Vətəndaşlar “OBA” marketlər şəbəkəsində vaxtı keçmiş məhsulun satıldığını iddia edirlər. Bu barədə sosial media qruplarından birində Eliko Xekiyev adlı istifadəçi məlumat verib.
O, “OBA” marketlər şəbəkəsinin mağazasında vaxtı keçmiş məhsulun kampaniya çərçivəsində satıldığını bildirib: “Mağaza sistemində çalışan bir nəfər kimi, bildiyim qədərilə, 9 ay müddəti olan məhsullar bitmə tarixinə 15 gün qalmış satışdan çıxarılmalıdır. Amma siz ("OBA” market - red.) satışdan çıxartmaq əvəzinə, vaxtı bitməsinə 2-3 saat qalmış məhsulları kassa önündə sərgiləyib, kampaniya kimi 1+1 bağlama şəklində satırsınız. Bu məhsulu dünən marketinizdən su alarkən kassir təklif etdi və tarixinə baxmadan götürdüm. Amma bitmə tarixinə 10-15 dəqiqə sonra fikir verdim. Məndən başqa müştərilər də almağa başladı. Təbii ki, bitmə tarixinə baxmadan. Nəzərə almağınız xahiş olunur”.
“OBA” marketlər şəbəkəsi: “Hazırda şikayətçi ilə əlaqə saxlamağa çalışırıq, ondan hadisənin hansı mağazada baş verdiyini öyrənib, tədbir görəcəyik”
Məsələ ilə bağlı “OBA” marketlər şəbəkəsi ilə əlaqə saxladıq. Marketdən bildirildi ki, səsləndirilən iddia ilə bağlı araşdırma aparılır: “Hazırda şikayətçi ilə əlaqə saxlamağa çalışırıq. Ondan hadisənin hansı mağazada baş verdiyini öyrənib, tədbir görəcəyik”.
Eyyub Hüseynov: “Sanki marketlərdə olan qidaların bir qismi ölməzlik statusu alıb”
“Azad İstehlakçılar” Birliyinin (AİB) sədri Eyyub Hüseynov qeyd etdi ki, sanki marketlərdə olan qidaların bir qismi ölməzlik statusu alıb: “Bu nüans isə səhhətimiz üçün çox böyük təhlükə doğurur. Vaxtı keçmiş qida məhsullarının son taleyi bizi çox narahat edir. Marketlər belə məhsulları bir küncə yığaraq sonradan distrübüter firmalara geri qaytarırlar. Təəssüflər olsun ki, biz yalnız bura qədər olan prosesi bilirik. Lakin bundan sonra həmin məhsulların taleyi necə olur, onu bilmirik".
Birlik sədri hesab edir ki, bu problem Azərbaycan Qida Təhlükəsizliyi Agentliyi tərəfindən nəzarətə götürülməlidir: "Həqiqətən də bu gün marketlərdə çox acınacaqlı hal yaranıb. Malların buraxılma tarixi, saxlanma müddəti və saxlanma şəraiti ilə bağlı ölkədə çox ciddi problemlər var. Əsasən süd-qatıq məhsulları istehsal edən sahibkarlar bəzi fırıldaqlara ət atırlar. Ağartı məhsullarının istehsal, yararlılıq və son istifadə müddətləri qapaqların üzərində yazılır ki, bunu da dəyişib yeniləmək çox asandır. Lazım olanda həmin yapışqan kağız yenilənib yenidən marketlərə qaytarılır. Bəzən də elə həmin kağızı qopardıqda altında köhnə tarixin saxlandığı hallarla da rastlaşmaq mümkündür. Bizim tələbimiz budur: tarix elə bir yerdə vurulsun ki, məhsulun qapağı açılanda "plomb” kimi qırılıb düşsün”.
Günel CƏLİLOVA
