Distant təhsil rəsmən ləğv olundusa....Tam qapanmaların bir daha olmayacağı qənaətinə gəlmək olarmı?...

img

Azərbaycanda distant təhsil tələbi ləğv edilib və əyani təhsilə keçid müəyyən edilib. Bu barədə Nazirlər Kabinetinin "Xüsusi karantin rejimi dövründə Azərbaycan Respublikasında fəaliyyət göstərən təhsil müəssisələrində tədris və təlim-tərbiyə prosesinin təşkilinin müvəqqəti Qaydaları”nda edilən dəyişikliklərlə bağlı Qərara verdiyi izahda bildirilir.

Ölkəmizdə distant təhsil tələbi rəsmən ləğv olunubsa və əyani tədrisə keçid təsdiqlənibsə, belə çıxırmı ki, daha koronaya yoluxma təhlükəsi yoxdu və qapanmaya gedilməyəcək?

Mütəxəssislər qeyd edir ki, ümumiyyətlə, bu qərarın verilməsi yoluxma risqinin aşağı olduğu demək deyil və zərurət olarsa hər an qapanmaya getmək mümkündür. Onların bildirdiyinə görə, orta məktəblərin ibtidai siniflərində tədris iki gündür başlayıb və proses ciddi nəzarət altındadır. Ekspertlərin fikrincə, orta və ali məktəblərdə tədrisin əyani şəkildə bərpası yoluxma dinamikasının artmasına səbəb olacaq.

  • Pərvanə Vəliyeva: “Əlbəttə, COVID-19-a yoluxma halları yenə də...”

Sağlamlığa Xidmət İctimai Birliyinin icraçı direktoru Pərvanə Vəliyeva “Bakı-Xəbər”ə bildirdi ki, bu qərarın ləğvi heç də COVID-19-un bitdiyinə və qapanmaya gedilməyəcəyinə dəlalət etmir: “Əlbəttə, COVID-19-a yoluxma halları yenə də var, və bu, məktəblərdə də istər uşaqlar, istərsə də müəllim heyəti arasında aşkarlana bilər”.

  • Vüsalə Ağabəyli: “Qərarın verilməsi onu göstərir ki, daha qapanma olmayacaq və tədris əvvəlki illərdəki kimi əyani formada davam edəcək”

Filologiya üzrə fəlsəfə doktoru, dosent Vüsalə Ağabəylinin sözlərinə görə, Nazirlər Kabinetinin son qərarına əsasən ölkəmizdə distant təhsil tələbi tam ləğv olunub. “Amma burada müəmmalı məqamlar var ki, ümumiyyətlə distant təhsil Azərbaycanda heç mövcud da deyildi. Təhsil forması olaraq yalnız adı var idi. Distant təhsilin nə hüquqi bazası yaradılmışdı, nə vəsaitləri, proqramları, metodiki göstəriciləri və sair hazırlanmışdı. Bunlar olmaya-olmaya sadəcə adını distant təhsil qoymuşdular. Belə düşünürəm, çox güman ki, bundan sonra da yaratmayacaqlar. Ləğv edilən distant təhsil deyil, pandemiyaya görə vəziyyətdən çıxış yolu kimi seçilmiş məsafədən nəzərdə tutulan onlayn təhsildir. Bu da əslində heç distant təhsil adını əvəz etmirdi. Düşünürəm ki, bunun adı yanlış seçilmişdi. Bir bu, bir də dərsə könüllülük prinsipi ilə getmək ləğv olundu. Bu tədris ilindən tam şəkildə ənənəvi tədris formasına qayıtdıq. Qərarın verilməsi onu göstərir ki, daha qapanma olmayacaq və tədris əvvəlki illərdəki kimi əyani formada davam edəcək, qərarda bu proqnozlaşdırılır. Digər tərəfdən isə TƏBİB-in, eləcə də baş infeksionistin açıqlamalarında tamam başqa proqnozlar görürük, yoluxmanın artacağı proqnozlaşdırılır. Deyirlər ki, gedişatdan asılı olaraq proses dəyişə, qapanma da baş verə bilər. Bu kimi açıqlamalar da olur ki, ənənəvi tədris zamanı yoluxma artarsa tədrisdə hibrid formaya da keçilə bilər”.

Hibrid təhsilalma formasının da özünü doğrultmadığını deyən V.Ağabəylinin sözlərinə görə, tədrisin bir hissəsini auditoriyada, bir hissəsini isə onlayn şəkildə təşkil etmək həm tədris müəssisələrində, həm şagird və tələblərdə, həm də müəllimlərin qrafikində ciddi problemlər yaratdı. V.Ağabəyli hesab edir ki, bununla bağlı konkret proqnoz da vermək mümkün deyil...

İradə SARIYEVA

Son xəbərlər