MİDA-nın Yeni Yasamal Kompleksinin sakinləri yaşadıqları binaların gələcək taleyindən narahatdırlar. Yeni Yasamal Kompleksinin sakinləri sosial şəbəkələrdə bununla bağlı paylaşımlar edirlər. Belə ki, bina bataqlıq ərazidə tikildiyindən, qrunt sularının xaric edilməsi məqsədilə daim nasoslar işləyir. Lakin bir müddət əvvəl nasosların bir saatlıq dayanması nəticəsində ərazidəki qrunt sularının miqdarı artıb və binaların zirzəmiləri su ilə dolub.
"Qanlı göl" ətrafı kimi tanınan bu yerdə tikilən binaların sakinləri gələcəkdə qarşısıalınmaz problemlərlə üzləşə bilərmi?
“…həmin binaların gələcəkdə daha ağır fəsadlarla üzləşməsinə gətirib çıxaracaq”
AMEA-nın Coğrafiya İnstitutunun Ekocoğrafiya şöbəsinin müdiri Ənvər Əliyev bildirdi ki, hər hansı bir ərazidə bu cür su mənbələrinin olması orada ciddi elmi araşdırmalar aparılmasını və mütəxəssislərin rəyinə fikir verilməsini tələb edir: “Məlumat üçün bildirim ki, Qafqaz dağları Alp-Himalay qırışıqlığının bir hissəsi olmaqla, Azərbaycan ərazisindən, o cümlədən, Xəzər dənizinin altından keçərək, Kapet dağdan sonra Himalay silsiləsinə qovuşaraq, İndoneziyaya qədər uzanır və dünyanın ən məşhur 3 dağ sistemindən birini təşkil edir. Respublikamızın ərazisindən keçən bu dağ silsiləsində çoxlu su mənbələrinin olması elmə çoxdan məlumdur. Bu su mənbələrinin bir hissəsi şəhərimizi içməli su ilə təmin etməklə yanaşı, bir hissəsi də paytaxtımızın altından lay suları kimi Xəzər dənizinə tökülür”.
Həmsöhbətimiz hesab edir ki, Yasamal gölü ətrafında binaların tikilməsi məqbul deyil. Ümumiyyətlə, bu cür sosial evlərin daha geniş və münasib yerlərdə tikilməməsi təəssüf doğurur. Gölətrafı binaların su məsələsi, əlbəttə, gələcəkdə ciddi problemlərə yol aça bilər. O axıntının arası kəsilməyibsə, xüsusən də qışı quraq keçən indiki vaxtda sular aramsız gəlirsə, deməli, bu suların mənbəyi əbədidir. Bu da həmin binaların gələcəkdə daha ağır fəsadlarla üzləşməsinə gətirib çıxaracaq. Hidrogeoloqlar orada geniş elmi araşdırma aparmalı, suların dərinliyi, mənbəyi və istiqaməti dəqiq müəyyən edilməlidir. Ərazi üçün tərtib edilmiş ekspertiza aktının necə və hansı şəraitdə yazılması barədə məlumatım yoxdur. Belə problem varsa, həmin ərazidə binaların və digər yaşayış evlərinin tikintisi dayandırılmalıdır".
Günel CƏLİLOVA
