44 gün davam edən İkinci Qarabağ müharibəsində qazanılan tarixi qələbəmizdə şəhid gizir Vidadi Cəbrayıl oğlu Cabbarovun payı çox olub. Adı xalq dilində dastana dönmüş igid əsgər 1997-ci ildə dağlar diyarı Lerik rayonunun Piran kəndində dünyaya göz açmışdı. Vətən sevgisi, torpağa bağlılıq ana südü ilə birgə hopmuşdu Vidadinin qanına. Odur ki, Azərbaycanın müqəddəs parçası sayılan Qarabağın düşmən tərəfindən işğalını heç cür vicdanına sığışdıra bilmirdi.
Vətən müharibəsi başlanan günü Azərbaycan Ordusunun giziri Vidadi Cabbarov 30 ilə yaxın düşmən tapdağında olan əzəli-əbədi yurd yerimiz Qarabağın azadlığı naminə yağı düşmənlə döyüşə girir. Cəbrayılda, Qubadlıda şiddətli döyüşlər zamanı yüksək şəxsi rəşadət, qəhrəmanlı göstərərək düşmənin çoxlu sayda texnikasını, canlı qüvvəsini məhv edir. Beləcə erməni faşistlərdən intiqamımı alıb, oktyabrın 20- də Qubadlı rayonunda düşmənlə qeyri- bərabər savaşda şəhidlik zirvəsinə ucalır. Dövlət gizir Vidadı Cabbarovun Vətənə sədaqətini, müharibədə göstərdiyi rəşadətini əsas tutaraq ölümündən sonra onu “Vətən uğrunda”, “Cəbrayılın azad olunmasına görə”, “Qubadlının azad olunmasına görə” və “Döyüşdə fərqlənməyə görə” medallar ilə təltif edir.
Lerik camaatı öz şərəfli ölümü ilə Vətəninə, millətinə baş ucalığı gətirən qəhrəman oğlunu hər an ehtiramla xatırlayır, adına yaraşan işlər görürlər. Bu günlər isə doğulub boya-başa çatdığı Piran kəndində Vidadi Cabbarovun barelyefinin və xatirəsinə tikilmiş bulaq kompleksinin açılış mərasimi oldu. Möhtəşəm tədbirə qatılanlar öncə şəhidin uyuduğu məzarını ziyarət edib önünə gül-çiçək dəstələri düzdülər.
Vidadi Cabbarovun barelyefi onun təhsil aldığı Piran kənd tam orta məktəbində qurulubdur. Ziyarətçilər buraya gəlib barelyefin açılışını etdilər. Daha sonra şəhidin xatirəsinə inşa edilmiş bulaq kompleksinin açılış mərasimi keçirildi. Tədbir iştirakçıları Vidadi Cabbarova bir daha dərin ehtiramlarını bildirdilər, onun qısa və mənalı həyat yolunda qürurla söhbət açdılar. Tədbirdə çıxış edən Lerik Rayon İcra Hakimiyyəti başçısının səlahiyyətlərini icra edən Cəlil Baxşıyev isə dedi:- Vətən müharibəsində Azərbaycan Respublikasının Prezidenti, Ali Baş Komandan cənab İlham Əliyevin rəhbərliyi altında müzəffər Azərbaycan Ordusu işğal altındakı Qarabağ torpaqlarini 44 günə azad etdi. Bu möhtəşəm qələbə Vətən oğulların qanı, canı bahasına qazanıldı. Ölkəmizin ərazi bütövlüyü uğrunda gedən döyüşlərdə şəhid olmuş qəhrəman övladlarının xatirəsi həmişə xalq, dövlət tərəfindən ehtiramla xatırlanır.
Həm Birinci, həm də İkinci Qarabağ müharibəsində Lerik rayonundan olan qəhrəman oğullarımız da hərbi əməliyyatlarda misilsiz rəşadət göstəriblər. Şəhid gizir Vidadi Cabbarov da onların içində olmaqla. Leriklilər öz qalib şəhid oğullarını ürəklərində yaşatmaqla onlarla fəxr edirlər. Bundan sonra da şəhidlərin həyatı və döyüş yoluna həsr olunan tədbirlər mütəmadi olaraq keçirilər. Onların qəhrəmanlığı, şücaəti, fədakarlığı hər bir azərbaycanlı üçün daim bir örnək olacaqdır. Sonra söz məktəblilərə verildi. Onların ifasında şəhidlərə və Vətən müharibəsində qazanılan şanlı zəfərimizə həsr olunmuş şerlər səsləndi. Şəhidin atası Cəbrayıl Cabbarov çıxışında şəhid ailələrinə göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya dərin minnətdarlığını bildirdi .
Zəfər ORUCOĞLU Azərbaycan Jurnalistlər Birliyinin üzvü
