22 sentyabr Azərbaycanın çoxmilyonlu təhsil ictimaiyyətinin bayramıdır. Ölkəmizdə yeni dərs ili başlayır. Bu gün məktəb həyatına qədəm basan birincilər üçün səbirsizliklə, sevinc və həyəcanla gözlənilən, xüsusi qayği və məmnuniyyətlə, təntənəli şəkildə qarşılanacaqları bir gündür. Onlar əlifba ilə tanış olub, kitablar oxuyub , şeirlər əzbərləyəcək və beləcə, ilk zəngin sədası ilə yeni həyata-məktəb həyatına qədəm qoyacaqlar.
Bu əlamətdar gün Bakının Binəqədi rayonu 246 №-li məktəb-liseyində də qeyd edilmişdir. Tədbir dövlət himninin səsləndirilməsi ilə başlayıb. Tədbiri giriş sözü ilə açan məktəbin direktoru, riyaziyyat üzrə fəlsəfə doktoru dosent Nəbi Mahmudov, valideynləri, pedaqoji kollektivi və qonaqları salamlayaraq, onlara yeni tədris ilində uğurlar arzulayıb. O,ölkəmizdə aparılan təhsil islahatlarından, təhsilə göstərilən diqqət və dövlət qayğısından danışaraq, təhsilə göstərdikləri qayğıya görə Prezident İlham Əliyevə və ölkənin birinci xanımı, Heydər Əliyev Fondunun prezidenti Mehriban Əliyevaya dərin təşəkkürünü bildirib.Yeni dərs ili ünasibətilə şagirdləri və pedaqoji kollektivi təbrik edən qonaqlar ilk dərs gününün təəssüratlarını bölüşüblər. Şagirdlər vətənpərvərlik mövzusunda şeirlər söyləyib, mahnılar oxuyublar. Məktəbin təlim-tərbiyə işləri üzrə müdiri Reyhan Məhərrəmova və Fatma Əliyeva birincilərə məktəbə atdıqları ilk addımlarının uğurlu olmasını diləyib, onların valideyinlərini ürəkdən təbrik etdilər. Ölkədə təhsilin uğurla inkişaf etdiyini söyləyən Reyhan Məhərrəmova vurğulayıb ki, 246 saylı məktəb-lisey bu yolda özünə əsas prioritet istiqamət kimi azərbaycançılıq məfkurəsinin yaşadılmasını, milli-mənəvi dəyərlərin qorunmasını, adət-ənənələrin nəsildən-nəslə ötürülməsini, vətənpərvərliyin aşılanmasını və zamanla ayaqlaşan insan kapitalına faydalı vətəndaşların yetişdirilməsini seçib.
Qeyd edək ki, bu il adı çəkilən məktəbin 53 məzunu tələbə adına layiq görülüblər, dörd nəfər isə xarici ölkələrdəki ali məktəblərə yüksək ballarla daxil olublar. 10 nəfər 600 bal, 2 nəfər isə 600-dən yuxarı bal toplayıb.
Sonda I F sinfinin şagirdləri Banu Əliyeva və Məmmədəli Əliyev məktəbin ilk zəngini çaldı və bütün birinciləri bu səslə məktəbə səslədi.
Leyla QARAXANLI
