərində hər hansı yenilənmə aparılmayıb.
“Lift təsərrüfatının maddi texniki bazasının inkişafı ilə bağlı büdcədən vəsait ayrılsa da, bu sahədə problem hələ də yaşanır”
Sosial məsələlər üzrə ekspert Mayis Əliyev bildirdi ki, çoxmənzilli binaların, xüsusən də kooperativ binaların lift probleminin həll edilməsi sahəsində vəziyyət xoşagələn deyil: “Lift istismara yaramırsa, dəyişilməli, nəzarətedici orqan gəlib yoxlamalı və istifadəsini dayandırmalıdır. Bakıda keyfiyyətsiz liftlərin sayı həddən çoxdur. Təkcə köhnə deyil, yeni binalarda da liftlərin vəziyyəti qeyri-qənaətbəxşdir”.
Həmsöhbətimizin sözlərinə görə, Prezident İlham Əliyevin 2019-cü il 15 fevralda imzaladığı sərəncamla Azərbaycanın 12 şəhər və rayonunda 237 çoxmənzilli binanın lift təsərrüfatının maddi-texniki bazasını möhkəmləndirmək üçün dövlət büdcəsindən 40 milyon manat ayrıldı: “Lift təsərrüfatının maddi texniki bazasının inkişafı ilə bağlı büdcədən vəsait ayrılsa da, bu sahədə problem hələ də yaşanır”.
Günel CƏLİLOVA
