Goranboy rayonu Qızılhacılı qəsəbə sakini, sabiq müəllim Eminov Neman Bayram oğlu qəsəbədəki 1 və 2 saylı tam orta məktəblərdəki qanunsuzluqlarla bağlı təhsil naziri Cənab Emin Əmrullayevə (Surəti: Azərbaycan Respublikasının Baş Prokuroru Kamran Əliyevə, Azərbaycan Respublikasının Təhsil İşçiləri Azad Həmkərlar Komitəsinin sədri Səttar Möhbalıyevə, Azərbaycan Respublikasının Hesablama Palatasının sədri Vüqar Gülməmmədova,
Azərbaycan Respublikası Yeni İctimai Nəzarət Şurasının sədri Ramil Şükürova) müraciət edib və müraciətin də bir surətini redaksiyamıza göndərib.
Vətəndaş Neman Eminov yazır:
Goranboy rayonu Qızılhacılı qəsəbə 1 saylı tam orta məktəbinin direktoru Qabil Həsənov qanunsuz olaraq Goranboy RTŞ-nin sabiq müdiri Səxavət Məmmədovun göstərişi əsasında ibtidai siniflər üzrə direktor müavini vəzifəsi ştatı yaradaraq məktəbin rus dili müəlliməsini həmin vəzifəyə təyin edib.
Bundan başqa, direktor Qabil Həsənov xadiməçi işləyən iki bacını qanunsuz olaraq özlərinin xəbəri olmadan işdən azad edib, azad etməsinə baxmayaraq, bacıları xadimə olaraq işlədib, adlarına olan əməkhaqqı kartlarına isə "million aparatı" ilə əməkhaqqı ödənişini həyata keçirib. 2021-ci ilin avqust ayında iki bacı biliblər ki, neçə aydır bunların adları rəsmi olaraq işdə getmir, özlərinə xəbər verilmədən işdən qanunsuz azad olunaraq, əmək müqavilələrinə xitam verilib. Məktəb Həmkarlar Təşkilatı, məktəbə təhkim olunan inispektor, məktəbin mühasibi direktorun həyata keçirdiyi saxtakarlığa göz yumaraq bilə-bilə direktora şərait yaradıblar. Məktəbdə direktor ikili işçilərin işə gəlib-getmə qeydiyyat jurnalı (tabel) təşkil edib.
Məktəbin Təsərrüfat işləri üzrə direktor müavini Rövşən Zeynalov yüksək idarəçilik qabiliyyəti, peşəkarlığı ilə seçilən nüfuzlu kadr olduğu üçün nöqsanlar, saxtakarlıqlar barəsində aidiyyatı qurumlara, xüsusi ilə hüquq-mühafizə orqanlarına rəsmi məlumat verib. Hazırda araşdırılma aparılır, direktor Qabil Həsənov barəsində təqdimat RTŞ-nin rəhbərliyi tərəfindən Təhsil Nazirliyinə göndərilib, direktor hazırda məktəbə gəlmir. Məktəbdə direktor vəzifəsinin səlahiyyətləri bir neçə gündür məktəbin Təşkilati işlər üzrə müavini Həvayət Həsənovaya tapşırılıb. Nəzərinizə çatdırım ki, 2019-cu ilin fevral ayında məktəbə aparılan yoxlamalar əsasında Təhsil Tazirliyinin göstərişi ilə Həvayət Həsənova "töhmət" alıb. Belə bir kadr məktəb direktoru vəzifəsinə təyin edilə bilərmi?
Goranboy rayonu Qızılhacılı qəsəbəsi 2 saylı tam orta məktəbdə direktor vəzifəsində çalışdığı müddətdə xüsusi qərarla İradə Həsənova məktəb direktoru vəzifəsindən azad edilib. İradə Həsənovanın xüsusi qərarla direktor vəzifəsindən çıxarılma əmri Təhsil Nazirliyindən gizlədilib, bir neçə ildən sonra isə sənədləri RTŞ-nin sabiq müdiri tərəfindən hazırlanaraq direktorların işə qəbulu imtahanına göndərilib. Hazırda məktəb direktoru vəzifəsində çalışır.
Məktəbin ƏMR kitabı, pedaqoji şura kitabı araşdırılsa, yoxlanılsa direktor İradə Həsənovanın xüsusi qərarla məktəb direktoru vəzifəsindən azad olunması aşkarlanar. Təhsil Nazirliyinin Daxili Nəzarət Şöbəsi nə səbəbə yuxarıda qeyd etdiyim bu məsələləri araşdırmır?
Vətəndaş təhsil nazirinə müraciət edərək qeyd edilən məsələlərin araşdırılmasını xahiş edir.
“Onu da qeyd edim ki, neçə illər idi ki, millətin gələcəyi olan təhsil Goranboy rayonunda "HƏRRACA" qoyulmuşdu. Bu rayonun təhsilində dövlətimizin təhsil qanunları deyil, "BAZAR QANUNLARI" hökm sürürdü. Çox şükürlər olsun ki, 05.08.2021-ci il tarixində Goranboy Rayon Təhsil Şöbəsinə peşəkarlığı və qayğıkeşliyi ilə seçilən, bacarıqlı kadr, nüfuzlu ziyalı cənab Seymur Nazarov müdir vəzifəsinə təyin edilib.
Mən gələcəyə nikbin baxıram. Ona görə ki, belə bir nüfuzlu şəxs, bacarıqlı kadr millətin gələcəyi olan təhsilə Goranboy rayonunda rəhbərlik edir.
Xüsusi təşəkkürümü Təhsil naziri cənab Emin Əmrullayevə bildirirəm ki, belə bir bacarıqlı, nüfuzlu kadrı Goranboy Rayon Təhsil Şöbəsinə müdir vəzifəsinə təyin edib” – N.Eminov yazır.
Məktubda adları çəkilən məktəb rəhbərlərinin mövqeyini məmuniyyətlə çap edə bilərik. Redaksiya olaraq kimin haqlı olduğu barədə qəti fikir bildirmək istəmirik və hər şey barədə hörmətli Təhsil Nazirinin ölçü götürəcəyinə ümid edirik.
Namiq QULİYEV
