Suvarma sularının ədalətsiz bölgüsü məsələsi mütəmadi olaraq səslənir. Hətta Prezident İlham Əliyev bir müddət öncə Azərbaycan Meliorasiya və Su Təsərrüfatı Açıq Səhmdar Cəmiyyətinin sədri Zaur Mikayılovu qəbul edən zaman suyun ədalətsiz bölüşdürülməsi hallarının geniş vüsət alması haqqında fikir bildirmişdi.
Buna baxmayaraq, hələ də bölgələrdə su çatışmazlığı problemi yaşanır. Demək olar ki, hər həftə hansısa rayonda su çatışmazlığının yaşanması haqqında məlumat yayılır. Növbəti belə bir məlumat Biləsuvar rayonunda qeydə alınıb. Rayonun İsmətli kəndinin sakinləri su çatışmazlığı ilə bağlı aksiya keçiriblər. Sakinlər bildirir ki, kənddə 7 minə yaxın insan yaşayır: “İçməyə 1 qram suyumuz yoxdur. İcra nümayəndəsi Mübariz Mürsəlovla kəndin bələdiyyə sədri Zaur Seyfiyev ancaq öz şəxsi problemləri ilə məşğuldurlar. Heç bir problemi həll etmirlər. Dəfələrlə icra nümayəndəsinə zəng edirik, amma cavab vermir. Kənd camaatı adından Prezidentə müraciət edib, kömək istəyirik”.
Sakinlər bildirir ki, kanallarda olan sular yalnız vəzifəli şəxsləri ərazilərinə axıdılır. Bununla bağlı rayonda, demək olar ki, hər gün etiraz aksiyaları keçirilir.
“Su, səviyyəsinin azalması üzündən əhalinin tələbatını tam təmin etməyə çatmadığı üçün müəyyən çətinliklər yaranır”
Məsələ ilə bağlı Biləsuvar Rayon İcra Hakimiyyətindən bildirildi ki, su probleminin yaşanmasının səbəbi Araz çayında su səviyyəsinin kəskin düşməsidir: “Araz çayında su səviyyəsinin kəskin düşməsi səbəbindən Biləsuvar rayonuna da verilən suyun həcmində azalma var. Su, səviyyəsinin azalması üzündən əhalinin tələbatını tam təmin etməyə çatmadığı üçün müəyyən çətinliklər yaranır. Bu nəzərə alınaraq, rayonun yeganə su təminatı mənbəyi olan Cənub Muğan kanalına verilən su Biləsuvar rayon İcra Hakimiyyətində yaradılmış Qərargah tərəfindən müəyyən olunmuş qrafik əsasında kəndlər üzrə bölüşdürülür. İsmətli kəndi də su ilə mövcud qrafik əsasında təmin olunur”.
Günel CƏLİLOVA
