Masallı Dövlət Rəsm Qalereyasında rayonda fəaliyyət göstərən Rəhim Tağıyev adına Tarix – Diyarşünaslıq Muzeyinin birgə təşkilatçılığı ilə Vətən müharibəsinin ildönümünə həsr edilmiş “Qələbə ruhlu şəhidlərimiz” adlı sərgi təşkil olunubdur. Masallı Rayon İcra Hakimiyyətinin başçısı Şahin Məmmədovun, şəhid ailələrinin, müharibə iştirakçılarının, mədəniyyət işçilərinin və gənclərin iştirak etdiyi sərginin açılışı Vətən yolunda şəhidlik zirvəsinə ucalan qəhrəman oğlanların xatirəsinə ehtiram əlaməti olaraq bir dəqiqəlik sükutla anılmaqla başlandı.
Muzeyin direktoru, Əməkdar mədəniyyət işçisi, Azərbaycan Jurnalistlər Birliyinin üzvü Əntiqə Tağıyeva Masallı Regional Mədəniyyət İdarəsinin müvafiq tədbirlər planına uyğun olaraq növbəti sərginin təşkilində əsas məqsədin Vətən uğrunda canından keçən qəhrəman oğullarının əziz xatirələrini yaşatmaq, şəhid ailələrinə mənəvi dəstək, eləcə də yeni nəslə vətənpərvərlik ruhu aşılamaq olduğunu bildirdi.
Rayon icra hakimiyyətinin başçısı Şahin Məmmədov isə çıxışında dedi: - Ədalətli və müqəddəs 44 günlük Vətən müharibəsində yeni tarix yazan Vətən igidlərinin fədakarlığı sayəsində qazanılan Zəfərimizin əvəzolunmaz əhəmiyyəti vardır. Canını torpağa qurban verib şəhid olanlar gələcək nəsillərə rəşadət və qorxmazlıq məktəbini qoydular. Bu gün biz qalib ölkənin vətəndaşları kimi qürurluyuq ki, Ali Baş Komandanımız və Birinci vitse-prezidentimiz hər gün azad olmuş torpaqları ziyarət edir, abadlıq-quruculuq işləri istiqamətində yeni layihələr həyata keçirilir, ən əsası o əzəli torpaqlarda üçrəngli bayrağımızın əbədi olaraq dalğalanması üçün möhkəm təməl qoyurlar. Tam əminəm ki, rayonumuzun mədəni-maarif ocaqlarında bundan sonra da bu cür vətənpərvərlik mövzusundakı tədbirlərin təşkili davamlı olacaqdır.
Söz rayon ağsaqqallar şurasının sədri Ələşrəf Niftiyevə veriləndə o, vurğuladı ki, Ali Baş Komandan İlham Əliyevin rəhbərliyi altında Şanlı Ordumuzun cəsur əsgər və zabitləri canı-qanı bahasına Ermənistanın 30 il ərzində milyonlarla vəsait sərf edib qurduğu nəhəng istehkamlarını qəhrəmanlıqla yarıb keçməklə qazandıqları zəfərlə hərb tariximizə qızıl hərflər yazdılar.
Sərgidə Azərbaycan Rəssamlar İttifaqının üzvü Ehtiram Məmmədovun və rəssam Təhmasib Məcidovun şəhidlərə həsr etdiyi portretlər, o cümlədən Milli Qəhrəman general-mayor Polad Həşimovun, şəhid Xudayar Yusifzadənin xatirəsinə ithaf olunmuş rəsm əsərləri, Masallı şəhər 11 illik İncəsənət Məktəbinin şagirdlərinin, Uşaq İnkişaf Mərkəzinin dərnək üzvlərinin və Sevda Əliyevanın rəsm və əl işləri, eləcə də muzey fondunda qorunub saxlanılan şəhidlərə aid materiallar nümayiş olunur. Ümumiyyətlə, noyabrın 10-dək davam edəcək sərgidə 80-dən yuxarı sənət əsəri yer alıbdır.
Zəfər ORUCOĞLU Azərbaycan Jurnalistlər Birliyinin üzvü
