Sahibkarlığın inkişafı, əlverişli biznes mühitinin yaradılması məqsədilə ölkədə müəyyən işlər həyata keçirilir. Görülən işlərin əsas məqsədi ölkədə sahibkarlığın inkişaf etdirilməsidir. Ancaq buna baxmayaraq, hələ də sahibkarlıqla məşğul olanlara müəyyən maneələr yaradılır. Yerli sahibkarlarla yanaşı, xarici sahibkarlara da problem yaradılır.
Yevlax rayonunda fəaliyyət göstərən xarici sahibkar da ona edilən təzyiqdən narazılıq edir.
Edit Arxadyevna adlı İsrail vətəndaşı bildirir ki, 11 ailə üzvü ilə Yevlaxda yaşayırlar, gəlir yerləri olan karxananın işləməsinə maneə yaradılır. İsrail vətəndaşı qeyd edir ki, uzun müddətdir onlara Yevlax Şəhər İcra Hakimiyyətinin başçısı Anar Tağıyev tərəfindən təzyiqlər olur: “Mənim 70-dən yuxarı yaşım var və üç dəfə qəbuluna getmişəm, amma icra başçısı məni qəbul etmədi. Anar Tağıyev kürəkənimi qəbula çağıraraq bərabər işləmək təklif edib. Təklifi qəbul etmədiyimiz təqdirdə karxananı bağladılar. Ora bizim ailəmizin yeganə qazanc, gəlir yeri idi”.
“Sahibkar tərəfindən eyni zamanda istismar norma və qaydalarına əməl olunmadığından, Kür çayında fauna və floraya ziyan vurulduğu müəyyən edilib”
Məsələ ilə bağlı Yevlax Rayon İcra Hakimiyyətindən bildirildi ki, karxana faktiki olaraq müraciət edən Edit Arxadyevnanın kürəkəni Mirzəyev Cavanşir Məhəmmədəli oğluna məxsusdur: “Karxana Cavanşir Mirzəyev tərəfindən işlədilib, müqavilə müddəti 2021-ci il martın 3-də bitib. Ölkə ərazisində fəaliyyət göstərən qum-çınqıl karxanalarının respublikanın ekoloji təhlükəsizliyinə və infrastruktur obyektlərinə mənfi təsirinin təhlili və təkliflərin verilməsi məqsədilə Azərbaycan Respublikası Nazirlər Kabinetinin 18 may 2017-ci il tarixli 17/2322-31/12/10 nömrəli tapşırığına əsasən Fövqəladə Hallar Nazirliyinin çağırışı ilə yaradılıb. Ekologiya və Təbii Sərvətlər Nazirliyinin və digər aidiyyəti qurumların mütəxəssislərindən ibarət komissiya tərəfindən yerli icra hakimiyyəti nümayəndələrinin iştirakı ilə qeyd olunan karxanalarda və çay hövzələrində 12 iyun 2017-ci il tarixdən 31 iyul 2017-ci il tarixədək monitorinq keçirilib və müvafiq araşdırma işləri aparılıb. Araşdırma zamanı məlum olub ki, qum karxanasının sahibi normativ şərtlərə riayət etməyərək, iki ədəd torpaq sovuran qurğunu Kür çayının məcrasında quraşdırıb, çayın yatağının sahil boyu genişlənməsi müşahidə olunub və ekoloji tarazlığın pozulması təsdiqlənib. Sahibkar tərəfindən eyni zamanda istismar norma və qaydalarına əməl olunmadığından Kür çayında fauna və floraya ziyan vurulduğu müəyyən edilib. Bununla bağlı Ekologiya və Təbii Sərvətlər Nazirliyi tərəfindən Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinə müraciət edilib, hazırda fakt əsasında Cinayət Məcəlləsinin 255.2 (vəzifə səlahiyyətlərindən sui-istifadə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə cinayət işi başlanıb, istintaq davam etdirilir. Haqqında bəhs edilən şəxs müqavilə vaxtının başa çatmasına baxmayaraq fəaliyyətini davam etdirib. Eyni zamanda, Mirzəyev digər ərazidə - Dövlət Meşə Fonduna məxsus ərazidə qeyri-qanuni olaraq qum hasilatı ilə məşğul olub, Yevlax Şəhər İcra Hakimiyyətinin vəzifəli şəxslərini hədələyib şər-böhtan ataraq, qanunsuz istifadə etdiyi əraziyə sənəd verilməsini tələb edib. Hazırda Ekologiya və Təbii Sərvətlər Nazirliyinin aidiyyəti qurumları tərəfindən Cavanşir Mirzəyevin gördüyü qanunsuz işlər araşdırılır”.
Günel CƏLİLOVA
