Şamaxıda “Sakit göl” oteli – “Uşaq və ya böyük olmasından asılı olmayaraq 4 nəfərlik ailə Yeni ili bu oteldə qarşılamaq üçün 3760 manat ödəməlidir”
Pandemiyadan və qapanmalardan sonra yenicə dirçəlməyə başlayan turizm sahəsində daha aşağı qiymətlərin təklif olunacağı gözlənilirdi. Amma bunun əksi müşahidə olunur. Otel sahibləri, sanki pandemiyanın acığını turistlərdən çıxmağın qəsdinə durublar.
Artıq otellər Yeni il kampaniyalarına start verib. Otellərin təklif etdiyi qiymət isə ötən illərdən fərqlidir. Belə ki, Qəbələnin beş ulduzlu “Cenot Palace Hotel”inə bir nəfərin 8 gün, 7 gecəlik səfərinin qiyməti nə az, nə çox – 5150 avrodur. Burada 4 nəfərlik ailənin dincəlməsi 20600 avroya başa gələcək.
Şamaxıda yerləşən “Sakit göl” otelində 2 gecə 3 günlük 1 nəfərlik tətil 940 manatdan təklif olunur. Dekabrın 31-ni isə “Sakit göl”də sakit keçirmək mümkün olmayacaq. Yeni il gecəsində müştərilərə canlı musiqi və uşağlar üçün əyləncə təklif olunur. Uşaq və ya böyük olmasından asılı olmayaraq, 4 nəfərlik ailə Yeni ili bu oteldə qarşılamaq üçün 3760 manat ödəməli olacaq.
Elçin Rüstəm: “Ölkədə fəaliyyət göstərən otel və istirahət mərkəzləri yaranmış vəziyyətdən istifadə edib qiyməti birə-beş qaldırır”
Turizm sahəsi üzrə ekspert Elçin Rüstəm bildirdi ki, əvvəllər Yeni ili xarici ölkələrdə qeyd etməyə gedənlər çox olurdu: “Ancaq indi pandemiya ilə əlaqədar olaraq xaricdə dincəlmək üçün gedənlərin sayı azalıb. Bu səbəbdən də daxili turizm obyektlərinə üz tutanların sayı artıb. Ölkədə fəaliyyət göstərən otel və istirahət mərkəzləri də yaranmış vəziyyətdən istifadə edib qiyməti birə-beş qaldırırlar. Onu da qeyd edim ki, bayram öncəsi qış turizminin inkişaf etdiyi ərazilərdə fəaliyyət göstərən reytinqli otellərdə yerlər iki ay öncədən bron edilib. Turizm sahəsində tələbat çox olanda, erkən rezervasiyalarla ucuz yerlər tutulur. Sona doğru lüks yerlər qalır. Bu zaman qiymətdə bahalaşma hiss olunur”.
Həmsöhbətimiz onu da əlavə etdi ki, ölkədə Yeni ili keçirmək üçün otel və nömrələrin sayı azdır: “Orada fərqli büdcələrə malik olan otellər inşa olunsaydı, tələbat tam ödənilərdi. Çünki imkanı olmayanlar heç müraciət də etmirlər. Səbəb isə qiymətlərin baha olmasıdır. Bahalığın əsas səbəbi isə rəqabətin düzgün aparılmamasıdır. Otellərin sayı çox olarsa, qiymətlər avtomatik düşər. Otellərin sayının çox olması üçün isə sahibkarlar üçün güzəştli şərtlər ortaya qoyulmalıdır. Sahibkarlara güzəştli şərtlərlə otel inşa etməyə şərait yaradılarsa, həmin otellər tez zamanda tikilər. Sahibkarlar üçün indi yaşayış evi tikmək daha sərfəlidir, çünki pulunu öncədən alırlar. Bunun üçün də sahibkarları otel tikməyə, həm də aşağı büdcəli otellər tikməyə təşviq etmək lazımdır. Hazırkı qiymətlər reallığa uyğun deyil. Çünki həmin yerlərdə göstərilən xidmət ödənilən qiymətə müvafiq deyil. Yüksək səviyyəli xidmət göstərilməlidir ki, müştəri ödədiyi pula uyğun xidmət alsın və etiraz etməsin. Qiymət yüksək, xidmət isə aşağı səviyyədədirsə, o zaman bu, hər bir müştəridə narazılıq doğurur. Bu məsələ çox önəmlidir”.
Günel CƏLİLOVA
