Vətənə sevgisi, düşmənə sonsuz nifrəti Lənkəran rayonunun Sütəmurdov kəndində dünyaya gəlmiş Rəşid Rəşad oğlu Məmmədova əbədi bir ömür qazandırdı. Gəlib-getdiyi yol cəmi 23 il çəkdi, amma Rəşidin igidliyi, mərdliyi böyük bir xalqın dilində dastana döndü.
İkinci Qarabağ müharibəsində canını 30 il düşmən əsarətində olan doğma torpağa fəda etməklə neçə-neçə gələn nəsillərə nümunə olacaq bir tarix yazdı. Bəli, Lənkəran elinin qəhrəman oğlu həyatını Azərbaycan üçün yaşadı və ona şöhrət olmağı bacardı. Alovlu Vətən sevgisinə görə dövlət də Rəşidi “Vətən uğrunda” medalına layiq gördü.
Elinə, yurduna ürəkdən bağlı, qurub-yaratmaq eşqli, həyatının mənasını xalqına gərək olmaqda görən, məhəbbət soraqlı günlərə tapınan Rəşid Məmmədov 2015-ci ildə hərbi xidmətə gedir və Bakı şəhərində Azərbaycan Sülhməramlı Qüvvələrində rabitəçi olur. Vətənin qeyrətini üstün tutmaqla, Qarabağın azadlığını düşünməklə vəzifəsini mükəmməl yerinə yetirir, eləcə öyrənməkdən də qalmır. Zabitlərin, əsgərlərin hörmətini qazanan Rəşidi xidmət etdiyi yerdə mənəvi cəhətdən zəngin, Vətənini, torpağını canından artıq sevən, dövlətinə, xalqına sədaqətli, etibarlı vətəndaş bilir, onun cəsurluğunu, igidliyini, mərdliyini örnək sayırlar. Hər dəfə işğal altındakı torpaqlar xatırlananda Rəşidin ən çox işlədiyi kəlmələr belə olur: “Vətəni qorumaqdan, məqamında onun yolunda canından keçməkdən müqəddəs iş yoxdur”.
Rəşidin Vətənlə, torpaqla bağlı arzuları Tanrıdan gəlirdi. Məhz buna görə də onu ən çox narahat edən düşmən tərəfindən Qarabağın ədalətsiz işğalı idi. Bu amalla ürəyindəki qarşısıalınmaz istək onu yenidən ordu sıralarına aparır. Xüsusi kurslarda keçirilən təlimləri müvəffəqiyyətlə başa vurur. MAXE kimi Vətəninin keşiyində durmaqla, düşməndən qisas alacağı günü gözləyir . 27 sentyabrda istəyinə çatır. Köksündə qəhrəman ürəyi daşıyan igid Vətən müharibəsinin ilk günündə erməni faşistlərə qarşı haqq savaşına başlayır.
Torpaq naminə Rəşidin döyüş yolu ağır müharibə meydanlardan keçir. Füzuli uğrunda edən döyüşlərdə xüsusi qəhrəmanlıq göstərir. Hər qarış torpaq uğrunda can qoyur, böyük sayda erməni zabitinin, əsgərinin, tanklarının axırına çıxır. Ağır savaşlarda düşmənə qan udduran igidimiz 29 oktyabr 2020-ci ildə şəhid olur.
Vətənini yaşatmaqla zəfər tariximizdə şərəfli bir ad qoydu Rəşid. Özü dünyadan getsə də, əməllərinin işığından ömürlərə nur gəlir. Bu ölməz hünərinə görə Lənkəran camaatı Rəşidlə qürur duyur, hər yerdə, hər zaman xatirəsini uca tutur.
Zəfər ORUCOĞLU
Azərbaycan Jurnalistlər Birliyinin üzvü
