Buzovna-Bilgəh yolu piyada canları alan məkana çevrilib, çarə tapılmır…

img

Paytaxtın Buzovna-Bilgəh yolunda sürət həddinin yüksək olmasına baxmayaraq, piyada keçidləri çox uzaqdadır. Vətəndaşlar dəmir arakəsmələrin üzərindən keçməklə qarşı yola çıxırlar. Nəticədə də bu ərazidə tez-tez piyadaların vurulması ilə nəticələnən qəzalar baş verir.

Saatda 120 kilometr sürət tətbiq edilən yolda vətəndaşlar qarşı tərəfə qeyd etdiyimiz üsulla keçirlər. Sözügedən ərazi paytaxtın Xəzər rayonu,  Buzovna-Bilgəh yolunun Buzovna qəsəbəsinə giriş hissəsidir. Ərazidə yaşayan sakinlər deyir ki, əvvələr bu yolda piyada zolağı olub. Ancaq sonradan piyada zolağı silinərək yol dəmir arakəsmələrlə bağlanıb.

Ərazidə yaşayış evlərinin və məktəbin olması isə qəza rısqını daha da artırır. Bununla yanaşı, yolun hər iki tərəfində avtobus dayancağı da qoyulub. Avtobusdan düşən sərinişinlər yolu keçməkdə çətinlik çəkir. Elə bunu sürücülər də etiraf edir.

Bilgəh yolunda piyadaların vurulması çox ciddi narahatlıq doğurur.

Qeyd edək ki, həmin ünvanda məlum səbəbdən piyada vurulması faktı qeydə alındı. Həmin ərazidə yaşayan sakinlər piyadaların vurulmasına etiraz olaraq qeyd olunan ünvanda təhlükəsizlik qaydalarının tətbiq edilməsini istəyiblər.

  • Vaqif Əsədov: “Həmin ərazidə yeraltı və yerüstü piyada keçidinin inşa edilməsi ilə bağlı məsələ qaldırılıb”

Məsələ ilə bağlı Bakı Şəhər Dövlət Yol Polisi İdarəsinin bölmə rəisi, polis polkovniki Vaqif Əsədov bildirdi ki, həmin ərazidə yeraltı və yerüstü piyada keçidinin inşa edilməsi ilə bağlı məsələ qaldırılıb: “Lakin çətin olsa da, məsələ həllini tapana qədər Bilgəh sakinləri təhlükəsizlik üçün hazırkı piyada keçidindən istifadə etməlidirlər. Sakinlərə müraciət edirik ki, təhlükəsizliklərini qorumağa çalışsınlar. Yolu keçərkən ehtiyatlı olsunlar. Yaxınlaşmaqda olan nəqliyyat vasitəsinin qarşısından qaçaraq sürücünü çaşdırmasınlar. Sürücülərə isə bildiririk ki, Hava Limanı istiqamətindən Mərdəkan-Buzovna istiqamətinə gedərkən sürət həddini minimuma endirsinlər. Son günlər paytaxt ərazisində piyadaların vurulması halı qəzaların 54,6 faizini təşkil edir. Bu, çox ciddi narahatlıq yaradır”.

  • Mais Ağayev: “Bir neçə ay öncə bu yolda sürət həddinin endirilməsi ilə bağlı DYP-yə təklif verdik, lakin…”

Bakı Nəqliyyat Agentliyinin (BNA) mətbuat xidmətinin rəhbəri Mais Ağayev bildirdi ki, bir neçə ay öncə bu yolda sürət həddinin endirilməsi ilə bağlı Dövlət Yol Polisinə (DYP) təklif veriblər, lakin qəbul edilməyib: “Bir neçə küçə və prospektdə, o cümlədən Zuğulba yolunda mövcud sürət həddinin endirilməsi ilə bağlı təkliflər verdik. Məqsəd, məhz sakinlərin də dediyi kimi, yolun yaşayış massivlərindən keçməsi və hərəkət təhlükəsizliyinin artırılması idi. Lakin təəssüf ki, DYP tərəfindən bu təklif dəstəklənmədi və imtina cavabı gəldi”.

M.Ağayev onu da əlavə etdi ki, həmin ərazidə piyada keçidinin tikintisi planlaşdırılır: “Bununla bağlı da təkliflər hazırlayaraq AAYDA-ya ünvanlamışıq. Keçidin nə zaman tikiləcəyi isə artıq həmin qurumun öhdəliyindədir”.

Günel CƏLİLOVA

Son xəbərlər