Otuz il erməni işğalı altında qalmış Qarabağ və ətraf rayonlarımız yeni görkəm alır. Erməni vandalizminin izləri yavaş-yavaş silinir. Tarixi abidələr bərpa olunur, yeni yol-nəqliyyat infrastrukturu yaradılır, yüksəkgərginlikli elektrik xətləri çəkilir, yeni yarımstansiyalar inşa olunur.
Bu genişmiqyaslı prosesdə xarici ölkələrin şirkətləri də yaxından iştirak edirlər. Əlbəttə, Qarabağın bərpası təkcə Azərbaycanın deyil, bütövlükdə regionun iqtisadiyyatının mühüm tikintisi olacaq, regional əməkdaşlığın daha da güclənməsinə təkan verəcək.
Ölkə başçısı dəfələrlə öz çıxışında qeyd edib ki, 2021-ci ildə Azərbaycan xalqı və bütün dünya niyyətimizin həyatda öz əksini tapdığını, planlarımızın gerçəkləşdiyini görəcək. Şübhə yoxdur ki, Azərbaycanın ərazi bütövlüyünün təmin edilməsi xalqımızın çoxəsrlik tarixində mühüm yer tutur. Dövlət sərhədlərini bərpa edərək, Azərbaycan xalqı son əsrdə hərbi və diplomatik sahədə ən böyük qələbəni qazandı. Qələbəni əbədiləşdirmək üçün köçkünlərin yurdlarına qayıtması təmin ediləcək. Ən əsası, böyük bərpa prosesinin vətəndaşlarımızın işğaldan azad edilmiş ərazilərdə daimi məskunlaşmasında və bu ərazilərin ölkənin iqtisadi fəaliyyətinə daxil edilməsində mühüm körpü olacağı heç kimdə şübhə doğurmur.
Qeyd edək ki, işğaldan azad edilmiş ərazilərə vətəndaşlarımızın qayıtması imkanları və sayı ilə bağlı layihələr və dövlət proqramı hazırlanıb.
“İşğaldan azad olunmuş ərazilərdə yaşayış bərpa olunduqdan sonra məşğulluq prioritet məsələlərdən biri olacaq”
İqtisadiyyat naziri Mikayıl Cabbarov Milli Məclisin İqtisadi siyasət, sənaye və sahibkarlıq komitəsinin iclasında gələn ilin dövlət büdcəsi zərfinə daxil olan sənədlərin müzakirəsində çıxışı zamanı deyib ki, həmin ərazilərdə biz torpaq islahatlarına dəyişiklik edə bilərik, ya yox, qərar yoxdur: “İşçi müzakirələr Prezident Administrasiyasının da iştirakı ilə həyata keçirilir. Bununla bağlı yekun rəy odur ki, dəyişikliklər olmalıdır. İkinci məsələ isə burada iqtisadi fəallıqla sosial siyasət arasında düzgün balansın tapılması ilə bağlıdır. Burada problemin böyük hissəsi ondan ibarətdir ki, mülkiyyət sənədləri və olmayan sənədlərin müəyyənləşməsi məsələsi də var. Bu problem bu gün diqqət mərkəzindədir”.
İşğaldan azad edilmiş ərazilərə vətəndaşlarımızın qayıtmasının necə və hansı formada olacağı barədə fikir bildirən millət vəkili Vüqar Bayramov “Bakı-Xəbər”ə açıqlamasında qeyd etdi ki, Qarabağa qayıdış mərhələli şəkildə həyata keçiriləcək: “Bu ilin sonuna yaxın vətəndaşların öz yurdlarına mərhələli şəkildə qayıdışı gözlənilir. Ilk olaraq, Zəngilanda “Ağıllı kənd”ə vətəndaşların qayıtması baş tutacaq. Bütün bölgələrə vətəndaşların qayıdışı mərhələli və xüsusi qaydada həyata keçiriləcək”.
Millət vəkili onu da vurğuladı ki, işğaldan azad edilmiş ərazilərə qayıdacaq vətəndaşların işlə təmin olunma məsələsi də önəmlidir: “Məlumdur ki, həmin ərazilərdə yaşayanların kənd təsərrüfatı ilə məşğul olmaq imkanları geniş olacaq. Çünki nəzərə alaq ki, pay torpaqlarının verilməsi baş planda nəzərdə tutulub. Eyni zamanda “Ağıllı kənd” və “Ağıllı şəhər” konsepsiyasına uyğun olduğuna görə həm də emaledici sənaye olacaq. Həm kənd təsərrüfatı məhsullarının, həm də sənaye mallarının emalı həyata keçiriləcək. Bu da ərazilərimizdə yaşayacaq ixtisaslı kadrların işlə təmin olunması baxımından vacibdir. Ümumiyyətlə, işğaldan azad olunmuş ərazilərdə yaşayış bərpa olunduqdan sonra məşğulluq prioritet məsələlərdən biri olacaq. Yanaşma da ondan ibarətdir ki, ora qayıdan vətəndaşlarımız işlə təmin olunsun. Ona görə həmin ərazilərimizdə kifayət qədər yeni iş yerlərinin yaradılması gözlənilir”.
Günel CƏLİLOVA
