44 günlük Vətən müharibəsi zamanı şanlı qələbəmizin əldə olmasında Yardımlı igidləri xüsusi hünər göstəriblər. Bu torpağın övladları Cavid Əlikömək oğlu Saratov və Amal Ədalət oğlu Qarayev də Azərbaycan naminə qəhrəmanlıq göstərərək şəhidlik zirvəsinə ucalıblar.
Cavid 1981-ci ildə Yardımlı rayonunun Əsədabad kəndində dünyaya göz açmışdı. 2000-ci ildə həqiqi hərbi xidmətə gedir, 2005-ci ildən gizir rütbəsi ilə tank komandiri vəzifəsində hərbi xidmətini davam edir. Vətəninə sədaqətli, vicdanlı xidmətinə görə “Azərbaycan Respublikasının Silahlı Qüvvələrinin 90 illiyi”, “Azərbaycan Ordusunun 95 illiyi”, və “Azərbaycan Ordusunun 100 illiyi” yubileyi, Qüsursuz xidmətə görə 3-cü, 2-ci dərəcəli medallarına layiq görülür. İkinci Qarabağ müharibəsində tank komandiri kimi vuruş meydanına atılır, Cəbrayıl rayonunun azad olunması uğrunda gedən döyüşlərdə canından keçir. Onun müharibə zamanı göstərdiyi hünər ölümündən sonra dövlət tərəfindən “Vətən uğrunda”, “Cəbrayılın azad olunmasına görə” “Cəsur döyüşçü” medalları ilə təltif edilir.
Vətənin qalib şəhid oğlu Amal 23 isə 2001-ci ildə rayonunun Ərus kəndində anadan olmuşdu. 2019-cu ildə ordu sıralarına xidmətə gedir. Vətən müharibəsində yağıya qan qusduran igid əsgər Füzuli, Cəbrayıl istiqamətində gedən döyüşlərdə Vətənin yaşaması naminə gənc ömrünü ona verir. Amalın qəhrəmanlığı dövlət tərəfində “Vətən uğrunda”, “İgidliyə görə”, “Füzulinin azad olunmasına görə”, “Cəbrayılın azad olunmasına görə”, "Şücaətə görə" və “Kəlbəcərin azad olunmasına görə” medallarına layiq görülür.
Hər iki şəhidin xatirəsinə inşa edilən bulaq kompleksinin açılışı oldu. Açılış mərasiminə Rayon İcra Hakimiyyətinin başçısı, Milli Məclisin deputatı, hüquq-mühafizə orqanlarının rəhbərləri, Səfərbərlik və Hərbi Xidmətə Çağırış üzrə Dövlət Xidmətinin Yardımlı rayon şöbəsinin rəisi, şəhid ailələri, qazilər, şəhidin hərbiçi yoldaşları, müəssisə və təşkilatlar, ictimaiyyət nümayəndələri və şəhidin yaxınları qatılmışdı. Vətənimizin bütövlüyü uğrunda canından keçən qəhrəman oğulların əziz xatirəsi bir dəqiqəlik sükutla yad edildi. Daha sonra Rayon İcra Hakimiyyətinin başçısı Ayaz Əsgərov çıxış edərək dedi: - Prezident, Ali Baş Komandan cənab İlham Əliyevin rəhbərliyi altında Şanlı Ordumuz 44 günə düşməni axırına çıxmaqla dünyanı heyrətə salan zəfər qazandı. Bu möhtəşəm qələbədə əməyi keçən şəhid Cavid Saratov, Amal Qarayev tarix yazdılar. Onların Vətən, torpaq naminə yaşadığı şərəfli ömür yolları həmişə bizlərə örnək olacaqdır. Möhtərəm cənab Prezident İlham Əliyev, Birinci vitse-prezident Mehriban Əliyeva şəhid ailələrinin, qazilərin, müharibə iştirakçılarının qayğılarını daim diqqət mərkəzində saxlayır, Vətən şəhidlərin, igid döyüşçülərin hünər yolu öyrənilir və onlar göstərdikləri şücaətlərə görə təltif olunurlar.
Zəfər ORUCOĞLU, Azərbaycan Jurnalistlər Birliyinin üzvü
