Havalar soyuduqca paytaxt sakinlərinin də istiliklə bağlı qayğıları artır. Hazırda Bakıda yaşayış binalarının bir qisminə istilik verilsə də, illərdir istilik üzünə həsrət qalan sakinlər də az deyil.
Məlumdur ki, “Azəristiliktəchizat” ASC noyabrın 1-dən ölkənin ucqar rayonlarında, noyabrın 15-dən isə Bakı və ətraf ərazilərdə qış rejiminə keçidlə bağlı binalara istilik verməlidir. Hətta “Azəristiliktəchizat” ASC-nin Abonent və müştəri xidmətinin rəisi Rafiq Əliyev bir neçə gün əvvəl mediaya açıqlamasında əvvəlki illərdəki kimi problemin olmayacağını dilə gətirib. Ancaq yayılan məlumatlara görə, “Azəristilikthizat” ASC “Azəriqaz”a olan borcunu ödəməyib. Bu səbəbdən də qazanxanalar borc ödənilənədək qazla təmin edilməyəcək.
Qeyd edək ki, hər il bu problem yaşanır. “Azəristiliktəchizat” ASC-nin “Azəriqaz” İstehsalat Birliyinə olan borcu üzündən hər il istiliyin verilməsi gecikdirilir. Belə olan halda əziyyəti çəkən sadə vətəndaşlar olur. Hər dəfə borc dövlət tərəfindən ödənilir.
Ruslan Əliyev: “Azəristiliktəchizat” Açıq Səhmdar Cəmiyyətinin bugünə 20 milyon manat borcu var”
“Azəriqaz” İstehsalat Birliyinin (İB) Baş direktoru Ruslan Əliyev bildirdi ki, “Azəristiliktəchizat” Açıq Səhmdar Cəmiyyətinin bugünə 20 milyon manat borcu var: “Borcun ödənilməsi üçün “Azəristiliktəchizat”a 1 həftə vaxt verilib. Vaxtın verilməsi vətəndaşları narahat etməmək, soyuqda qoymamaq üçündür. Bizim üçün vətəndaş məmnuniyyəti, vətəndaşın mənafeyi hər şeydən üstündür. Amma “Azəristiliktəchizat” verilən müddətdə borcu ödəməlidir. Noyabrın 15-dən qazanxanalara qaz verilib. Amma borc verilən müddətdə ödənilməsə, qazanxanalara qaz verilişi dayandırılacaq”.
Nüsrət Qasımov: “Azəristiliktəchizat” ASC-nin ləğv olunmasının məqamı çatıb, bu qurum da, köhnə istilik sistemi də bizə sovet dövründən miras qalıb”
Azad İstehlakçılar Birliyinin Kommunal məsələlər üzrə eksperti Nüsrət Qasımov bildirdi ki, “Azəristiliktəchizat”la bağlı problem hər il yaşanır: “Bu kimi problemlərin yaşanmaması üçün adıçəkilən qurum bağlanmalıdır. “Azəristiliktəchizat” ASC-nin ləğv olunmasının məqamı çatıb. Bu qurum da, köhnə istilik sistemi də bizə sovet dövründən miras qalıb. Hər mövsüm “Azəristiliktəchizat” ASC-nin elektrik enerjisinə, mavi yanacağa, suya olan borcu üzündən qışın oğlan çağında abonentlər istiliksiz qalır. Üstəlik, onların qazanxanalarının çoxu köhnədir və yaşayış binalarından uzaqdadır. İstilik o binalara gəlib çatanadək soyuyur. “Azəristiliktəchizat” ASC havanın temperaturu soyuduqca istilik temperaturunu da artırmalıdır. Amma çöldə hava nə qədər soyuq olsa da, mənzillərə verilən istiliyin temperaturu artmır. Ona görə də camaat mənzilə istiliklə yanaşı, elektrik qızdırıcıları qoşur. Ayın sonu isə “Azəristiliktəchizat” ASC keyfiyyətsiz istiliyə görə abonentlərdən pul istəyir. Bu zaman da bu qurumla abonent arasında dava düşür. Abonentlər keyfiyyətsiz istiliyə görə aylıq ödənişi etməkdən imtina edir, ödənişi gecikdirirlər. Nəticədə “Azəristiliktəchizat” ASC suya, qaza, elektrik enerjisinə görə ödənişi gecikdirir. Bu isə “Azəristiliktəchizat” ASC ilə “Azərsu”, “Azərnerji”, “Azəriqaz” arasında davaya səbəb olur. Sovetdən qalmış mirasdır, özünü doğrultmur, suya, işığa borcludur”.
Günel CƏlİLOVA
