Yeni Günəşli qəsəbəsində yaşayış binası tikən “Sahil-S İnşaat” MTK-nın rəhbəri Allahverdiyev Taley Şamil oğlunun vergidən yayındığı üzə çıxıb. Həmin binadan mənzil alan sakinlər bildirir ki, şirkət mənzillərin əksəriyyətini artıq satıb.
Hazırda mənzillərin təxminən 97 faizinin sahibi var: “Lakin Taley Allahverdiyev mənzillərin çoxunun satılmadığını deməklə, İqtisadiyyat Nazirliyi yanında Dövlət Vergi Xidmətini aldadır və vergidən yayınır. Payçıları aldatmağı azmış kimi, dövlətə də kələk gəlmək istəyən şirkət rəhbərinin bu əməlinin ciddi şəkildə təftiş olunmasına zərurət var. Dövlət Vergi Xidməti “Sahil-S İnşaat” MTK-nın fəaliyyətini araşdıracağı təqdirdə şirkətin vergidən necə yayındığı aşkar olunacaq. Təbii ki, bunun da cərimə sanksiyası az deyil. Həmçinin, MTK imzalanan müqaviləni qanunsuzluq edərək pozur, xitam verir, yeni müqavilə tərtib edir və mənzillərin qiymətini qaldırır. Bununla razılaşmayanlar isə şirkət tərəfindən məhkəmə ilə hədələnir və evinin əlindən alınacağı bildirilir. Paralel olaraq isə vergi fırıldağına yol verilir. Ona görə də bu şirkətin işi hüquq-mühafizə orqanlarının diqqət mərkəzinə gəlməlidir. Əgər vergidən yayınma faktı aşkarlanarsa, Taley Allahverdiyev barəsində cinayət işi başlana bilər. Mənzillərin 97 faizi satıldığı halda, şirkət rəhbəri qırmızı yalanlar danışa bilir. Bu minvalla vergidən yayındırdığı vəsait mənimsənilir. Halbuki, binanın sonuncu mərtəbəsinin tikintisi yarımçıq qalıb. Şirkət ən azı tikintini yekunlaşdıra bilərdi. Amma nə bizə hesabat verilir, nə tikintinin dayanmasının səbəbi izah olunur, nə də normal söhbət aparılır. Bəs bu işi təhvil verə bilməyəcəkdilərsə, yüzlərlə ailənin niyə hissləri ilə oynanılıb və verdikləri pullar hara gedib? Şirkət bir neçə il qabaq telekanallarda və internet mediasında özünü reklam edir, vətəndaşları bu binadan mənzil almağa çağırırdı. Bu da nəticəsi...”.
Məsələ ilə bağlı “Sahil-S İnşaat” MTK ilə əlaqə saxlamağa çalışdıq. MTK-nın səhfəsində olan əlaqə nömrəsini yığdıq. Lakin bəlli oldu ki, səhifədə qeyd olunan nömrənin MTK ilə heç bir əlaqəsi yoxdur.
“Hər bir tikilinin, həcmindən və mürəkkəbliyindən asılı olmayaraq, tikinti müddəti var”
Iqtisadçı ekspert Kamran Məmmədli bildirdi ki, bu sahəyə nəzarət mexanizmi tətbiq edilməlidir: “Məlumat üçün bildirim ki, hər bir tikilinin həcmindən və mürəkkəbliyindən asılı olmayaraq, onun tikinti müddəti var. Tikinti şirkətlərinin qarşısına tikintinin bitmə müddəti haqqında şərt qoyulmalıdır. Elə tikililər var ki, 10 ildir tikilir, ancaq hələ də ortada heç nə yoxdur. Tikilinin vaxtında təhvil verilməsi ilə bağlı beynəlxalq normativlərdən istifadə olunmalıdır”.
Həmsöhbətimiz onu da əlavə etdi ki, tikinti şirkətləri vergidən yayınmaq üçün müxtəlif üsullara əl atır: “Bu səbəbdən də tikinti şirkətlərinə nəzarət daha da gücləndirilməlidir”.
Günel CƏLİLOVA
