“Prezident İlham Əliyevin tapşırığı ilə Azərbaycanda Su strategiyası hazırlanır”. Bunu İqtisadiyyat nazirinin müavini Sahib Ələkbərov noyabrın 11-də Milli Məclisin Gənclər və idman, Əmək və sosial siyasət, Aqrar siyasət, Regional məsələlər, Təbii ehtiyatlar, energetika və ekologiya komitələrinin birgə iclasında gələn ilin dövlət büdcəsi zərfinə daxil olan sənədlərin müzakirəsi zamanı deyib.
Onun sözlərinə görə, strategiya 18 illik dövrü əhatə edəcək.
“Su sahəsində institusional dəyişikliklərə gedilməlidir. Suyun bir sahibi olmalıdır. Biz bununla bağlı təklif vermişik. Elə etməliyik ki, su məsələləri kompleks şəkildə həll olunsun. Məsələyə kompleks yanaşma olmasa, problemlər tam həllini tapmayacaq” - deyə nazir müavini bildirib.
“Su ehtiyatlarından səmərəli istifadə, eyni zamanda sudan təkrar istifadənin qarşısının alınması Su strategiyasında öz əksini tapıb”
Hazırlanan “Su strategiyası” ilə bağlı məlumat verən Ekologiya və Təbii Sərvətlər Nazirliyinin Su ehtiyatlarının idarə edilməsi şöbəsinin müdiri Mütəllim Əbdülhəsənov “Bakı-Xəbər”ə açıqlamasında qeyd etdi ki, 2020-ci ildə Prezident İlham Əliyev tərəfindən “Su ehtiyatlarından səmərəli istifadənin təmin edilməsinə dair 2020–2022-ci illər üçün Tədbirlər Planı” təsdiq edilib. Tədbirlər Planı çərçivəsində fəaliyyətlər müəyyən olunub: “Həmin fəaliyyətlərdən biri də su ehtiyatlarından səmərəli istifadənin təmin olunması ilə bağlı Milli Strategiyanın hazırlanmasıdır. Su Strategiyası aidiyyəti qurumların iştirakı ilə hazırlanıb. Hazırda sənədin təkmilləşdirilməsi həyata keçirilir. Təkmilləşdirilmədən sonra həmin sənəd hökumətə təqdim olunacaq”.
M.Əbdülhəsənovun sözlərinə görə, Azərbaycan su ehtiyatları nisbətən az ölkələr sırasında yer alır: “Su ehtiyatlarının respublika üzrə qeyri-bərabar paylanması bir çox regionlarda su çatışmazlığına səbəb olub. Bu baxımdan su hövzələrinin ekoloji probleminin təmin edilməsi ən vacib məsələlərdən biri hesab olunur. Dövlətin su siyasətinin məqsədi gələcək nəsillərin ehtiyacının təmin edilməsi, ölkədə iqtisadi potensialın qorunması, təbii ehtiyatlardan səmərəli istifadə olunmasıdır. Su strategiyasının hazırlanmasında məqsəd bu sahədə yaşanan mövcud problemləri qabartmaq, yerindəcə həll etməkdir. Ümumiyyətlə, hövzə şuralarının yaradılması, su ehtiyatlarının hövzə prinsipi ilə idarə olunması, çayların idarəedilmə planlarının hazırlanması və dövlət səviyyəsində tətbiq olunması qarşıda duran əsas işlərdən biridir”.
Həmsöhbətimiz onu da əlavə etdi ki, “Su strategiyası” ilə bağlı tədbirlər planı hazırlanıb: “Həmin tədbirlər planında əlaqədar qurumların məsuliyyəti və fəaliyyəti də əks olunub. Su ehtiyatlarından səmərəli istifadə, eyni zamanda sudan təkrar istifadənin qarşısının alınması adıçəkilən strategiyada öz əksini tapıb”.
Günel CƏLİLOVA
