Sumqayıt şəhər 12-ci mikrorayonda yerləşən 12 mərbəli, 96 mənzilli, əlil, qazi və şəhid ailələrinin yaşadığı bina 3 aydır isti su üzünə həsrət qoyulub.
Bina sakini Xəlilov Vüqar “Bakı-Xəbər”ə müaciət edərək bildirir ki, verilən isti suyun qiyməti qanunsuz olaraq qaldırılıb və sakinlər bu məbləği ödəyə bilmir: “Məlumat üçün bildirim ki, binanın açılışı 2012-ci il dekabrın 24-də olub. Bina açılanda isti suyun qiyməti 40 qəpik idi. İki ildir ki, qanunsuz olaraq, qiyməti 1.92 qəpiyə qaldırdılar. Keçən il bina olaraq 21 min manat borcumuz yarandı. Təbii ki, bu qədər artımı ödəyə bilmirdik. Bu səbəbdən də bizim isti suyumuzu kəsdilər. Məlum məsələ ilə bağlı televiziyalara müraiət etdik. İcra başçısı gəldi və borclarımızı bağladı. Başçı getdikdən sonra isə qiyməti yenidən qaldırdılar və bu dəfə suyun bir kubunu 2.90 qəpiyə satmağa başladılar. Bu ilin əvvəlində, Tarif Şurasının qərarı ilə suyun qiyməti qalxandan sonra yenidən qiyməti artırıb, 3.35 qəpik ediblər. Biz hamımız pensiyaya baxan insanlarıq. Bu qədər yüksək məbləği ödəyə bilmirik. Buna görə də yenidən 8 min manat məbləğində borc yığılıb. Borca görə 3 aydır isti suyu kəsiblər. Ailəmizi çimmək üçün onun-bunun evinə aparmalı oluruq. Ayağım protezdir və tez-tez tərləyir. Mən ayağımı yumağa su tapmıram. Buz kimi su ilə yuyunmaqdan xəstəlik tapmışıq. Bu qanunsuz qiymət artımına son qoyulmalıdır”.
“Sumqayıtistiliktəchizat” İdarəsinin Abonent və Müştəri Xidməti: “Bina sakinləri qiyməti bəhanə edib borcu ödəmirlər, onlara müraciət etmişik ki, bir az qənaətli istifadə edin”
Şikayətçi Vüqar Xəlilovun dedikləri ilə bağlı “Azəristiliktəchizat” ASC-nin “Sumqayıtistiliktəchizat” İdarəsinin Abonent və Müştəri Xidməti ilə əlaqə saxladıq. İdarədən bildirildi ki, qiyməti onlar yox, Tarif Şurası təyin edir: “2020-ci ildə bu bina sakinlərinin borcu yarandı və ödəmirdilər. İcra başçısı həmin məbləği öz üzərinə götürdü və hamısını ödədi. Hətta hər bir mənzili sayğaclada təmin etdi ki, bundan sonra problem yaşanmasın, hər kəs sayğacın yazdığı borcu ödəsin. Lakin vəziyyət olduğu kimi davam edir. Bina sakinləri qiyməti bəhanə edib, borcu ödəmirlər. Bina sakinlərinə müraciət etmişik ki, bir az qənaətli istifadə edin, sonra ödəyə bilməyəcəksiniz. Hətta bunun qarışılığında kobud cavab verənlər də olub. Heç olmasa az-az ödəniş etsinlər. Amma bunu da etmirlər”.
Günel CƏLİLOVA
