Paytaxtımızda mövcud olan park və bağların çox böyük əksəriyyəti yüksək səviyyədə yenidən qurularaq, təmir edilərək əhalinin ixtiyarına verilsə də, təəssüflər olsun ki, hələ də abadlaşdırılmamış parklara, bağlara təsadüf etmək mümkündür. Əsasən gözdən uzaq ucrar qəsəbələrdə bu kimi hallarla rastlaşmaq olur. Suraxanı rayonunun Qaraçuxur qəsəbəsində yerləşən və Uşaq parkı adlandırılan məkan hazırda olduqca pis vəziyyətdədir. Ətrafda yaşayan sakinlərin sözlərinə görə, park o qədər bərbad vəziyyətdədir ki, nəinki orada oturub isrirahət etmək, hətta keçib getmək belə mümkün deyil. Vaxtilə abad olan, uşaqların əylənməsi, valideynlərin istirahəti üçün hər bir şəraitə malik olan park indi unudulub. Sakinlərin bildirdiyinə görə, parkı abadlaşdırmaq, yaşıllaşdırmaq, uşaqların əylənməsi üçün şərait yaratmaq isə hələ ki, heç kəsin yadına düşmür, problem ictimailəşdikdən sonra bəlkə Uşaq parkını xatırlayıb onun dərdinə əlac tapan oldu.
Sakinlər deyir ki, Uşaq parkı Sovet dövründən qalıb, Qaraçuxur qəsəbəsinin mərkəzində yerləşsə də, yol üstə, göz qabağında olsa da, baxımsız və bərbad vəziyyətdədir. Uşaq parkı ilə bağlı redksiyamıza müraciət edən sakinlər parkın vəziyyətini, mənzərəsini əks etdirən fotoşəkillər də çəkib təqdim ediblər. Şəkillərə baxmaqla da parkın vəziyyəti ilə əyani şəkildə tanış olmaq olur.
“Parkın bərbad vəziyyəti, yaşıllıq guşəsinin baxımsız durumu qəsəbə sakinlərini narahat edir”
Sakinlər bildirir ki, Qaraçuxur qəsəbəsində iki park var, biri abad, o biri bərbad. Abad olan park Qaraçuxurda dövlət başçısının iştirakı ilə açılan Neftçilər parkıdır ki, bura abad və müasir vəziyyətdədir, uşaqların, böyüklərin istirahəti üçün hər cür şərait yaradılıb. Amma Uşaq parkı hansısa səbəbdən illərdir ki, diqqətdən kənarda qalıb, unudulmuş məkana çevrilib. Sakinlər bu barədə yazır: “Parkda ağaclar quruyur, yaşıllığa qulluq olunmur, ərazi zibillənir, mövcud olan yeganə hovuz dağınıq vəziyyətdədir, asfalt örtüyü bir çox yerdə yararsız hala düşüb, uşaq yelləncəkləri və digər əyləncə qurğuları sınıb, nasazdır. Qaraçuxurun mərkəzində yerləşən Uşaq parkının əsaslı şəkildə abadlaşdırılmasına, müasir park vəziyyətinə gətirilməsinə ciddi ehtiyac var. Park yenidən qurulmalıdır. Parkın bərbad vəziyyəti, yaşıllıq guşəsinin baxımsız durumu qəsəbə sakinlərini narahat edir, burada həm uşaqların, həm də gənclərin və yaşlı insanların mədəni istirahəti üçün lazımi şərait yaratmaq olar”.
Qaraçuxur sakinləri ümid edirlər ki, diqqətdən kənarda qalan Uşaq parkının vəziyyəti ilə bağlı məsələ ictimailəşdikdən sonra problemə Suraxanı rayon rəhbərliyi səviyyəsində reaksiya veriləcək. Çünki parkın vəziyyəti həqiqətən də acınacaqlıdır. Bu parkın yenidən qurulması, abadlaşdırılması sakinlərə böyük töhfə olardı. Sakinlər bildirir ki, parkın abad olmaması uşaqların normal istirahəti, əyləncəsi üçün çətinliklər yaradır, park abadlaşarsa bu çətinlik arxada qalar.
Biz də ümid edirik ki, Suraxanı rayon rəhbərliyi, qəsəbə icra nümayəndəsi, bələdiyyə bu həssas məsələyə diqqət yetirəcək, Uşaq parkını müasir səviyyədə abadlaşdırıb uşaqlarımızın ixtiyarına verəcəklər.
Mövzunu diqqətdə saxlayacağıq...
İradə SARIYEVA
