Şəhid mayor Ramil Mərdan oğlu Ağayevin adı dağlar diyarı Lerik rayonunda böyük hörmət və ehtiramla çəkilir. İndi onun yaşadığı həyat yolu hər bir lerikli üçün şərəfdir, qeyrətdir, ucalıq zirvəsidir. Çünki Ramil Vətən, torpaq uğrunda şəhidlik zirvəsinə ucalıb.
Ramil Ağayev 20 dekabr 1984-cü ildə Lerik şəhərində dünyaya göz açıb. Uşaqlıqdan arzusu hərbçi olan bu Vətən sevdalısı orta təhsilini başa vurduqdan sonra, yəni 2002-ci ildə Heydər Əliyev adına Azərbaycan Ali Hərbi Məktəbinin Raket və Artilleriya Qoşunları və Artilleriya ixtisasını daxil olur, 26 iyun 2006-cı ildə həmin təhsil ocağını mükəmməl biliklə başa vurur.
Ramil canından artıq sevdiyi doğma Azərbaycana ləyaqətlə xidmət edir. İkinci Qarabağ müharibəsində isə Vətənin harayına birinci çatır, qəhrəmanlıqla döyüşür, düşmənin 12 tankını sıradan çıxardır və xeyli sayda canlı qüvvəsinə qan qusdurur. 8 oktyabr 2020-ci ildə Füzuli istiqamətində gedən döyüşlərdə qəhrəmancasına şəhid olur. Hazırda Lerik şəhərində sinəsinə baş qoyduğu torpağı Lerik camaatı özünə and yeri bilir.
İgid Vətən oğlu Ramil Ağayev ölümündən sonra dövlət tərəfində 3-cü dərəcəli “Rəşadət” ordeni, “İgidliyə görə”, "Vətən uğrunda", eləcə də “Füzulinin azad olunmasına görə”, "Cəbrayılın azad olunmasına görə" medallarına layiq görülür. Şəhid zabitin təltifləri ailə üzvlərinə verilib.
Zəfər ORUCOĞLU Azərbaycan Jurnalistlər Birliyinin üzvü
