2012-ci ildə paytaxtımızın müxtəlif yerlərində, metroların qarşısında və metro keçidlərində multimedia taksafonlarının quraşdırılması işinə başlananda Bakı sakinləri və şəhərimizin qonaqları layihəni böyük məmnuniyyətlə qarşılaşsalar da, ilkin vaxtlarda hətta sıx-sıx olmasa da, müəyyən şəxslər bundan istifadə etsələr də, illər keçdikcə, insanların taksafonlara marağı, demək olar ki, tamamilə sönüb.
Bu gün həmin taksafonların, onların yerləşdirildikləri köşklərin tamamilə yararsız bir vəziyyətdə olduğu göz önündədir. Mobil telefonlardan, planşetlərdən əsas əlaqə, rabitə vasitəsi kimi istifadə etməyə üstünlük verən paytaxt sakinləri taksafonlara əhəmiyyət vermirlər. Bir çox halda taksafon köşkləri yağışlı günlərdə ərazilərdə səyyar ticarətlə məşğul olan insanların, yaxud ictimai nəqliyyat dispetçerlərinin daldalanacaq yerlərinə çevrilir. Yəni bəzi təsadüfləri və istisnaları nəzərə almasaq, kimsə zəng vurmaq üçün taksafon köşklərinə yaxın belə getmir.
Bundan başqa, istifadəsiz vəziyyətdə olan taksafon köşkləri hazırda ən çox reklam şirkətlərinin öz reklam plakatlarını vurmaq vasitəsinə çevrilib. Reklam yerləşdirmək istəyən insanlar reklam səhifələrini taksafon köşklərinin üzərinə yapışdırırlar. Bu da, təbii ki, qanunsuzluqdur, reklamların uyğun olmayan yerlərdə sərgilənməsidir.
Mətbuatın araşdırmalarına görə, hətta bəzi taksafon köşklərində cihazlar işlək vəziyyətdə deyil və əhali də bu səbəbdən taksafon köşklərinə girmir. Boş qalan taksafon köşkləri və işləməyən cihazlar özləri ciddi bir problemdir.
Ekspertlər hesab edirlər ki, taksafonlara vaxtlı-vaxtında nəzarət edilmədiyi üçün, onların çoxu işləmir, sıradan çıxıb. Dünyanın bütün iri şəhərlərində multimedia taksafonların quraşdırıldığını və əhalinin, xüsusən də yaşlı nəslin ondan geniş istifadə etdiyini deyən mütəxəssislərə görə, bizdə bunun belə olmamasının səbəbi həm əhalinin taksafon xidmətindən istifadə edə bilməməsi, həm də cihazların çoxunun işləməməsidir.
“Multimedia” İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz “Bakı-Xəbər”ə bildirdi ki, istifadəsiz taksafon köşklərinin yığışdırılması, xarab olan cihazların isə bir qisminin təmir edilməsi daha məqsədəuyğundur. “Düşünürəm ki, hazırda taksafonlara marağın olmaması insanların mobil telefonlardan geniş şəkildə istifadə etməsi ilə bağlıdır. Bu gün hərənin əlində bir smartfon var, bütün informasiyaları burdan alırlar, öz münasibətlərini bu vasitə ilə qura bilirlər. Bu səbəbdən də taksafonlar elə də cəlbedici deyil. Taksofonlar turistlər, şəhərimizin qonaqları üçün cəlbedici ola bilər. Mənə elə gəlir ki, əlaqədar qurumların şəhərimizdə quraşdırılan taksafonların ümumi monitorinqini aparmasına, onların işləyib-işləməməsini müəyyən etməsinə, işləməyənlərin bir qismini bərpa etməsinə, bir qismini isə oradan götürməsinə ehtiyac var. Bu daha məqsədəuyğun olardı. Hesab edirəm ki, işləməyən avadanlıqların şəhərin ortasından qalması, artıq yer tutması arzuedilən deyil. Əhalinin gur olduğu bəzi yerlərdə taksafonların işlək vəziyyətə gətirilməsi doğru olardı. Amma qalanların yerindən götürülməsi və başqa məqsədlər üçün istifadə etmək imkanlarının nəzərdən keçirilməsi daha düzgün olar”.
Taksafon köşklərinin çoxunun reklam şirkətlərinin öz reklamlarını yapışdırmaq üçün istifadəsinə yaradığı məsələsinə gəlincə, O.Gündüz bunun qanunazidd olduğunu bildirdi. “Bu da arzuolunmaz bir haldır. Ona görə də hesab edirəm ki, icra hakimiyyəti qurumları, Nəqliyyat, Rabitə və Yüksək Texnologiyalar Nazirliyi, ya da onu quraşdıran əlavə bir podratçı şirkət varsa, o, monitorinqlər aparmalıdır. Elə taksafon köşkləri var ki, yerləşdirildiyi yerdə maneçilik yaradır, istifədə olunmur, yararsızdır, bu baxımdan, orada qalmasının doğru olmadığını düşünürəm. Amma turistlərin və qonaqların şəhərimizə gəldiyini nəzərə alaraq, bəzi yerlərdə taksafonların qalması və istifadəsi nəzərdən keçirilə bilər” - deyə O.Gündüz vurğuladı.
İradə SARIYEVA
