Koronavirus təhlükəsindən qorunmaq üçün üç optimal qorunma vasitəsindən biri olan maskalardan, bəzi məsuliyyətsiz vətəndaşları nəzərə almasaq, çoxumuz istifadə edirik. Virusun ölkəmizdə yayıldığı ilk vaxtlarda maskaların qiyməti kəskin şəkildə artsa da, hətta ölkədə süni şəkildə maska qıtlığı yaradılsa da, sonradan vəziyyət stabilləşməyə doğru getdi.
Həmin dövrdə 15-20 qəpiyə olan Çin istehsallı maskaların birdən-birə 40, 50, bəzi apteklərdə 60 qəpiyə satıldığının hər kəs şahididir. Son iki-üç ayda həmin maskaların qiyməti 30 qəpik idi. Amma artıq apteklərin çoxunda Çin istehsalı olan və əhalinin böyük əksəriyyətinin gündəlik alıb istifadə etdiyi maskaların qiymətində ucuzlaşma müşahidə edilir. Dünənə qədər 30 qəpiyə aldığımız maskalar hazırda bir çox aptekdə 25 qəpiyə satılır. Maskaların qiymətinin aşağı salınmasının səbəbi ilə maraqlandıqda isə aptek əməkdaşları bildirdilər ki, həm ölkəmizdə maska istehsalının həyata keçirilməsi, həm də xaricdən gətirilən maskaların əvvəlkinə nisbətən ucuz başa gəlməsi qiymətin düşməsinə səbəb olub. Aptek işçiləri onu da dedilər ki, ola bilsin, sentyabrın sonlarına, oktyabra yaxın maskaların qiyməti 15-20 qəpik olsun. Məktəblərin açılması ilə əlaqədar olaraq maskaya tələbatın daha çox artacağını deyən aptek işçilərinin sözlərinə görə, apteklər müştərilərin maraqlarına uyğun addım atırlar.
“...insanlar gedib maskanı o ünvanlardan alacaqlar”
Həkim-terapevt Leyla Bayramlının sözlərinə görə, apteklərdə bəzi ölkələrin istehsalı olan maskaların ucuzlaşması müsbət haldır və bu, maskadan istifadəni daha da əlçatan edir.
Prezident İlham Əliyevin Sumqayıt Kimya Sənaye Parkında tibbi maska istehsalı müəssisəsinin açılışındakı çıxışını xatırladan ekspert bildirdi ki, ölkə başçısı o dövrdə maska ilə bağlı apteklərdə və digər ticarət yerlərində süni qiymət artımına yol verildiyini və bunun yolverilməz olduğunu qeyd edirdi. “Yadınıza gəlirsə, cənab Prezident öz çıxışında maska ilə bağlı süni qiymət artımını ciddi tənqid etdi və belə halların yolverilməz olduğunu, müvafiq dövlət qurumlarının buna çox ciddi nəzarət mexanizmi tətbiq etməli olduğunu bildirirdi. Artıq apteklərdə maska ilə bağlı süni qiymət artımı müşahidə edilmir. Bu işlə məşğul olanlar həmişə vətəndaşlarımızın maraqlarını müdafiə edən ölkə başçısının haqlı iradlarından nəticə çıxardılar və süni qiymət artımını dayandırdılar. Bu gün, müşahidə etdiyiniz kimi, artıq apteklərdə bəzi ölkələrin istehsalı olan maskaların qiyməti ucuzlaşıb. Pandemiya şəraitində hansı apteklər ki, maskaların qiymətini ucuzlaşdırırlar, həmin apteklərə tələbat artacaq, insanlar gedib maskanı o ünvanlardan alacaqlar. Maska taxmaq, sosial məsafə saxlamaq, gigiyena qaydalarına riayət etmək virusa yoluxma risqindən qorunmaq üçün ən optimal vasitədir. Maskaların qiymətinin 5 qəpik də olsa aşağı salınması müsbət addımdır. Fikrimcə, məktəblərin açılma ərəfəsində maskaların ucuzlaşması imkan verəcək ki, valideynlər hər gün uşaqlarının maskasını yeniləsinlər. Bəzən uşaqlar, elə böyüklər də bir maskanı iki-üç gün taxırlar, amma belə olmaz. O maskalar bir dəfə istifadə edilmək üçündür”.
L.Bayramlının sözlərinə görə, gigiyenik məhsullar, spirt və digər vasitələri istehsal edən və satışa çıxaran sahibkarlar da qiymətlərdə ucuzlaşma etsələr yaxşı olar. Ən çox tələbat olan məhsulların qiymətlərinin ucuzlaşmasının insanlar üçün əhəmiyyətli olacağını deyən ekspert hesab edir ki, bu addım atılarsa, vətəndaşlar o sahibkarlardan razı qalar, sahibkarlar da bununla dövlətin işinə dəstək vermiş olarlar.
Ekspertin fikirlərindən aydın oldu ki, maskaların ucuzlaşması insanların gündəlik maska almasına şərait yaradacaq və bu da ucuz maska satan apteklərə gələn müştərilərin sayını artıracaq.
İradə SARIYEVA
