Azərbaycanda son illər abort etdirən qadınların sayı artıb. Açıqlanan statistik rəqəmlərə əsasən, son bir ildə Azərbaycanda abort etdirən məktəbyaşlı (15-17 yaşarası) qızların sayı yenidən artıb. Abort etdirən məktəbyaşlı qızların sayı 2018-i illə müqayisədə ötən il 22,5% artaraq 40 nəfərdən 49 nəfərə yüksəlib. Bu, son 4 ildə qeydə alınan ən yüksək göstərici olub.
Məlumat üçün bildirək ki, ötən il ölkədə, ümumilikdə, 37 min 308 qadın abort etdirib və bu göstərici əvvəlki illə müqayisədə 3,2% və 1 min 167 nəfər artıb. Abort etdirənlərin 3,9% və ya 1 455 nəfəri 15-19 yaşlılar olub. Bu yaşda abort etdirən qadınların sayı ötən bir il ərzində 17,5% və ya 217 nəfər artıb.
Onu da bildirək ki, Azərbaycanda ümumi abort etdirənlərin sayı 2017-ci ildə ən yüksək səviyyəyə - 37 min 618-ə yüksəlib. Məktəbyaşlı qızlar arasında abortların sayı isə ən yüksək səviyyəyə 2010-cu ildə çatıb – 158 abort.
Qeyd edək ki, bu rəqəmlər rəsmi göstəricilərdir. Qeyri-rəsmi abortların sayını da əlavə etsək, açıqlanan rəqəmlərin sayı ikiqat çox olar. Təəssüf ki, valideynlər bəzi hallarda çıxış yolunu abortda görürlər. Əlbəttə, 15-19 yaşlı qızların hamilə qalması müxtəlif formada baş verib. Erkən nikahlar və ya zorlanma halları buna misal ola bilər.
“Məktəb yaşlı qız uşaqlarının abort statistikasında nəzarətsiz uşaqların da payı az deyil”
“Vəfa” Sosial-İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, məktəblilərin abort etdirməsində erkən nikaha daxil olan qızların payı üstünlük təşkil edir. Bununla yanaşı, 15-19 yaşlı qızların abort etdirməsi statistikasında zorlama cinayətlərinin payı da var: “Buraya, eyni zamanda, aldatma, erkən nikah, gənclərin sərbəst seksual münasibətləri də daxildir. Uşaqlar daha sərbəst, daha rahat və seksual azad olmağa üstünlük verirlər. Təbii ki, təcrübəsizlik, eyni zamanda, nəzarətsizlik, ailədə zorakılıq halları buna təsir göstərir. Hamilə qalan qızların hamısı o demək deyil ki, öz xoşu ilə cinsi əlaqədə olub. Həmin rəqəmlər içərisində zorlama halları da baş verib. Amma düşünürəm ki, məktəblilərin abort statistikası əsasən cinayətlər hesabına böyüyür. Bu mövzuda əsas diqqət göstərilməli məqam məktəblilərin abort etdirməsində gizli abortların payıdır. Əgər həmin gənclər valideynlərindən xəbərsiz gizli abort etdiriblərsə, bu artıq cinayət sayılır”.
Həmsöhbətimizin sözlərinə görə, məktəb yaşlı qız uşaqlarının abort statistikasında nəzarətsiz uşaqların da payı az deyil. Birlik sədri onu da əlavə etdi ki, zorlanma, təcavüz nəticəsində meydana gələn hamiləlik sonrasında qadınların psixoloji sağlamlığında yaranan ciddi problemlərdən biri də o olur ki, onlar travmatik olaraq bu uşağın zorlanma nəticəsində əmələ gəldiyi üçün özünə və onlara zərər verəcəyini düşünürlər. Bu barədə ciddi fikirləşdikdən sonra isə çarəni abortda tapırlar.
Günel CƏLİLOVA
