Son dövrlər müavinət və pensiyaların kəsilməsi ilə bağlı şikayətlərin sayı artıb. Bu şikayətlər əsasən ayrı-ayrı vaxtlarda əlilliyə görə pensiya almış və sonradan pensiyaları ləğv edilmiş şəxslərdən gəlir. Pensiya və müavinətləri kəsilən insanlar problemlərinin ictimailəşdirilməsinə və həll edilməsinə kömək göstərilməsi üçün redaksiyamıza da tez-tez müraciətlər ünvanlayırlar. Biz də “Bakı-Xəbər” qəzeti, baki-xeber.com və “Bakı-Xəbər” TV olaraq daim vətəndaş şikayətlərini diqqətdə saxlayırıq, ictimailəşdiririk.
Astara rayonundan redaksiyamıza müraciət edən II qrup hərbi əlil Babazadə Yusif Aslan oğlu da pensiyasının kəsildiyindən şikayət edir. Y.Babazadənin qeyd etdiyinə görə, 2015-ci ildən 2019-cu ilin fevral ayına qədər pensiya alsa da, həmin ilin fevralından sonra əlillik pensiyası kəsilib. Şikayətçi bildirir ki, pensiyasının kəsilməsi səbəbindən etdiyi şikayətlərə və müraciətlərə isə heç bir müvafiq qurum baxmır. Y.Babazadənin yazdığına görə, Naxçıvanda hərbi xidmətdə olub və əsgərlikdə olduğu vaxt ayağının baş barmağında problem yaranıb, nəticədə isə barmağı amputasiya olunub: “2015-ci ildə hərbi xidmətə getmişəm və 3 ay xidmət etdim. Xidmətdə olduğum müddətdə geydiyim hərbi batinka ayağımın baş barmağını qanqrena etdi. Yeriyə bilmirdim, məni müalicə üçün hərbi hospitala göndərdilər. Hospitalda da əməliyyat edib ayağımın baş barmağını kəsdilər. Digər barmaqlarım isə bükülmüş vəziyyətdədir. “Sən hərbi xidmətə yararsızsan” dedilər və məni hərbi xidmətdən tərxis edib evə göndərdilər. Mən ikinci qrup əlil kimi pensiyaya çıxdım və 4 il pensiya aldım. İkinci qrup hərbi əlil olmağıma və vəziyyətimin ağır olmasına baxmayaraq 2019-cu ilin fevral ayından sonra heç bir səbəb göstərilmədən pensiyam kəsilib. Şikayətlərim nəticəsiz qalıb və heç bir yerdən müraciətlərimə cavab ala bilmirəm. Pensiyamın hansı səbəbə görə kəsildiyini bilmirəm. Pensiyamın nə üçün kəsildiyinin səbəbini mənə deyən yoxdur. Baş barmağı kəsilən şikəst ayağım məni çox incidir, yeriyə bilmirəm. Heç bir yerdə işləyə bilmirəm, tamamilə işsizəm, gəlir yerim yoxdur. İki uşaq atasıyam. Pensiyam kəsilib. Bəs mən uşaqlarımı necə saxlayım? Vəziyyətim çox ağırdır. Sizdən çox xahiş edirəm ki, pensiyamın bərpa edilməsi üçün mənə köməklik göstərəsiniz. Ümidim sizədir”.
Şikayətçi bildirir ki, əlilliyini təsdiqləyən bütün sənədlərin olmasına baxmayaraq, səbəb göstərilmədən pensiyası kəsilib (şikayətçi sənədlərin surətini redaksiyamıza təqdim edib).
Y.Babazadə qeyd edir ki, atası Babayev Aslan Mütəllim oğlu Birinci Qarabağ Müharibəsi veteranıdır, II qrup əlildir.
Y.Babazadə redaksiyamıza 23 iyul 2015-ci il tarixində ona verilən Xəstəlik Şəhadətnaməsini (№840) də təqdim edib. Şikayətçinin Xəstəlik Şəhadətnaməsində onun problemi tamamilə öz əksini tapıb, ikinci qrup hərbi əlil olduğu və xəstəliyini hərbi xidmət dövründə qazandığı qeyd edilib.
Ümid edirik ki, əlaqədar qurumlar Y.Babazadənin probleminin tezliklə həll edilməsi və pensiyasının bərpası istiqamətində operativ addımlar atacaq.
İradə SARIYEVA
