Prezident İlham Əliyev Fərid Qayıbovu gənclər və idman naziri təyin olunması ilə əlaqədar videoformatda qəbul edib. Dövlət başçısı qəbulda çıxış edib, yeni nazirə bir sıra tapşırıq və tövsiyələr verib.
Prezident yeni nazirə idman sahəsində buraxılan nöqsanları da ciddi araşdırmağı tapşırıb. Ölkə başçısı bildirib ki, xüsusilə Olimpiya Oyunlarına hazırlıq dövründə bəzi federasiyalarda işlər qeyri-qənaətbəxş olub və bütün federasiyalarda mövcud olan vəziyyət ciddi təhlil edilməlidir: “Deməli, məşq prosesinə, təlim-məşq toplanışlarına xüsusi diqqət verilməlidir. Onu da nəzərə almalıyıq ki, son Olimpiya Oyunlarında medallar qazanmış idmançılarımız bizim təcrübəli idmançılardır. Demək olar ki, veteran idmançılardır. Onların arasında gənc nəslin nümayəndələri yoxdur və bu, çox ciddi təhlil edilməlidir. Necə ola bilər ki, nəsillər arasında artıq belə bir ara, elə bil ki, məsafə yaranır. Son illərdə bütün bölgələrdə idman obyektlərinin tikintisi geniş vüsət alıb, təkcə bölgələrdə 50-yə yaxın idman-olimpiya kompleksimiz fəaliyyət göstərir. Onların fəaliyyəti ciddi təftiş edilməlidir, orada məşq prosesi nə səviyyədədir, uşaqlar, yeniyetmələr idman bölmələrinə gəlirmi, gəlmirmi, idmanla məşğul olmaq üçün şərait nə dərəcədədir? Çünki biz bu infrastrukturu, bu kompleksləri o məqsədlə yaratmışıq ki, idmanın kütləviliyi artsın, eyni zamanda, peşəkar idmançılar yetişsin. Nəzərə alsaq ki, Tokio Olimpiya Oyunlarında gənc idmançılar medallar qazana bilmədilər, bu çox ciddi təftiş edilməlidir. Klublardakı vəziyyətlə bağlı təhlil aparılmalıdır. Yəni biz nəticə çıxarmalıyıq. Biz, əlbəttə, qələbələrlə fəxr edə bilərik. Ancaq çatışmazlıqlar da var və onlar aradan qaldırılmalıdır. Bu sahədə şəffaflıq tam təmin edilməlidir və bütün xoşagəlməz hallara qarşı ciddi mübarizə aparılmalıdır”.
Göründüyü kimi, Prezident bölgələrdəki Olimpiya Mərkəzlərinin nəticə vermədiyindən narazılığını ifadə edib. Həmin sahədə vəziyyət doğrudan da acınacaqlıdır. Biz dəfələrlə bu yöndə tənqidi yazılar yazmışıq. Hətta konkret rayonların adlarını çəkərək, həmin rayondakı Olimpiya mərkəzlərini yerli icra başçılarının öz kef məclisləri üçün istifadə etdiyinə dair faktları da diqqətə çatdırmışıq. Rayonlardakı əksər Olimiya komplekslərində məşqlərin qiymətləri olduqca bahadır. Bu da kənddəki fiziki sağlam və gələcəkdə yaxşı idman nəticəsi verə biləcək gəncləri orada məşq etmək imkanından məhrum edir. Prezidentin əsaslı tənqidindən sonra bu sahədəki neqativliklər düzələ bilərmi?
İdman eksperti Kənan Məstəliyev “Bakı-Xəbər”ə açıqlamasında bildirdi ki, dövlət başçısının son çıxışından bizə bir çox detallar aydın oldu: “Bizi sevindirdi ki, dövlət başçısı idmanımızda olan bütün nöqsanlardan xəbərdardı və işinin çox olmasına baxmayaraq, prosesləri yaxından, diqqətlə izləyir. Hətta idman infrastrukturunda olan hadisələrdən belə xəbərdar olduğu üzə çıxdı. Biz bilirik ki, Prezident daima idmançılarımıza və idmanın inkişafına böyük qayğı və diqqət nümayiş etdirib. Son illərdə görürük ki, həmin diqqətin əvəzi lazımi şəkildə geri qaytarılmır. Prezidentin adından səslənən bu iradlar idman cameəsi üçün olduqca mənfi hal sayılır. Azərbaycan idman infrastrukturu baxımından dünyanın ən önçül ölkələrindəndir. Adambaşına düşən olimpiya komplekslərinin sayına görə bəlkə də dünyada ən birincidir. Hətta bölgələrimizdə idmanın inkişafı üçün maksimal dərəcədə şərait yaradılıb. Sadəcə, həmin idman mərkəzlərinin təyinatı üzrə işlədilməməsi danılmaz faktdır. Biz də bilirdik ki, həmin komplekslərin çoxunda idmandan kənar bütün işlərlə məşğul olurlar. İlk dəfədir ki. bu neqativlik ölkə başçısının dilindən səslənir. Çox ciddi bir siqnaldır. Ümid edirəm ki, yeni nazir ölkə başçısını narahat edən bu neqativliklərin aradan qaldırılması istiqamətində əlindən gələni edəcək”.
Ekspertin sözlərinə görə, yerlərdəki məmurlar bundan sonra olimpiya mərkəzlərinin işinə və fəaliyyət profilinə müdaxiləni saxlamalıdır: “Son Olimpiadada bir qızıl belə qazana bilməməyimiz elə idmana olan bu cür ogey münasibətdən doğur. Görünən odur ki, artıq Prezident nəticəyə mənfi təsir edən bütün detalları yeni nazirə göstərib. İnfrastrukturu olmayan idmandan nəticə gözləməyə də dəyməz. Bizdə isə infrastruktur var, qalır ondan səmərəli istifadəni təşkil etmək”.
Məhəmmədəli QƏRİBLİ
