44 günlük Vətən müharibəsi zamanı azğınlaşmış ermənilər mülki əhalini hədəf aldılar. Onlar əlisilahlı hərbçilərlə deyil, sadə insanlarla, uşaqlarla, yaşlılarla müharibə aparmağa üstünlük verirdilər.
İkinci Qarabağ müharibəsi dövründə Ermənistan silahlı qüvvələri münaqişə zonasından və cəbhə xəttindən uzaqda yerləşən dinc şəhər və rayonlarımızı müxtəlif növ silahlarla, artilleriya və ballistik raketlərlə atəşə tutaraq, mülki əhalini və eləcə də infrastruktur obyektlərini hədəf seçərək, fərdi yaşayış evlərinə, sosial və iaşə obyektlərinə irimiqyaslı zərər vurub. Dəymiş ziyanın qiymətləndirilməsi və aradan qaldırılması məqsədilə Prezident İlham Əliyevin 6 noyabr 2020-ci il tarixli müvafiq Sərəncamı ilə yaradılmış Dövlət Komissiyası tərəfindən təşkil olunmuş fəaliyyət nəticəsində ümumilikdə 11 şəhər və rayon ərazisində 12 000-dən artıq obyektə baxış keçirilib, qiymətləndirmə və təmir-tikintinin ilkin planlaşdırılması işləri aparılır.
Qeyd etdiyimiz kimi, 44 günlük Zəfər müharibəsində mülki əhaliyə dəymiş ziyanın ödənilməsi ilə bağlı tapşırıq verilsə də, bu işdə ləngimələr qeydə alınır. 44 günlük Zəfər müharibəsi zamanı Ağdam rayonunda məcburi köçkünlər üçün salınmış Səfərli qəsəbəsində 33 evə zərər dəyib. Məsələ ondadır ki, həmin 33 evdən yalnız 11-i təmir olunub. Digərləri isə olduğu kimi qalır. Bundan əlavə, zərər dəymiş evlərə min manat pul ödənilməli olduğu halda, Səfərli qəsəbəsindəki zərər dəymiş evlərin sahiblərinə həmin pul da verilməyib.
Səfərli qəsəbəsində müharibə nəticəsində zərər görmüş evlərdən biri də Məmmədov Cavanşir Mustafa oğluna aiddir. Cavanşir Məmmədov bildirir ki, onun evini 3 dəfə çəkib, dəymiş zərəri hesablayıblar, ancaq təmir üçün gəlməyiblər: “5 oktyabr 2020-ci il tarixdə evimizin qarşısına mərmi düşdü. Mərminin qəlpələri dəmir listlərdən çəkilmiş hasarı yararsız hala saldı. Bundan əlavə, evin giriş qapısı, pəncərələr yararsız hala düşdü. Evdə bir neçə yerdə dərin çatlar da əmələ gəlib. Dövlət qurumları ayrıseçkilik edir. Qəsəbəmizdə 33 evə zərər dəyib, ancaq onun cəmi 11-ni təmir ediblər və yalnız onlara min manat pul veriblər. Hətta elə evlər var ki, bizim evdən az zərər görmüşdü, onlar təmir edilib, mənim evim yox. 3 dəfə müxtəlif qurumlardan gəlib yazıblar, 2 dəfə də çəkiliş apararaq qeydiyyata alıb, dəymiş zərərin miqdarını çıxarıblar. Bütün qurumlar gəlib ümid verib gedir, bir daha geri dönmür. Qurumlara etibar etmədiyimiz üçün evləri özümüz də təmir etmirik ki, sonra yalan danışdığımızı boynumuza qoyacaqlar. Ən son bir ay əvvəl gəlib çəkib, söz verdilər ki, problem həll olacaq, onlardan hələ də xəbər yoxdur. Nə o verilən pul, nə də təmir xərci heç bir məmurun cibindən çıxmır”.
“O şəxslərin evi öz günahlarından deyil, ermənilərin atdığı raket nəticəsində yararsız hala düşüb”
Müharibədən zərər çəkmiş evlərin nə səbəbdən bərpa olunmaması ilə bağlı fikir bildirən sosial sahə üzrə ekspert İlqar Hüseynli bildirdi ki, məlum problemin həll edilməsi ilə bağlı dövlət proqramı qəbul olunub: “Həmin evlərin təmir olunması və hər bir ailəyə 1000 manat pul yardımının edilməsi ilə bağlı Prezident İlham Əliyevin xüsusi göstərişi var. Ağdam rayonunun Səfərli qəsəbəsində 33 evdən 11-i təmir olunub, yerdə qalan 22-si olduğu kimi qalıb. Həmin evlərin nə səbəbdən təmir olunmaması araşdırılmalıdır. Evlərin təmiri üçün ayrılan vəsaitin taleyi müəyyən olunmalıdır. Həmçinin, hər bir ailə üçün ayrılan 1000 manatın nə səbəbdən onlara verilməməsi də aydınlaşdırılmalıdır.
Nəzərə almaq lazımdır ki, o şəxslərin evi öz günahlarından deyil, ermənilərin atdığı raket nəticəsində yararsız hala düşüb. Əhaliyə dəymiş ziyanın ödənilməsi ilə bağlı Prezidentin xüsusi göstərişi var. Aidiyyəti qurumlar insanları incitməzdən öncə Prezidentin sərəncamlarını, göstərişlərini xatırlasın”.
Günel CƏLİLOVA
