44 günlük Vətən müharibəsi Azərbaycan xalqına zəfər sevincini bəxş etməklə yanaşı, xalqımızın qəhrəman oğullarını da bir daha öz xalqına tanıtdı. Neçə-neçə igid oğullar Vətən uğrunda haqq savaşının iştirakçısı, şəhid və ya qazi oldular.
Sonunda zəfər çaldığımız bu müharibə Azərbaycan xalqının Vətənə necə bağlılığını, onun üçün gözünü qırpmadan canından keçməyə hazır olduğunu bir daha nümayiş etdirdi. 30 ilə yaxın bir dövr ərzində davam edən amansız erməni işğalına qarşı xalqımız yumruq kimi birləşdi, mərd oğullarımız könüllü olaraq Vətənin müdafiəsinə qalxdılar. Ölkənin dörd bir yanından hər bir kəs Vətənin müdafiəsi üçün Qarabağa yollandı. Bu müharibədə Oğuz rayonu da şəhid verdi. Oğuz rayonunda şəhidlər böyük hörmətlə anılır. Ancaq bu günlərdə rayonda şəhidlərlə bağlı xoşagəlməz hallar baş verib. Belə ki, 44 günlük Vətən müharibəsində şəhid olanların məzarları üzərindən əklil və gül dəstələri götürülüb. Bu barədə görüntüləri şəhid Məhəbbət Paşayevin atası Vaqif Paşayev sosial şəbəkələrdə yayıb. Iddia edir ki, əklillər Oğuz rayon İcra başçısının birinci müavini Etibar Yusubovun tapşırığına əsasən kənardakı dərəyə atılıb.
“Bütün media nümayəndələri, istənilən şəxs gəlib baxa bilər, hətta I Qarabağ şəhidlərinin də barelyefləri hazırlanıb”
Məsələ ilə bağlı Oğuz Rayon İcra hakimiyyəti ilə əlaqə saxladıq. İcra Hakimiyyətinin rəsmisi bildirdi ki, Oğuzdakı Şəhidlər Xiyabanında təmir işləri aparılır: “Şəhidlər Xiyabanında əsaslı təmir gedib və yekunlaşma üzrədir. Yüksək səviyyədə ora təmir olunub. O güllər də məzarlar üzərindən götürülməyib. Kənara qoyulub və yenidən geri qaytarılıb. Orada elə bir problem yoxdur. Videonu haradasa gedib çəkiblər. Harada çəkilibsə, heç nə deyə bilmərəm. Bütün media nümayəndələri, istənilən şəxs gəlib baxa bilər. Hətta I Qarabağ şəhidlərinin də barelyefləri hazırlanıb. Yəni bura da Bakının Şəhidlər Xiyabanı səviyyəsində hazırlanır”.
Günel CƏLİLOVA
