Paytaxtda yeni ekspress taksi xidməti yaradılacaq. Bunu Bakı Nəqliyyat Agentliyinin (BNA) Hüquq şöbəsinin müdiri Hikmət Babayev media nümayəndələrinə açıqlamasında deyib.
O qeyd edib ki, bu məsələ agentliyin təşəbbüsü ilə müzakirə edilən yeni konsepsiyada öz əksini tapıb: "Həmin taksilər birbaşa marşrut üzrə hərəkət edəcək. Bu taksilər fəaliyyətə başlayandan sonra pərakəndə halda işləyən "1 manatlıq" taksilərin fəaliyyətinin qarşısı alınacaq. Ekspress taksilər sərnişinlər üçün tənzimlənən formada fəaliyyət göstərəcək".
H.Babayev bildirib ki, hazırda müxtəlif istiqamətlərdə "1 manatlıq" taksilər pərakəndə vəziyyətdə fəaliyyət göstərərək bir dayanacaqdan digər dayanacağa sərnişin daşımaqla məşğuldur: "Həmin taksilər tənzimlənmədiyindən, avtobus dayanacaqlarına daxil olur, dayanacaqlarda və yollarda tıxaclar yaradır. Bu da sərnişin və sürücülərin haqlı narazılığına səbəb olur".
Qeyd edək ki, “1 manatlıq” taksilərin ləğv olunması xəbəri ictimaiyyət arasında böyük narazılığa səbəb olur.
“…ictimai nəqliyyatdakı yeri, fəaliyyəti də danılmazdır, bunu heç kim inkar edə bilməz”
Nəqliyyat eksperti Elməddin Muradlı qeyd etdi ki, “1 manatlıq” taksiləri ləğv etmək mümkün olmayacaq: “Sürücü qanuni şəkildə fərqlənmə nişanı alırsa, normal taksi kimi fəaliyyət göstərirsə, yenə də işinə davam edəcək. Sadəcə, digər ekspress taksilərin yaradılması bir təklif kimi irəli sürülüb. Təklif hələ müzakirə edilir. Ekspress avtobus xətləri var, o demək deyil ki, digər avtobuslar ləğv edilib. Ekspress taksi xətləri yaradılanda digər taksilər də öz işini quracaq. Sadəcə, tələb budur ki, keyfiyyətli xidmət və qanuni fəaliyyət göstərilsin. Yoxsa, hər yerindən duran maşının üzərinə taksi nişanı qoyub “Sumqayıta, Xırdalana bir manat” deyib, yolda qışqırmasın. Normal şərait yaratmaq lazımdır ki, “1 manatlıq” taksilər də qanun çərçivəsində fəaliyyət göstərsin, dövlətin vergisini, sosial ödənişlərini vaxtında versinlər”.
Həmsöhbətimiz onu da əlavə etdi ki, bu gün “1 manatlıq” taksi sürücülərindən hansısa sənədləri alması və maşının saz vəziyyətdə olması tələb olunur. Lakin həmin sürücü taksini saxlamağa yer tapmır: “Maşını harada saxlayırsa, gəlib cərimə yazırlar. Həmin taksi sürücüsündən hər şeyi tələb edirik, amma ona heç bir şərait yaratmırıq. Bu da obyektivlik deyil. Ona görə hər bir halda tərəfdarıyam ki, taksi fəaliyyəti ilə bağlı normal şərait yaradıb, sonra inzibatçılıq tətbiq edilsin. Müəyyən şərait yaratmadan tələblər irəli sürmək düzgün deyil”.
Ekspertin sözlərinə görə, "1 manatlıq” taksilərin ictimai nəqliyyatda rolu böyükdür: "Təbii ki, "1 manatlıq” taksilərin bu gün də ictimai nəqliyyatdakı yeri, fəaliyyəti də danılmazdır. Bunu heç kim inkar edə bilməz. Çünki avtobuslar çatışmayanda, metro işləməyəndə, digər nəqliyyat növləri yoxdursa, ümid qalır “1 manatlıq” taksilərə. Onları bir günün içində ləğv etmək də düzgün deyil. Sadəcə, elə bir konsepsiya, təklif ortaya qoyulmalıdır ki, heç kim iş yerindən olmasın, həm də xidmət də keyfiyyətli olsun. Hazırda müzakirə edilən mövzu budur. Kiminsə çörəyinə bais olmaq, kimisə işsiz qoymaq məsələsi ortada yoxdur".
Günel CƏLİLOVA
