Xəbər verildiyi kimi, Bakıda jurnalistlər üçün inşa edilən binanın qarşısında bankomat quraşdırılıb. “Kapital Bank” orada yaşayan jurnalistlərin rahatlığını təmin etmək məqsədilə binanın qarşısında bankomat yerləşdirib. Həmçinin, ərazidə Bakı Nəqliyyat Agentliyi (BNA) tərəfindən "BakıKart" yükləmə aparatı da qoyulub.
Binada yaşayan jurnalistlər qəzetimiz vasitəsilə “Kapital Bank” və BNA rəhbərliyinə təşəkkürlərini ifadə ediblər.
Nadir İsmayılov: “…jurnalistlərin rahatlığını təmin etmək məqsədilə “Kapital Bank” binanın qarşısında bankomat yerləşdirib”
Jurnalistlər binasının sakini, Əməkdar jurnalist Nadir İsmayılov bizimlə söhbətində qeyd etdi ki, bir neçə aydır paytaxtın Səbail rayonu, Yeni Salyan yolu, ev 22 ünvanında - jurnalistlər üçün tikilmiş binaların yerləşdiyi ərazidə bir canlanma var: “Biz sakinlərin arzu və istəklərinə əsaslanan bu canlanma fonunda bu günlər daha bir addım atılıb. Xəbərlərdən də bəlli olduğu kimi, həmin binalarda yaşayan jurnalistlərin rahatlığını təmin etmək məqsədilə “Kapital Bank” binanın qarşısında bankomat yerləşdirib. Həmçinin, ərazidə BNA tərəfindən "BakıKart" yükləmə aparatı da qoyulub. Binada yaşayan jurnalistlər də, öz növbələrində, “Kapital Bank” və BNA rəhbərliyinə təşəkkürlərini ifadə ediblər. Təbii ki, mən də bu təşəkkürə qoşuluram. Eyni zamanda, bildirmək istəyirəm ki, bütün bu görülən işlər, ilk növbədə, dövlətimizin biz jurnalistlərə olan diqqət və qayğısının nəticəsidir. Digər tərəfdən, hesab edirəm ki, bizim bu təşəkkürlərimizdən Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun rəhbərliyinə də pay düşür. Çünki məhz bu qurumun rəhbərliyində baş verən dəyişikliklərdən sonra jurnalistlərin xeyrinə olan bir çox uğurlu addım atılıb”.
Nigar Abdullayeva: “Media nümayəndələri nəqliyyatdan və bank xidmətindən daha tez istifadə imkanı əldə edəcəklər”
Müstəqil jurnalist Nigar Abdullayeva qeyd etdi ki, media təmsilçilərinin rahatlığı üçün binanın qarşısına bankomatın qoyulması təqdirəlayiqdir: “Bir müddət bundan öncə Səbail Rayon İcra Hakimiyyətinin başçısı Vüqar Zeynalov jurnalistlərin yaşadığı binanın ərazisinə gəlib, sakinlərlə görüş keçirmişdi. Həmin vaxt sakinlər mövcud problemlərin həlli ilə bağlı bir sıra xahişlər etmişdilər. Həmin məsələlərin sırasında ərazidə bankomat, yükləmə terminallarının quraşdırılmasının vacibliyi də yer alırdı. Çünki əvvəllər bu ehtiyaclarını ödəmək üçün xeyli məsafə qət etməli olur, “BakıKart”, “MilliÖn” terminallarının və “Kapital Bank”a məxsus bankomatın xidmətindən istifadə etmək üçün “20-ci sahə” dairəsinə getmək məcburiyyətində qalırdılar. Artıq bu problemlərin yerində həll olunması jurnalistlər üçün əlçatanlıq imkanını asanlaşdırır. Bundan sonra qeyd edilən xidmətlərdən istifadə üçün başqa əraziyə getməyə ehtiyac qalmayacaq.
Media nümayəndələri nəqliyyatdan və bank xidmətindən daha tez istifadə imkanı əldə edəcəklər. Bu imkanı yaratdığına görə əməyi keçən hər kəsə təşəkkürümüzü bildiririk”.
Qeyd edək ki, Bakıda jurnalistlər üçün inşa edilən binaların qarşısında bankomatın quraşdırılması orada yaşayan media nümayəndələrinin işini rahatlaşdıracaq.
Günel CƏLİLOVA
