Dünyanın bəlasına çevrilən narkotik, xüsusən gəncləri hədəfə alıb və onları fiziki-mənəvi cəhətdən məhv edir. Narkotik vasitələrin yeni-yeni çeşidləri meydana çıxır, istifadəçiləri, alqı-satqısı ilə məşğul olanlar da çoxalır, narkomaniya qurbanlarının sayı durmadan artır.
Narkomaniya təhlükəsi artdıqca dövlət qurumları öz fəaliyyətini daha da genişləndirir, narkomaniya ilə mübarizə sahəsində effektivliyi daha da artırır. Heç şübhəsiz, Azərbaycanda narkomaniya ilə mübarizə sahəsində mütəşəkkil mübarizə tədbirləri həyata keçirilir. Azərbaycan dünyada narkomaniya ilə sistemli, ardıcıl mübarizə aparan, mübarizə üsullarını günü-gündən təkmilləşdirən azsaylı ölkələrdəndir. Deyərdik ki, dünyanın çox ölkəsində bu məsələyə elə də ciddi diqqət yetirilmir, ölkə gəncliyinin taleyi Allah ümidinə buraxılıb. Azərbaycanda isə bu məsələyə ciddi, sistemli yanaşılır və indiyə qədər dövlət səviyyəsində bu istiqamətdə çoxsaylı proqramlar həyata keçirilib.
Gənclərin fiziki-mənəvi sağlamlığının təmin edilməsi baxımından naromaniya ilə mübarizə sahəsində daha nələr etmək lazımdır?
“Maarifləndirmə işləri narkotik istifadəçisi olmayan insanlarla yanaşı, narkotik istifadəçisi olan şəxslər arasında da aparılmalıdır ki...”
AİDS-lə Mübarizə İctimai Birliyinin sədri Nofəl Şərifov “Bakı-Xəbər”ə bildirdi ki, narkomaniya ilə mübarizə sahəsində indiyə qədər Azərbaycanda sistemli işlər görülüb və proses bu gün də davam etdirilir. N.Şərifov hesab edir ki, bu sahədə ən çox tələb olunan məsələ maarifçilik tədbirlərinin daha da gücləndirilməsidir: “Maarifləndirmə işlərinin gücləndirilməsi, maarifçilik üsullarının genişləndirilməsi lazımdır. Yəni narkotik istifadəçilərinin çəkilib televiziyaya verilməsi ilə iş bitmir. Bu, işin bir tərəfidir. Bu gün jurnalistlər bizə müraciət edirlər ki, narkomanları çəkməyimizə şərait yaradın. Narkomanların çəkilib televiziyaya verilməsi bəzən müsbət reaksiya doğurmur. Bir az narkotik istifadəçilərinin hüquqlarının müdafiə edilməsi də lazım gəlir. Onları xəstə kimi təqdim etmək düzgün deyil. Onlara bir qədər toletant yanaşılmalıdır. Bu gün vəziyyətdən çıxış yolu kimi blogerlərin, tanınmış din xadimlərinin maarifçilik işinə cəlb olunması daha yaxşı olardı”.
Azərbaycanda narkomaniya ilə mübarizə sahəsində sistemli mübarizə tədbirlərinin davam etdirilməsinin nəticəsiz olmadığını deyən N.Şərifovun sözlərinə görə, bu proqramlardan bəhrələnib narkotiklə vidalaşanlar, sağalanlar da olub. “Təbii ki, görülən işlərin effekti olur. QHT nümayəndələri müəyyən işlərin görülməsində iştirak edirlər. Həmçinin narkotik istifadəçiləri arasında infeksion yoluxmaların qarşısının alınmasına da diqqət yetirilməlidir. Məsələn, Hepatit C, SPİD kimi xəstəliklərin yayılmasının qarşısı alınmalıdır. Ümumiyyətlə, maarifləndirmə işləri narkotik istifadəçisi olmayan insanlarla yanaşı, narkotik istifadəçisi olan şəxslər arasında da aparılmalıdır ki, özlərində olan xəstəlikləri digər insanlara yoluxdurmasınlar.
Narlotiklə mübarizə sahəsində dövlət tərəfindən həyata keçirilən müəyyən proqramlar da var. Məsələn, əvəzedici müalicə deyilən bir proqram var, narkotik istifadəçiləri o proqrama cəlb olunur, orada müalicə olunurlar. O proqramın effektliliyini gördülər və onu genişləndirmək istəyirlər. Bu istiqamətdə çoxlu işlər görülür”-deyə N.Şərifov qeyd etdi.
İradə SARIYEVA
