Bakı Nəqliyyat Agentliyinin (BNA) şöbə müdiri Hikmət Babayevin çıxışı zamanı səsləndirdiyi “Taksiləri gündəlik nəqliyyat vasitəsinə çevirmək düzgün deyil” fikri geniş müzakirəyə səbəb olub. Müzakirələrdə taksi xidmətləri ilə yanaşı, ictimai nəqliyyatda, o cümlədən metroda da gediş haqlarının qaldırılacağı qeyd olunur. İddia edilir ki, ictimai nəqliyyatda gediş haqqı 50 qəpiyə qədər qaldırılacaq.
Məsələ ilə bağlı BNA-nın mətbuat xidmətinin rəhbəri Mais Ağayev verdiyi açıqlamada gediş haqqının artırılacağı ilə bağlı yayılan məlumatların həqiqətə uyğun olmadığını bildirib:
“Ölkədə dövlət tənzimlənməsi tətbiq edilən qiymətlərin (tariflərin), xidmət haqlarının dövlət tənzimlənməsini həyata keçirən kollegial icra hakimiyyəti orqanı Azərbaycan Respublikasının Tarif Şurasıdır. Bakı şəhərində müntəzəm sərnişindaşıma sahəsində dövlət nəzarətini həyata keçirən qurum olaraq, Bakı Nəqliyyat Agentliyi tərəfindən qeyd edilən məsələ ilə bağlı Tarif Şurasına müraciət edilməyib və bu məsələ hazırda gündəmdə deyil”.
Bundan sonra qurum qalmaqala səbəb olan şöbə müdirinin açıqlamasına da aydınlıq gətirib:“Bakı Nəqliyyat Agentliyinin (BNA) hazırladığı taksi fəaliyyətinin tənzimlənməsinə dair layihə təklif xarakterli olub və bu sahədə fəaliyyətin təkmilləşdirilməsi məqsədi güdür. Layihənin həyata keçirilməsi nəticəsində sərnişin təhlükəsizliyinin, sağlamlığının və rahatlığının daha yüksək səviyyədə təmin edilməsi, eyni zamanda, taksi sürücülərinin əmək şəraitlərinin yaxşılaşdırılması, sosial rifahının və gəlirlərinin artması, taksi fəaliyyətinə peşə kimi münasibətin formalaşdırılması, dempinqin üzərində qurulmuş rəqabətin keyfiyyət üzərində qurulmuş rəqabətlə əvəzlənməsi, şəffaflığın təmin edilməsi, dövlət nəzarətinin gücləndirilməsi kimi məsələlərin həlli nəzərdə tutulur. Bununla da Nazirlər Kabinetinin 73 saylı qərarla müəyyən edilən tələblərinin icrası təmin ediləcək. Son günlər bazar iştirakçıları və vətəndaşlar tərəfindən layihə ilə bağlı çoxsaylı müraciətlər daxil olub və təkliflər irəli sürülüb. Agentlik daxil olan rəy və təklifləri də nəzərə almaqla layihənin üzərində yenidən iş aparılmasını qərara alıb. BNA-nın şöbə müdiri Hikmət Babayevin verdiyi açıqlamanın onun şəxsi fikri olduğunu, qurumun mövqeyini əks etdirmədiyini bildirir və onunla bağlı müvafiq inzibati tədbirlərin həyata keçirildiyini bəyan edirik".
İstər taksilərlə bağlı deyilən fikirlər, istərsə də ictimai nəqliyyatda qiymətlərin qaldırılacağı ilə ilə bağlı yayılan şayihələrin əhalinin nisbətən imkansız olan təbəqəsini əhatə etdiyi məlumdur. Əhalini qıcıqlandıran bu tip şayiələrin yayılmasında kimlər maraqlı ola bilər?
İdarəetmə sistemləri üzrə mütəxəssis Asif İbrahimov “Bakı-Xəbər”ə açıqlamasında bildirdi ki, bu iki məsələyə fərqli aspektdən yanaşmaq olar:“Birinci halda taksi bazarındakı vəziyyətin təkmilləşdirilməsi nəzərdə tutulur. Mən də razıyam ki, rəqabət mühitinə toxunmadan, qiymət siyasətinə dəymədən taksi bazarında müəyyən nizam-intizam yaratmağa ehtiyac var. Məsələn, xəttə buraxılan maşınların təzəliyi, texniki göstəricilər və başqa parametrləri. Ancaq efirə çıxarılan BNA rəsmisi fikrini əhalini qıcıqlandıran tərzdə izah edib. Həmin adamın fikirlərinə diqqət edək. Deyir ki, “Taksiləri gündəlik nəqliyyat vasitəsinə çevirmək düzgün deyil”. Bunu taksi şirkətlərinin ucuz fəaliyyətinə görə deyir. BNA-nın açıqlamasında deyilir ki, həmin adam öz şəxsi fikirlərini deyib və cəzalandırılıb. Bu açıqlamanın özündə də təzad var. Əgər şəxs efirə BNA rəsmisi kimi dəvət olunubsa, deməli, elə həmin qurumun adından danışıb. Burada hər hansı şəxsi fikirdən söhbət belə gedə bilməz. Götürək ki, o adam şəxsi fikrini ifadə edib, o zaman BNA niyə həmin adamı cəzalandırır? Bu amil qurumun fəaliyyətini düzgün qura bilmədiyinə bir sübut sayıla bilər. Bu çıxışdan sonra şayiə yayıldı ki, ictimai nəqliyyatda gediş haqqı 50 qəpik olacaq. BNA yayılan xəbərlərə dərhal münasibət bildirdi və bunun həqiqətə uyğun olmadığını dedi. İctimai nəqliyyatdan əhalinin çox böyük hissəsi istifadə edir. Həmin təbəqəni qızışdıran bu tip informasiyaların dövriyyəyə buraxılması təsadüfi deyil. Belə həssas məqamda bunu yayanlar ölkəmizi istəməyən qüvvələrdi. Əlaqədar dövlət qurumları da öz fəaliyyətlərini elə tənzimləməlidirlər ki, belə şayiələrin yayılmasına əsas olmasın. Ən başlıcası isə, hansı məqsədlə yayılmasından asılı olmayaraq, istənilən dezinformasiyanın qarşısı rəsmi qurumların məsələyə operativ reaksiya verməsindən sonra alınır. Bir faktı da deyim ki, ölkədə qiymət dəyişikliyini BNA həll etmir. Bu, Tarif Şurasının səlahiyyətinə aid olan məsələdir”.
Təbiidir ki, belə şayiələrin yayılmasının arxasında yalnız məkrli niyyətlər ola bilər.
Məhəmmədəli QƏRİBLİ
