Emil Şahin oğlu Şıxəlizadə İkinci Qarabağ müharibəsində Vətən, torpaq uğrunda canından keçərək xalqın ürəyində özünə əbədi heykəl ucaltdı. İndi doğulub başa çatdığı Gərmətük qəsəbəsində elə bir ev olmaz ki, orada şəhid Emilin adı ilə qürur duyulmasın. Cismən insanların arasında olmasa da, harada bir günəş müqəddəsliyi var, onun sorağı oradan gəlir.
Şəhidin şərəfinə doğulduğu qəsəbədə bulaq kompleksi ucaldılıb. Onun açılış mərasiminə gələnlər Emilin Vətən sevgisindən qürurla söz açdılar. Çıxış edən Lənkəran ŞİH başçısı Taleh Qaraşov 44 günlük Vətən müharibəsində Vətən sevdalısı Emil Şıxəliyevin göstərdiyi şücaətdən geniş danışaraq onun qəhrəmanlığını əsl vətənpərvərlik məktəbi kimi hər bir gənc üçün örnək olduğunu xüsusi vurğuladı. Həm də şəhidin atası Şahinə Vətən üçün qəhrəman oğul yetişdirib cəbhəyə yola saldığına görə dərin hörmət və ehtiramını bildirdi.
Şəhidin atası Şahin isə dedi: - Oğlum Vətən naminə ən böyük ada, şəhidlik zirvəsinə ucaldı. İndi o, təkcə öz ailəsinin deyil, bütün Azərbaycan xalqın sevimlisinə çevrilmişdir. Odur ki, ömür yolu nə qədər qısa olsa da, şərəfli və örnəkdir. Bir ata kimi oğlumla fəxr edirəm. Təki Vətən sağ olsun! Həm də şəhid ailələrə göstərilən hərtərəfli diqqət və qayğıya görə ölkə Prezidenti cənab İlham Əliyevə və birinci vitse-prezident Mehriban xanım Əliyevaya minnətdarlıq edirəm.
Mərasimin sonunda məktəblilərin ifasında şəhidlərə həsr olunmuş ədəbi-bədii kompozisiya göstərildi, İcra başçısı və qonaqlar şəhidin xatirəsinə yaradılmış ev-muzeyi ilə yaxından tanış oldular. Zəfər ORUCOĞLU Azərbaycan Jurnalistlər Birliyinin üzvü
