İstifadə müddətini çoxdan başa vurmuş yataqxanalar ölkə ərazisində yetərincədir. Bu tip yataqxanaların yanından ötəndə adamı qaramat basır. Uçuq-sökük binalar, köhnə, qaralmış taxta parçaları ilə ətrafları sarılan eyvanlar və s…Demək olar ki, ömrünü çoxdan başa vurmuş sovetdənqalma binalar artıq "kliniki ölüm” keçirib. Sadəcə, süni nəfəs aparatına qoşulub ki, məcburən bioloji ömrü uzansın. Bu yataqxanalardakı yaşayışı həyat saymaq, sadəcə, mümkün deyil. Danılmaz faktdır ki, bu tip binalarda yaşayanların həyatı risq altındadır.
Belə “ölü” yataqxanalardan biri də Sumqayıt şəhəri 15-ci məhəllə adlandırılan ərazidə yerləşən yataqxanadır. Sumqayıtda yataqxana sakinlərinin həyatı təhlükədədir.
Məlumat üçün bildirək ki, qəzalı vəziyyətdə olan bina Sumqayıt Dövlət Universitetinin (SDU) balansındadır.
Sakinlər bildirir ki, yataqxana illərdir qəzalı vəziyyətdədir: “Yataqxanada qaz, su və işıq xətləri yararsız haldadır. Binanın sağ və sol sütun əsas divarlarında çökmə olub. Hələ 2019-cu ildə Fövqəladə Hallar Nazirliyinin ekspert rəyi əsasında yataqxananın sökülməsi qeyd edilib. Qəzalı olduğu təsdiqlənib. Lakin artıq illərdir heç bir tədbir görülmür. Yataqxana sakinləri olaraq istəyimiz budur ki, aidiyyəti qurumlar ya binanın təmir olunmasını, ya da sökülüb yenidən tikilməsini həyata keçirsinlər. Hər gün təhlükə ilə üz-üzə yaşayırıq”.
“Yataqxananın qəzalı vəziyyətdə olduğuna və ya əsaslı təmir edilməsi ilə bağlı bizə heç bir rəy və tapşırıq verilməyib”
Məsələ ilə bağlı Sumqayıt Dövlət Universitetinin mətbuat xidmətindən bildirildi ki, sözügedən yataqxana binası 1993-cü ilə qədər Texniki Peşə Məktəbi kimi fəaliyyət göstərib: “1993-cü ildə həmin binaya məcburi köçkünlər yerləşdirilib. Artıq 1995-ci ildən etibarən məcburi köçkünlər binada yaşaya-yaşaya yataqxana universitetin balansına verilib. 2018-ci ildə yataqxanada yaşayan məcburi köçkünlər dövlət tərəfindən qeydiyyata alınıb və evlə təmin ediliblər. Lakin hazırda orada yaşayanlar şəhər sakinləridir. Onlar o dövrdən yataqxanada boş olan mənzillərdə məskunlaşıb yaşayanlardır. Amma onların köçürülməsi məsələsinə biz baxmırıq. Şəhər sakinlərinə köçürülmə və ev istəkləri ilə bağlı aidiyyəti üzrə digər qurumlara müraciət etmələri tövsiyə edilir. Hazırda binada əsaslı təmir-bərpa işlərinin aparılmasına dair rəy yoxdur. Binanın qəzalı vəziyyətdə olması məsələsinə gəlincə isə, Fövqəladə Hallar Nazirliyinin müvafiq rəyinə dair bizdə məlumat yoxdur. 1 saylı yataqxana ilə bağlı müvafiq rəy verildi və binanın əsaslı təmir-bərpa işlərinə başlanıldı. İlin sonuna qədər işlərin tam yekunlaşması planlaşdırılır. Lakin 2 saylı yataqxananın qəzalı vəziyyətdə olduğuna və ya əsaslı təmir edilməsi ilə bağlı bizə heç bir rəy və tapşırıq verilməyib. Belə bir rəy olarsa, təbii ki, balansımızda olan 2 saylı yataqxananın da təmir işlərinə başlanılacaq”.
Günel CƏLİLOVA
