Bələdiyyələr tərəfindən qanunsuz torpaq satılması ilə bağlı məlumatlar yetərincədir. Növbəti belə fakt Ağstafa rayonunun Poylu kənd sakini Elxan Hacıyevin başına gəlib. Belə ki, E.Hacıyev dövlətin ona ayırdığı pay torpağının bələdiyyə tərəfindən başqa şəxsə satıldığını iddia edir:
“1997-ci ildə Ağstafa Rayon Aqrar İslahat Komissiyasının 17 nömrəli qərarı ilə ailə üzvlərimlə mənə pay torpaq sahəsi verilib. Həmin torpağın bir hissəsi Məhəmməd Məmmədov tərəfindən zəbt edilib. Mən bələdiyyəyə, İcra Hakimiyyətinə və məhkəməyə müraciət etmişəm. Hamısından cavab olaraq ərazinin Məhəmməd adlı şəxs tərəfindən zəbt edildiyini deyiblər. Hətta həmin şəxs məhkəmədə çıxış edən zaman torpağı zəbt etmədiyini, pulla bələdiyyədən aldığını dedi. Ümumilikdə 84 sot torpağımın 10 sotdan çoxu zəbt olunub. Əlimdə həmin ərazinin mənə aid olmasına dair rəsmi sənədlər var. Bilirəm ki, torpağımı bələdiyyə qanunsuz formada satışa çıxarıb”.
Ağstafa Rayon Bələdiyyəsi: “Elxanın adına olan bütün torpaqlar ona aiddir və heç kim tərəfindən zəbt edilməyib”
Elxan Hacıyevin iddiası ilə bağlı Ağstafa Rayon Bələdiyyəsindən bildirildi ki, sözügedən ərazi Poylu kəndi ərazisinə düşmür: “Elxan Hacıyevin nəzərdə tutduğu ərazidən arx keçir. Həmin arxın bir tərəfi Poylu, o biri tərəfi isə Kəsəmənli ərazisidir. Vətəndaşın iddia etdiyi ərazi bizim bələdiyyəyə aid deyilsə, biz onu necə satışa çıxara bilərik? Məhkəmə də qərar verib ki, həmin ərazi Məhəmməd Məmmədova aiddir. Elxanın adına neçə sot torpaq var. Adına olan bütün torpaqlar ona aiddir və heç kim tərəfindən zəbt edilməyib”.
Mayis Əliyev: “Bələdiyyələr tərəfindən qanunsuz torpaq satılması halları tez-tez baş verir”
Məsələ ilə bağlı fikir bildirən sosial sahə üzrə ekspert Mayis Əliyev qeyd etdi ki, bələdiyyələr tərəfindən qanunsuz torpaq satılması halları tez-tez baş verir: “Bu mövzu ilə bağlı şikayətlərin sayı-hesabı yoxdur. Hətta bir neçə bələdiyyə sədri qanunsuz əməlləri ilə bağlı həbs edilib. Yerli bələdiyyə torpağı satır, sənədi isə icra hakimiyyəti verir. Bax, belə hallarla bağlı məsələ rüşvət mexanizminə yol açır. Bələdiyyə seçkilərinin keçirilməsində şəffaflıq, nəzarət bir az da artırılmalıdır ki, orda təmsil olunanlar icra hakimiyyətlərinin istəyinə uyğun formalaşmasınlar. Bu da həmin bələdiyyələrin icra başçılarından asılılığına şərait yaradır”.
Günel CƏLİLOVA
