Azərbaycan Milli Elmlər Akademiyasının (AMEA) bir çox strukturlarında qanun pozuntuları haqqında çox yazılıb, çox danışılıb. Bildiyimiz kimi, bir müddət əvvəl AMEA-nın Mərkəzi Nəbatat bağında daha dəhşətli bir hal üzə çıxarılıb. AMEA Rəyasət Heyəti Aparatının Daxili nəzarət və audit şöbəsinin apardığı yoxlamalar zamanı məlum olub ki, bağın ərazisində bir sıra qanunsuzluqlar baş verib. Məlum olub ki, bağın imkanlarından şəxsi maraqlar üçün istifadə olunub, bu quruma məxsus ərazidə iki qanunsuz ev inşa edilib. Hazırda bu tikililərin hüquqi yollarla sökülməsi üçün müraciət olunub.
AMEA-nın Mərkəzi Nəbatat bağında inşa edilən qanunsuz villaların sökülməsi prosesinə başlanılıbmı? Bu qanunsuz əməlləri törədənlərin cəzalandırılması istiqamətində hər hansı bir iş görülübmü?
“...Şikayət edilib, amma hələ ki, bir nəticə yoxdur”
Məsələ ilə bağlı AMEA-nın Mərkəzi Nəbatat bağı ilə əlaqə saxladıq. Mərkəzi Nəbatat Bağından sorğumuza cavab olaraq bildirdilər ki, Bağın direktor əvəzi Natiq Allahverdiyev iclasdadır: “Natiq müəllim iclasdadır. Amma suallarınıza cavab verə bilərik”. Qurumdan aldığımız məlumata görə, bağın ərazisindəki qanunsuz tikililər onun bura direktor əvəzi təyin edilməsindən çox-çox əvvəllər baş verib: “Bu qanunsuz tikililər yeni deyil, təxminən 1991-ci, 2017-ci illərdə inşa olunublar. Natiq müəllim bildirir ki, hazırda qanunsuz tikililərlə bağlı məsələ nəzarət altındadır. Bu barədə məlumat artıq AMEA rəhbərliyinə verilib. Bununla bağlı ölçünü AMEA-nın Rəyasət Heyəti götürəcək. Biz sadəcə onlara məlumat vermişik ki, bağın ərazisində bu cür qanunsuz hallar baş verib. Bununla bağlı şikayət edilib, amma hələ ki, bir nəticə yoxdur. Qeyri-qanuni tikinti tam dayandırılıb, amma hələ sökülməyib. Tikinti aparılmış yerlər nəzarət altındadır və hər gün ora baxış keçirilir ki, qanunsuz tikinti davam etdirilməsin. Amma qanunsuz tikililərin sökülməsi ilə bağlı heç bir addım atılmayıb. Tikililər sökülməyib”.
Mərkəzi Nəbatat bağından onu da bildirdilər ki, baş verənlərlə bağlı hər bir quruma şikayət təqdim edilib, artıq bu məsələyə qiymət verilməsi əlaqədar orqanların səlahiyyətindədir: “Yəqin ki, yaxın günlərdə şikayətlərimizin nəticəsi olacaq”.
Qanunsuz tikililərlə bağlı müvafiq cinayət işinin açılıb-açılmadığına gəlincə, “yox, cinayət işi açılmayıb, amma şikayət olunub. Natiq müəllim bu ilin oktyabr ayının 1-dən təyin olunub, bu işlər isə ondan çox-çox əvvəl baş verib. Amma proses tamamilə nəzarət altındadır” - deyə bağdan bildirdilər.
İradə SARIYEVA
