Dağlar diyarı Lerik rayonunda məktəblilər arasında təhsilə olan maraq hər il yüksəlir. 2021/2022 tədris ilində də respublikanın ali təhsil müəssisələrinə qəbul imtahanlarında yüksək bal toplayaraq tələbə adını qazanana Lerikli gənclər çoxdur. Lerik Rayon İcra Hakimiyyətində keçirilən görüş tələbə olan məzunların sevincinə daha bir sevinc qatdı.
Tədbiri açan İcra Hakimiyyəti başçısının səlahiyyətlərini icra edən Cəlil Baxşıyev əvvəlcə tələbə adını qazanmış gəncləri, onların valideynlərini və müəllimlərini yüksək nəticəyə görə təbrik edərək bildirdi ki, rayon üzrə respublikamızın müxtəlif ali məktəblərinə qəbul olunan məzunların sayı hər il artır. Rayonda dövlət tərəfindən təhsilə göstərilən qayğının nəticəsidir ki, artıq tələbə adını qazanan əksər məzunların topladığı bal 500-dən yuxarı olur. Həm də çox sevindirici haldır ki, son illər ali məktəblərə daxil olan Lerikin ucqar kənd məktəblərində oxuyan qızların sayında artım vardır.
Dünyanı bürümüş pandemiya ilə əlaqədar ötən ilin mart ayından dərslər onlayn qaydada aparıldı. Bu həm müəllimlər, həm də şagirdlər üçün müəyyən çətinliklər yaratsa da rayonda təhsilin səviyyəsi əhalini razı salır. Bunu qazanılan nəticələr də göstərir. Belə şəraitdə yüksək bal toplayaraq ali təhsil müəssisələrinə daxil olan gənclərlə görüş keçirməyin böyük əhəmiyyəti vardır.
Görüşdə Lerik şəhər 1 saylı texniki fənlər təmayüllü liseyinin məzunu, 651 balla Bakı Ali Neft Məktəbinə qəbul olunmuş Eltun Bəbirzadə, Veri kənd tam orta məktəbinin məzunu, 521 balla Azərbaycan Dövlət Pedaqoji Universitetinə qəbul olunmuş Aydan Məhərrəmova, eləcə valideynlər adından Faiq Məhərrəmov çıxış edərək gənclərin təhsil alması üçün ölkəmizdə yaradılan yüksək şəraitə görə ölkə rəhbərinə minnətdarlıq etdilər.
Tədbir respublikanın ali təhsil müəssisələrinə keçirilmiş qəbul imtahanlarında yüksək bal toplayaraq ali məktəblərə qəbul olmuş gənclərə qiymətli hədiyyələr təqdim edilməklə başa çatdı.
Zəfər ORUCOĞLU Azərbaycan Jurnalistlər Birliyinin üzvü
