Naxçıvandan 2-ci Qarabağ müharibəsində təqribən min əsgər vuruşub. Onlardan 300 nəfəri şəhid olub. Bu gənc vətənpərvərlərin hamısının bir məqsədi olmuşdur. Bu da Azərbaycanın ərazi bütövlüyünü qorumaq idi. Çünki Naxçıvan da tarixən erməni faşistlərinin basqılarına məruz qalmışdır. Son Qarabağ müharibəsində Naxçıvan 10 il blokada şəraitində yaşamışdır. İndi isə kimliyindən, harada anadan olmasından asılı olmayaraq hamı vətəni qorumaq üçün silaha sarılmalı idi. Onlar tarixi ədaləti qanları ilə yazmaq üçün döyüşə gedirdilər. Belələrindən biri də Məftun Rasim oğlu İbrahimov oldu.
Onun 25 yaşı var. İş elə gətirmişdi ki, Naxçıvan Mərkəzi Xəstəxanasının Fizoterapeya şöbəsində mən müalicə aldığım zaman onu da mənim yerləşdiyim palataya göndərdilər. Xəstəxana paltarı geyindikdən sonra tanış olduq. Deməli, mənim 1996-cı ildə Krımda açdığım “Qobustan” radiosu ilə eyni vaxtda anadan olmuşdur.
Radionun taleyinə bənzər bu gəncin də taleyi eyni idi, eyni məqsədi daşıyırdı. Bizi əsl vətənaşlıq hissi birləşdirirdi. Fərq onda idi ki, Məftun məftun olub sevdiyi vətənin tarixini Şuşada qanı ilə yazdı. Gənc döyüşçü haqqında bir az ətraflı məlumat verməyi vacib bilirəm.
Orta məktəbi Kəngərli rayonu Qarabağlar kəndində bitirmişdir. Onun tarix müəllimi Bəhruz müəllim həmişə şagirdlərini belə tərbiyə edirdi:
“Uşaqlar, bizim vətənimiz tarix boyu erməni faşistlərinin riyakar, məkrli əməllərinin qurbanı olmuşdur. Keçmiş tarixdə onlar Naxçıvanı odlara qalayıb, əhalisini silahdan keçirib, qocaların bellərinə qaynar samovar bağlayıb işgəncə vermişlər. Sonralar Zəngəzuru ələ keçirib Qafan adlandırdılar. Naxçıvanı Azərbaycandan ayırdılar. Vətən torpağını hissə-hissə doğrayıb məhv edirdilər. Biz illərlə ədalət uğrunda, namus uğrunda vuruşub qan tökmüşük.
O zaman balaca Məftun müəllimin bu sözlərini diqqətlə beyninə həkk edib qan yaddaşına yazmışdı. Həmişə öz-özümə sual verdi ki, niyə belə olmalıdır, bizim günahımız nə idi? Vaxtı ilə xalq şairi Bəxtiyar Vahabzadə demişdir ki, bizim günahımız gözəlliyimizdir, təmiz insan olmamızdır. Ona görə də Allah bizə hər şeyi verməklə bərabər bu mənfur qonşunu da bizə caladı. Bəlkə Ulu Tanrı bununla bizi sınağa çəkirdi ki, daha çox bir-birimizi qoruyaq və pis gündə dayaq olaq. Biz həmişə hörmətli Prezidentimizin Dəmir yumruğu kimi birləşməliyik.
Məftun böyüdü, orta məkəbi qutardı. Naxçıvanda hərbi xidməti başa vurub hərbi hissədə çalışdı. İkinci Qarabağ müharibəsi başlayanda Vətən çağırır deyib yola düşdü. İlk döyüşə Cəbrayıldan başladı. Cəbrayılın azad olunmasında ön cəbhənin qalib əsgəri kimi döyüş yolunu davam etdirdi. Sonra Füzuli, Suqovuşan, Qırmızı bazar istiqamətlərində vuruşdu. Daşaltı əməliyyatını uğurla başa vurub Şuşanın çətin dağlıq-qayalıq sıldırım yollarında qranatatan silahla və okament silahı ilə irəliləyib gecə qaranlığında öz döyüşçü yoldaşları ilə cəbhə xəttini yarıb Şuşaya daxil oldular. Şiddətli döyüşdə ermənilər dağlara, təpələrə dırmanıb qaçmağa başladılar. Atışma bir neçə saat çəkdi. Döyüş dostları bir-bir gözünün qabağında həlak oldular. Məftun isə şəhidlik anını gözünün önünə gətirib qətiyyətlə qərara gəldi ki, şərəflə ölmək daha yaxşıdır. Çünki bundan yüksək zirvə ola bilməz. Şuşa Qarabağın zirvəsi sayılırsa, bundan da yüksəkdə “Vətən” deyilən bir varlığın zirvəsi dayanır. O şəhid yoldaşlarının ruhu qarşısında and içib döyüşü davam etdirdi. Bu atəşə cavab olaraq düşmənin top mərmisi Azərbaycan əsgərlərinin arasına düşdü. Gecənin qaranlığında yaralananlar və həlak olanlar müxtəlif istiqamətlərdə yerə döşəndilər. Məftun bədənində, qolunda, ayağında küt ağrılar hiss etdi. Barmağı silahın tətiyində yavaş-yavaş qüvvədən düşdü, huşunu itirdi. Gözünü açanda ermənilərin qərargahında əsgər yoldaşları onu sarğı edirdilər. Ən dəhşətlisi bu idi ki, qarın boşluğu dağılmış, bağırsaqları bayıra tökülmüşdü. Onun bağırsaqlarını torbaya yığıb təcili Bakıya hərbi hospitala göndərdilər. Həkimlərin fədakarlığı nəticəsində bağırsaqlar yenidən tikilib qarın boşluğuna salındı. Məftunun əzablı günləri başladı, damarlarına qan köçürüldü. Bir neçə aya bağırsaqlarının fəaliyyəti bərpa olundu. Bədəninin deşilmiş yaraları tikildi. Onun həyatı həkimlər tərəfindən bərpa olundu. O doğma kəndi Kəngərlinin Qarabağlar kəndinə qayıtdı. İndi isə Naxçıvan Mərkəzi Xəstəxanasında ayağından, qolundan müalicə alır. Fizeoterapiya şöbəsinin müdiri Nuray Əliyeva deyir ki, sağ ayağının yuxarı nahiyəsi, sağ qolunun aşağı hissəsi qəlpə yarasından hərəkət məhdudiyyətini itirmişdir. Müalicədən sonra Məftunun sağlamlığı tam bərpa olunacaqdır. Məftun ona tibbi qayğı göstərən baş həkim Zəbur Bağırova, fizeoterapiya şöbəsinin müdiri Nuray həkimə, ona xidmət edən tibb bacılarına, onu həyata qaytaran Bakı Hərbi Hospitalının həkimlərinə dərin minnətdarlığını bildirir. Azərbaycan Respublikasının Prezidentinin dediyi kimi biz Azərbaycan həkimlərinin bizə olan xidməti qarşısında baş əyirik.
Qələmə aldı: Həbib ƏLİYEV
Krım Azərbaycan “Qobustan” verilişinin baş redaktoru. Krımda 1913-cü ildə yaradıcı jurnalistlərin beynəlxalq müsabiqəsində radiolar üzrə laureat diplomu və gümüş medalçısı.
